ວັນທີ 14 ເມສາ, ທ່ານ ເອກອັກຄະລັດຖະທູດ ດັ້ງດິ່ງກຸ໊ຍ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ ໄດ້ເປັນປະທານການປຶກສາຫາລືທາງອອນລາຍ ຂອງ ສະພາຄວາມໝັ້ນຄົງ ສປຊ ກ່ຽວກັບຫົວຂໍ້ແມ່ຍິງ, ສັນຕິພາບ - ຄວາມໝັ້ນຄົງ - ການໃຊ້ຄວາມຮຸນແຮງທາງເພດສຳພັນໃນການປະທະກັນ. ນີ້ແມ່ນໜຶ່ງໃນບັນດາເຫດການບຸລິມະສິດ ເຊິ່ງໄດ້ຮັບການປະຕິບັດຕາມຂໍ້ລິເລີ່ມຂອງ ຫວຽດນາມ ໃນຖານະເປັນປະທານ ສະພາຄວາມໝັ້ນຄົງ ສປຊ ເດືອນເມສາ 2021.
ທ່ານເອກອັກຄະລັດຖະທູດ ດັ້ງດິ່ງກຸ໊ຍ ໄດ້ເນັ້ນໜັກວ່າ ບັນດາຄວາມມານະພະຍາຍາມຮັບມື ຕ້ອງມີວິທີການສຳຜັດຢ່າງຮອບດ້ານ ພ້ອມກັບແກ້ໄຂກົກປາຍຂອງບັນຫາ, ທ່ານກໍ່ຮຽກຮ້ອງໃຫ້ປະຊາຄົມສາກົນ ເພີ່ມທະວີການໜູນຊ່ວຍໃຫ້ແກ່ຜູ້ປະສົບເຄາະຮ້າຍຈາກການໃຊ້ຄວາມຮຸນແຮງທາງເພດສຳພັນ ໃນການປະທະກັນ. ໄປຄຽງຄູ່ກັນນັ້ນ, ທ່ານເອກອັກຄະລັດຖະທູດ ໄດ້ຮຽກຮ້ອງໃຫ້ປະຊາຄົມສາກົນພ້ອມກັນ ຊຸກຍູ້ບົດບາດ ແລະ ການເຂົ້າຮ່ວມຂອງແມ່ຍິງໃນວິວັດການສ້າງສັນຕິພາບ, ປ້ອງກັນ, ສະກັດກັ້ນການປະທະກັນ ແລະ ການດຳລົງຊີວິດທາງການເມືອງ , ເສດຖະກິດ, ວັດທະນະທຳ, ສັງຄົມ ຂອງບັນດາປະເທດ. ທ່ານເອກອັກຄະລັດຖະທູດ ຫວັງວ່າ ການປຶກສາຫາລື ຈະປະກອບສ່ວນເຂົ້າໃນການເພີ່ມທະວີຄວາມຮັບຮູ້ຂອງບັນດາປະເທດກ່ຽວກັບລັກສະນະຮ້າຍແຮງຂອງໄພໃຊ້ຄວາມຮຸນແຮງທາງເພດສຳພັນໃນການປະທະກັນ, ຜ່ານນັ້ນ ເພີ່ມທະວີຄຳໝັ້ນສັນຍາສາກົນ ໃນການແກ້ໄຂບັນຫານີ້.
(ແຫຼ່ງຄັດຈາກ VOV)
