ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ
(ພາບປະກອບ)
ຕອນເຊົ້າວັນທີ 22 ຕຸລາ, ທີ່ຫໍປະຊຸມສະພາແຫ່ງຊາດ, ໄດ້ໄຂກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຊຸດທີ 14 ດ້ວຍການເຂົ້າຮ່ວມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຝູຈ້ອງ, ທ່ານນາງ ດັ້ງທິງອັກທິ້ງ, ຮັກສາການປະທານປະເທດ, ທ່ານນາຍົກລັດຖະມົນຕີ ຫງວຽນຊວນຟຸກ; ທ່ານນາງປະທານສະພາແຫ່ງຊາດ ຫງວຽນທິກິມເງິນ. ຕາມແຜນການຂອງກອງປະຊຸມແລ້ວ, ສະພາແຫ່ງຊາດຈະເຮັດວຽກໃນເວລາ 24 ມື້ ແລະ ອັດລົງໃນວັນທີ 21 ພະຈິກ.
ກ່າວຄຳເຫັນໄຂກອງປະຊຸມ, ທ່ານນາງ ປະທານສະພາແຫ່ງຊາດ ຫງວຽນທິກິມເງິນ ໄດ້ຊີ້ແຈ້ງວ່າ: “ໄປຄຽງຄູ່ກັບການພິຈາລະນາ, ຕີລາຄາໝາກຜົນຂອງການປະຕິບັດແຜນການພັດທະນາເສດຖະກິດ - ສັງຄົມ, ງົບປະມານແຫ່ງລັດປີ 2018, ຂໍ້ຕົກລົງແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດປີ 2019, ສະພາແຫ່ງຊາດຈະພິຈາລະນາ, ຕີລາຄາຮອບດ້ານການປະຕິບັດບັນດາມະຕິຂອງສະພາແຫ່ງຊາດກ່ຽວກັບແຜນການ 5 ປີ 2016 – 2020 ໃນເຄິ່ງອາຍຸການ, ຕີລາຄາ 3 ປີແຫ່ງການປະຕິບັດນະໂຍບາຍຕໍ່ເຂດຊົນເຜົ່າສ່ວນໜ້ອຍ ແລະ ເຂດພູດອຍ”. ທ່ານນາງປະທານສະພາແຫ່ງຊາດ ຫງວຽນທິກິມເງິນ ເນັ້ນໜັກວ່າ:
“ສະພາແຫ່ງຊາດຈະພິຈາລະນະ, ຮັບຮອງເອົາຮ່າງກົດໝາຍ 9 ສະບັບ ແລະ ມະຕິ 1 ສະບັບ, ພ້ອມນັ້ນ ໄດ້ປະກອບຄຳເຫັນໃສ່ຮ່າງກົດໝາຍ 6 ສະບັບອື່ນອີກເພື່ອແນໃສ່ສ້າງລະບົບກົດໝາຍກ່ຽວກັບລະບອບລະບຽບການເສດຖະກິດການຕະຫຼາດ ກຳນົດທິດສັງຄົມນິຍົມ, ໃຫ້ສົມບູນແບບຮັບປະກັນສິດທິມະນຸດ, ສິດທິພົນລະເມືອງ, ເບິ່ງແຍງດູແລສຸຂະພາບຂອງປະຊາຊົນ, ເພີ່ມທະວີວຽກງານຕໍ່ສູ້ປ້ອງກັນ, ຕ້ານການສໍ້ລາດບັງຫຼວງ, ຍູ້ແຮງການປະຕິຮູບຕຸລາການ, ປັບປຸງການປ້ອງກັນຊາດປ້ອງກັນຄວາມສະຫງົບ, ປ່ຽນໃໝ່ການສຶກສາ, ບຳລຸງສ້າງໂດຍພື້ນຖານ ແລະ ຮອບດ້ານ, ຕອບສະໜອງຄວາມຮຽກຮ້ອງຕ້ອງການໃນການຫັນເປັນອຸດສາຫະກຳ, ທັນສະໄໝ ແລະ ການເຊື່ອມໂຍງເຂົ້າກັບສາກົນ.”
ກໍ່ທີ່ກອງປະຊຸມຄັ້ງນີ້, ສະພາແຫ່ງຊາດຈະດຳເນີນການປ່ອນບັດໄວ້ວາງໃຈຕໍ່ບັນດາຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນ. ທ່ານນາງປະທານສະພາແຫ່ງຊາດ ໃຫ້ຮູ້ວ່າ:
“ສະພາແຫ່ງຊາດຈະດຳເນີນການເລືອກຕັ້ງປະທານປະເທດ; ພິຈາລະນາ, ໃຫ້ສັດຕະຍາບັນການໃຫ້ເລີກຕຳແໜ່ງ ແລະ ແຕ່ງຕັ້ງຕຳແໜ່ງລັດຖະມົນຕີກະຊວງຖະແຫຼງຂ່າວ ແລະ ສື່ສານ; ພ້ອມນັ້ນ, ປຶກສາຫາລື, ຕັດສິນບາງບັນຫາສຳຄັນອື່ນໆຕາມຂໍ້ກຳນົດຂອງລັດຖະທຳມະນູນ ແລະ ກົດໝາຍ. ເລື່ອງພິຈາລະນາ, ໃຫ້ສັດຕະຍາບັນສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP), ພ້ອມກັບເອກະສານກ່ຽວຂ້ອງຫຼາຍສະບັບແມ່ນເພື່ອສ້າງພື້ນຖານສຳຄັນສຳລັບ ຫວຽດນາມ ສືບຕໍ່ເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງ, ສ້າງກຳລັງໜູນໃໝ່ໃຫ້ແກ່ການພັດທະນາຂອງປະເທດຊາດ.”
ກ່ອນວາລະໄຂກອງປະຊຸມ, ການນຳພັກ, ລັດ ແລະ ບັນດາສະມາຊິກສະພາແຫ່ງຊາດ ໄດ້ໄປວາງພວງມາລາ ແລະ ເຂົ້າຄຳນັບສຸສານປະທານໂຮ່ຈີມິນ. ຈາກນັ້ນ, ສະພາແຫ່ງຊາດໄດ້ຈັດວາລະປະຊຸມກຽມ, ປຶກສາຫາລື, ຮັບຮອງເອົາແຜນການເຮັດວຽກຂອງກອງປະຊຸມສະໄໝສາມັນເທື່ອທີ 6.
(ແຫຼ່ງຄັດຈາກ VOV)
