ລັດຖະບານຈັດກອງປະຊຸມປະຈຳເດືອນ 1/2017
ຕອນເຊົ້າວັນທີ 3/2, ທ່ານນາຍົກລັດຖະມົນຕີ ຫງວຽນຊວນຟຸກ ເປັນປະທານກອງປະຊຸມລັດຖະບານປະຈຳເດືອນ 1/2017. ກ່າວຄວາມເຫັນໄຂກອງປະຊຸມ, ທ່ານນາຍົກລັດຖະມົນຕີ ຫງວຽນຊວນຟຸກຕີລາຄາວ່າ, ພາຍຫຼັງ 9 ເດືອນແຫ່ງການເຄື່ອນໄຫວ, ໃນເບື້ອງຕົ້ນ, ລັດຖະບານອາຍຸການໃໝ່ໄດ້ຮັບຄວາມເຊື່ອໝັ້ນຈາກປະຊາຊົນ ແລະ ລະບົບການເມືອງ, ລັດຖະບານຕັດສິນໃຈຮັກສາຄວາມໄວ້ເນື້ອເຊື່ອໃຈນັ້ນ.“ທີ່ກອງປະຊຸມຕົ້ນປີມື້ນີ້, ພວກເຮົາຢືນຢັນອີກເທື່ອໜຶ່ງວ່າ, ພວກເຮົາຕັດສິນໃຈຮັກສາຄວາມໄວ້ເນື້ອເຊື່ອໃຈນັ້ນຕໍ່ປະຊາຊົນ, ຕໍ່ພັກ ແລະ ລະບົບການເມືອງ. ທຳອິດພວກເຮົາຕ້ອງທະວີຄູນຄວາມໄວ້ເນື້ອເຊື່ອໃຈນັ້ນດ້ວຍບັນດາການກະທຳລະອຽດ. ນັ້ນແມ່ນເພີ່ມທະວີການຄຸ້ມຄອງເສດຖະກິດສັງຄົມ, ປະຕິບັດບັນດາໜ້າທີ່ປ້ອງກັນຊາດ, ປ້ອງກັນຄວາມສະຫງົບ, ການພົວພັນກັບຕ່າງປະເທດຂອງປະເທດຊາດໃຫ້ດີ; ປະຕິບັດບັນດາຄາດໝາຍ, ໜ້າທີ່ຂອງຄະນະບໍລິຫານງານສູນກາງ, ຂອງສະພາແຫ່ງຊາດ, ບັນດາມະຕິກ່ຽວກັບແຜນການເສດຖະກິດສັງຄົມປີ 2017 ເປັນຢ່າງດີ“.
ພ້ອມກັນນັ້ນ, ລັດຖະບານກໍ່ຕັດສິນໃຈກໍ່ສ້າງລັດຖະບານແຫ່ງການສ້າງສາ, ຊື່ກົງບໍລິສຸດ, ກະທຳຢ່າງແຮງເພື່ອຮັບໃຊ້ປະຊາຊົນ ແລະ ວິສາຫະກິດ.
ໄປພ້ອມກັບການພັດທະນາເສດຖະກິດ, ທ່ານນາຍົກລັດຖະມົນຕີ ຍັງຕັກເຕືອນບັນດາກະຊວງ, ຂະແໜງການ, ທ້ອງຖີ່ນ ຄວນສືບຕໍ່ຮັບປະກັນສະພາບແວດລ້ອມແຫ່ງການດຳລົງຊີວິດຂອງປະຊາຊົນ, ຍູ້ແຮງການປະຕິຮູບດ້ານການສຶກສາ, ຮັບປະກັນຊີວິດສັງຄົມໃຫ້ປະຊາຊົນຢູ່ເຂດຫ່າງໄກສອກຫຼີກ, ປະສົບກັບຄວາມຫຍຸ້ງຍາກ. ທ່ານນາຍົກລັດຖະມົນຕີ ຍັງຊີ້ນຳໃຫ້ບັນດາກະຊວງ, ຂະແໜງການຄວນໃກ້ຊິດຕິດແທດກັບສະພາບການໂລກ ແລະ ພາຍໃນປະເທດ ເພື່ອແກ້ໄຂບັນດາບັນຫາທີ່ວາງອອກຂອງປະເທດຊາດ.
(ແຫຼ່ງຄັດຈາກ VOV)
