ທ່ານເລຂາທິການໃຫຍ່ ຫງວຽນຟູ໋ຈ້ອງ
ເຮັດວຽກກັບການນຳຫຼັກແຫຼ່ງແຂວງ ກາເມົາ
ໂດຍສືບຕໍ່ການໄປປະຕິບັດງານຢູ່ບາງແຂວງເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ, ເພື່ອກວດກາສະພາບການປະຕິບັດໜ້າທີ່ພັດທະນາເສດຖະກິດ - ສັງຄົມ, ວຽກງານກໍ່ສ້າງພັກໃນບໍລິເວນ, ໃນລະຫວ່າງວັນທີ 20 – 21/2, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ລົງຢ້ຽມຢາມ ແລະ ເຮັດວຽກຢູ່ແຂວງ ກາເມົາ. ຕອນເຊົ້າວັນທີ 21/02 ເມື່ອເຮັດວຽກກັບພະນັກງານຫຼັກແຫຼ່ງຂອງແຂວງ, ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ແຂວງ ກາເມົາ ຄວນສືບຕໍ່ຄົ້ນຄວ້າ, ກວດກາຄືນ, ປັບປຸງແຜນຜັງພັດທະນາໃຫ້ເໝາະສົມ, ເພື່ອແນໃສ່ຂຸດຄົ້ນ, ເສີມຂະຫຍາຍຄວາມສາມາດບົ່ມຊ້ອນ, ທ່າແຮງຂອງແຂວງ ກ່ວາອີກ. ທ່ານເລຂາທິການໃຫຍ່ຊີ້ແຈ້ງວ່າ: ກ່ອນອື່ນໝົດ ແຂວງຄວນສຸມໃສ່ພັດທະນາເສດຖະກິດທະເລ, ຫາປາໄກຝັ່ງຕິດພັນກັບການປ້ອງກັນຊາດປ້ອງກັນຄວາມສະຫງົບ, ອະທິປະໄຕແຫ່ງຊາດ; ເອົາໃຈໃສ່ປົກປັກຮັກສາສິ່ງແວດລ້ອມຊີວະພາບ, ປູກ ແລະ ປົກປັກຮັກສາປ່າ, ຮັບມືກັບການປ່ຽນແປງຂອງດິນຟ້າອາກາດ. ທ່ານເລຂາທິການໃຫຍ່ຖືວ່າ: ຄວນປຸກລະດົມກຳລັງແຮງໃນທົ່ວສັງຄົມ, ປະຊາຊົນ ແລະ ວິສາຫະກິດ, ທັງລະບົບການເມືອງ…ພ້ອມທັງມີກົນໄກ, ນະໂຍບາຍ, ສ້າງເງື່ອນໄຂສະດວກ ເພື່ອດຶງດູດແຫຼ່ງທຶນ; ສ້າງຖັນແຖວພະນັກງານໃຫ້ໄດ້, ເອົາໃຈໃສ່ບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ໃໝ່. ທ່ານເລຂາທິການໃຫຍ່ ສະເໜີແຂວງ ກາເມົາ ເອົາໃຈໃສ່ປະຕິບັດວຽກງານກໍ່ສ້າງພັກ, ສ້າງລະບົບການເມືອງໃຫ້ດີແລະ ຖືນີ້ແມ່ນໜ້າທີ່ປົກກະຕິ, ລຽນຕິດ.
(ແຫຼ່ງຄັດຈາກ VOV)
