ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້, ທ່ານ ຜູ້ປະຈຳການຄະນະເລຂາສູນກາງພັກ ຫວໍວັນເຖືອງ, ທ່ານຮອງນາຍົກລັດຖະມົນຕີ ຜູ້ປະຈຳການລັດຖະບານ ຟ້າມບິ່ງມິງ; ທ່ານຫົວໜ້າຄະນະການເມືອງພາຍໃນສູນກາງ ຟານດິ່ງຈາກ ເປັນປະທານຮ່ວມ. ກອງປະຊຸມໄດ້ຈັດຂຶ້ນແບບທາງໄກ ດ້ວຍການເຊື່ອມຕໍ່ລະຫວ່າງຫໍສະພາແຫ່ງຊາດ ກັບ 62 ຈຸດເຊື່ອມຕໍ່ໃນທົ່ວປະເທດ.
ກ່າວຄຳເຫັນສະຫຼຸບທີ່ກອງປະຊຸມ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ໃຫ້ຮູ້ວ່າ ການກຳນົດທິດໂຄງການສ້າງກົດໝາຍຂອງອາຍຸການສະພາແຫ່ງຊາດ ຊຸດທີ XV ແມ່ນຕິດແທດກັບແຜນນະໂຍບາຍ, ແນວທາງຂອງກອງປະຊຸມໃຫຍ່ຄັ້ງທີ XIII ແລະ ເອກະສານສະບັບຕ່າງໆຂອງພັກ, ວາງອອກໜ້າທີ່ສ້າງກົດໝາຍຢ່າງລະອຽດ ທີ່ຕ້ອງໄດ້ຈັດຕັ້ງປະຕິບັດໃນອາຍຸການສະພາແຫ່ງຊາດຊຸດທີ XV. ກຳນົດທິດ ແລະ ໜ້າທີ່ສ້າງກົດໝາຍທີ່ໄດ້ວາງອອກໃນ ແຜນແມ່ບົດສະບັບນີ້ ແມ່ນໄດ້ກວມເອົາທຸກຂົງເຂດຊີວິດເສດຖະກິດ - ສັງຄົມຂອງປະເທດຊາດ ຢ່າງຮອບດ້ານ. ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວ້ ສະເໜີວ່າ:
“ພວກເຮົາຮຽກຮ້ອງໃຫ້ລັດຖະບານຕ້ອງມີຄວາມຊື່ກົງບໍລິສຸດ, ມີການກະທຳເພື່ອຮັບໃຊ້ປະຊາຊົນ ແລະ ວິສາຫະກິດ, ວຽກງານສ້າງກົດໝາຍຂອງສະພາແຫ່ງຊາດເອງກໍຕ້ອງມີຄວາມຊື່ກົງບໍລິສຸດເຊັ່ນດຽວກັນ, ບໍ່ປະໃຫ້ມີການສະແຫວງຫາຜົນປະໂຫຍດເປັນກຸ່ມໃນຂະບວນການສ້າງກົດໝາຍ. ຄະນະພັກສະພາແຫ່ງຊາດໃນອາຍຸການຕ່າງໆ ແລະ ອາຍຸການນີ້ ກໍສືບຕໍ່ເນັ້ນໜັກເຖິງວຽກງານນີ້. ສຳລັບຮ່າງກົດໝາຍທີ່ບໍ່ຮັບປະກັນດ້ານຄຸນນະພາບ ແລະ ຄວາມຄືບໜ້າ ແມ່ນເດັດຂາດບໍ່ໃຫ້ຍື່ນສະເໜີຕໍ່ສະພາແຫ່ງຊາດ, ຄະນະປະຈຳສະພາແຫ່ງຊາດ. ພວກເຮົາບໍ່ອາດຍອມຮັບເອົາຮ່າງກົດໝາຍທີ່ເວົ້າແບບຄ້າວໆ, ບໍ່ສາມາດຕອບສະໜອງຄວາມຮຽກຮ້ອງຕ້ອງການຂອງການສ້າງສາ, ພັດທະນາປະເທດຊາດ ແລະ ການເຊື່ອມໂຍງເຂົ້າກັບສາກົນ”.
ທ່ານປະທານສະພາແຫ່ງຊາດ ເວືອງດິ່ງເຫວ້ ຕັກເຕືອນວ່າ ນັບແຕ່ນີ້ເປັນຕົ້ນໄປ, ກະຊວງ, ຂະແໜງການຕ່າງໆທີ່ກ່ຽວຂ້ອງ ຄວນເອົາໃຈໃສ່ຄົ້ນຄວ້າ ແລະ ປະຕິບັດໜ້າທີ່ສ້າງກົດໝາຍໃຫ້ເປັນຢ່າງດີ./.
(ແຫຼ່ງຄັດຈາກ VOV)
