ຕອນເຊົ້າວັນທີ 29 ກໍລະກົດ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ ໄດ້ໃຫ້ການຕ້ອນຮັບທ່ານລັດຖະມົນຕີກະຊວງປ້ອງກັນປະເທດ ອາເມລິກາ Lloyd Austin ທີ່ພວມຢ້ຽມຢາມ ຫວຽດນາມ ຢ່າງເປັນທາງການ.
ທ່ານນາຍົກລັດຖະມົນຕີ ຟ້າມມິນຈິງ ຊົມເຊີຍການຢ້ຽມຢາມ ຫວຽດນາມ ຂອງທ່ານລັດຖະມົນຕີ Lloyd Austin ແລະ ເຊື່ອໝັ້ນວ່າ ການຢ້ຽມຢາມຈະຊຸກຍູ້ການພົວພັນຮ່ວມມືດ້ານປ້ອງກັນຊາດ 2 ຝ່າຍ ແລະ ປະກອບສ່ວນນຳການພົວພັນຂອງ 2 ປະເທດໃຫ້ພັດທະນາຢ່າງແທດຈິງກວ່າ. ທ່ານນາຍົກລັດຖະມົນຕີສະເໜີໃຫ້ 2 ຝ່າຍຈົ່ງປະຕິບັດຂໍ້ຕົກລົງກ່ຽວກັບແຜນການກະທຳດ້ານເງິນຕາໃນໄລຍະຢ່າງເຂັ້ມງວດ; ຊຸກຍູ້ການຮ່ວມມືທາງດ້ານເສດຖະກິດລະຫວ່າງ 2 ປະເທດ ແລະ ບັນດາຂົງເຂດເຊິ່ງແມ່ນທ່າແຮງຂອງ 2 ປະເທດ.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມມິນຈິງ ໄດ້ຂອບໃຈ ອາເມລິກາ ທີ່ໄດ້ໜູນຊ່ວຍວັກຊິນ ແລະ ເຄື່ອງອຸປະກອນການແພດໃຫ້ແກ່ ຫວຽດນາມ ຜ່ານໂຄງການ COVAX ກໍຄືການພົວພັນ 2 ຝ່າຍ; ທ່ານປາດຖະໜາວ່າ ລັດຖະບານ ອາເມລິກາ ສືບຕໍ່ໃຫ້ບຸລິມະສິດໜູນຊ່ວຍວັກຊິນໃຫ້ແກ່ ຫວຽດນາມ ໃນໄລຍະໄວທີ່ສຸດ, ພິເສດ, ສ້າງເງື່ອນໄຂໃຫ້ບັນດາຄູ່ຮ່ວມມືຄົ້ນຄວ້າ, ຖ່າຍທອດເຕັກໂນໂລຊີຜະລິດວັກຊິນ ແລະ ແບ່ງປັນບົດຮຽນເພື່ອຮັບຮອງເອົາວັກຊິນ.
ສ່ວນທ່ານລັດຖະມົນຕີ Lloyd Austin ໄດ້ຕີລາຄາສູງ ແລະ ສະໜັບສະໜູນຫວຽດນາມ ທີ່ນັບມື້ນັບປະກອບສ່ວນຢ່າງຕັ້ງໜ້າກວ່າໃນ ອາຊຽນ ແລະ ສະພາຄວາມໝັ້ນຄົງສະຫະປະຊາຊາດ, ທ່ານຢືນຢັນວ່າ ອາເມລິກາ ຈະສືບຕໍ່ໜູນຊ່ວຍ ຫວຽດນາມ ແກ້ໄຂຜົນຮ້າຍຢ້ອນຫຼັງຈາກສົງຄາມ; ໜູນຊ່ວຍ ຫວຽດນາມ ຍົກສູງກຳລັງຄວາມສາມາດຄວາມໝັ້ນຄົງໃນການເດີນເຮືອຢູ່ທະເລ ແລະ ສືບຕໍ່ໜູນຊ່ວຍ ຫວຽດນາມ ສືບຕໍ່ເຂົ້າຮ່ວມກຳລັງຮັກສາສັນຕິພາບສະຫະປະຊາຊາດ.
ທ່ານລັດຖະມົນຕີ Lloyd Austin ໃຫ້ຮູ້ວ່າ, ອາເມລິກາ ຈະສືບຕໍ່ໜູນຊ່ວຍຫວຽດນາມ ແລະ ບັນດາປະເທດສຳຜັດກັບແຫຼ່ງວັກຊິນເພີ່ມເຕີ່ມໂດຍໄວ ເພື່ອແນໃສ່ຍູ້ໂລກລະບາດໂຄວິດ-19 ໃຫ້ຖອຍໄປ.
(ແຫຼ່ງຄັດຈາກ VOV)
