ພາບປະກອບ
ວັນທີ 22/3, ເລີ່ມດຳເນີນການເຄື່ອນໄຫວຕ່າງໆໃນຂອບເຂດກອງປະຊຸມປະຈຳປີເວທີປາໄສ ອາຊີ ປົວຢາວ ປີ 2016 ຢູ່ເທດສະບານ ປົວຢາວ, ແຂວງ ໄຮໜານ, ປະເທດ ຈີນ. ດ້ວຍຫົວຂໍ້ວ່າ “ອະນາຄົດໃໝ່ຂອງ ອາຊີ - ພະລັງຊີວິດໃໝ່ ແລະ ມູນມອງ ວິໄສທັດໃໝ່”, ເວທີປາໄສປີນີ້ ໄດ້ສຸມໃສ່ປຶກສາຫາລືກ່ຽວກັບສະພາບການດ້ານການເງິນໂລກ, ກຳລັງໜູນໃໝ່ຊຸກຍູ້ການຟື້ນຟູຂອງເສດຖະກິດທົ່ວໂລກ, ບົດບາດຂອງ ອາຊີ ໃນການຊຸກຍູ້ເສດຖະກິດໂລກພັດທະນາ… ໃນຂອບເຂດ 4 ວັນທີ່ດຳເນີນເວທີປາໄສ, ຈະມີການເຄື່ອນໄຫວທີ່ແຕກຕ່າງກັນກ່ວາ 80 ຢ່າງຄື: ກອງປະຊຸມສຳມະນາຫົວເລື່ອງສະເພາະ, ການປຶກສາຫາລືໂຕະມົນ, ໂອ້ລົມສົນທະນາໂດຍກົງ… ດ້ວຍການເຂົ້າຮ່ວມຂອງນັກປາຖະກະຖາ 300 ຄົນ ແລະ ຜູ້ແທນ 1700 ຄົນ, ປຶກສາຫາລືທຸກໆແງ່ມູມທີ່ແຕກຕ່າງກັນຂອງສະພາບເສດຖະກິດໂລກ ແລະ ອາຊີ, ໃນນັ້ນມີ 6 ເນື້ອໃນຕົ້ນຕໍເຊິ່ງລວມມີ: ການປ່ຽນໃໝ່ຢ່າງມີຫົວຄິດປະດິດສ້າງ, ການຮ່ວມສຳພັນໃນພາກພື້ນ, ບັນຫາເສດຖະກິດທີ່ພົ້ນເດັ່ນ…
ໂດຍແມ່ນໜຶ່ງໃນບັນດາສະມາຊິກກໍ່ຕັ້ງເວທີປາໄສ, ຫວຽດນາມ ໄດ້ເຂົ້າຮ່ວມກອງປະຊຸມປະຈຳປີຂັ້ນລັດຖະບານຫຼາຍຄັ້ງ ແລະ ມີການປະກອບສ່ວນຫຼາຍຢ່າງໃຫ້ແກ່ກອງປະຊຸມ. ຜ່ານການເຂົ້າຮ່ວມເວທີປາໄສ, ຫວຽດນາມ ປາດຖະໜາຢາກສືບຕໍ່ຍົກສູງບົດບາດໃນພາກພື້ນ, ຊອກຮູ້, ປຶກສາຫາລື ແລະ ແບ່ງປັນຄວາມເຫັນກັບບັນດາການນຳໃນໂລກ ແລະ ພາກພື້ນກ່ຽວກັບບັນດາການປ່ຽນແປງໃນບັນຫາເສດຖະກິດ, ການເງິນ, ການສຶກສາ… ທ່ານ ຟ້າມບີ່ງມິງ, ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດນຳໜ້າຄະນະຜູ້ແທນ ຫວຽດນາມ ເຂົ້າຮ່ວມວາລະໄຂທີ່ຈັດຂຶ້ນໃນຕອນເຊົ້າວັນທີ 24/3.
(ແຫຼ່ງຄັດຈາກ VOV)
