ເຂົ້າຮ່ວມກອງປະຊຸມ ມີຜູ້ຕາງໜ້າດ້ານການຄ້າບັນດາປະເທດໃນກຸ່ມອາຊຽນ ແລະ 6 ປະເທດຄູ່ຮ່ວມມື: ອົດສະຕາລີ, ຈີນ, ສາທາລະນະລັດເກົາຫຼີ, ອິນເດຍ, ຍີ່ປຸ່ນ, ນິວຊີແລນ; ຫົວໜ້າຄະນະ ແລະ ສະມາຊິກໃນຄະນະ ໄດ້ເຈລະຈາກັບບັນດາປະເທດເຂົ້າຮ່ວມ ກ່ຽວກັບສັນຍາ RCEP.
        ກ່າວຄຳເຫັນທີ່ພິທີໄຂກອງປະຊຸມ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ເຈິ່ນຕ້ວນແອງ ໃຫ້ຮູ້ວ່າ ກອງປະຊຸມລັດຖະມົນຕີກາງສະໄໝ ຄັ້ງທີ 3 ເພື່ອແນໃສ່ຊຸກຍູ້ການເຈລະຈາ ມຸ່ງໄປເຖິງການສິ້ນສຸດໂດຍໄວຄື ບັນດາການນຳໄດ້ຊີ້ນຳຢູ່ກອງປະຊຸມສຸດຍອດອາຊຽນຄັ້ງທີ 28-29 ເມື່ອເດືອນກັນຍາ ປີ 2016 ຢູ່ນະຄອນຫຼວງວຽງຈັນ ປະເທດລາວ. ທ່ານລັດຖະມົນຕີ ເຈິ່ນຕ້ວນແອງ ເຊື່ອໝັ້ນວ່າ ສຳລັບວິສາຫະກິດໃນພາກພື້ນ, ພິເສດແມ່ນບັນດາວິສາຫະກິດຂະໜາດນ້ອຍ, ກາງ ແລະ ນ້ອຍສຸດ ກວມອັດຕາສ່ວນກວ່າ 90 % ຂອງຈຳນວນວິສາຫະກິດໃນພາກພື້ນ, ສັນຍາ RCEP ຈະຊ່ວຍບັນດາວິສາຫະກິດເຫຼົ່ານີ້ ດຳເນີນບັນດາການເຄື່ອນໄຫວດ້ານການຄ້າໃຫ້ສະດວກກວ່າ, ສຳຜັດບັນດາແຫຼ່ງກຳລັງໃໝ່ຈາກພາຍນອກ, ເສີມຂະຫຍາຍທ່າແຮງຂອງແຕ່ລະວິສາຫະກິດ, ເພີ່ມທະວີການເຂົ້າຮ່ວມບັນດາລະບົບມູນຄ່າໃນພາກພື້ນ. ຕາມທ່ານລັດຖະມົນຕີ ເຈິ່ນຕ້ວນແອງ ແລ້ວ ຫວຽດນາມສະໜັບສະໜູນການສິ້ນສຸດ ກ່ຽວກັບການເຈລະຈາສັນຍານີ້ໃນປີ 2017 ໂດຍພື້ນຖານ. ເພື່ອຊຸກຍູ້ຄວາມຄືບໜ້າໃນການເຈລະຈາ, ບັນດາຄະນະເຈລະຈາ ຄວນສົ່ງເສີມການເຈລະຈາສອງຝ່າຍ ກ່ຽວກັບການເປີດປະຕູຕະຫຼາດໃຫ້ແທດຈິງ ເພື່ອບັນລຸໄດ້ບັນດາຄຳໝັ້ນສັນຍາເປີດປະຕູຕະຫຼາດທີ່ມີຄວາມໝາຍກ່ຽວກັບດ້ານການຄ້າ.

 (ແຫຼ່ງຄັດຈາກ VOV)