ລັດຖະມົນຕີການຕ່າງປະເທດ 3 ປະເທດ ຍີ່ປຸ່ນ, ຈີນ ແລະ ສ. ເກົາຫຼີ
(ພາບປະກອບຈາກ AFP/TTXVN)
ວັນທີ 23/8, ບັນດາລັດຖະມົນຕີການຕ່າງປະເທດ ຍີ່ປຸ່ນ, ຈີນ ແລະ ສ. ເກົາຫຼີ ເລີ່ມເຂົ້າຮ່ວມກອງປະຊຸມເປັນເວລາ 2 ວັນຢູ່ນະຄອນຫຼວງ ໂຕກຽວ ປະເທດ ຍີ່ປຸ່ນ ໃນສະພາບການມີບັນດາຄວາມບໍ່ລົງລອຍກັນກ່ຽວຂ້ອງເຖິງການຂັດແຍ້ງຜືນແຜ່ນດິນ, ລະບົບສະກັດກັ້ນລູກສອນໄຟຂອງ ອາເມລິກາ ແລະ ບັນຫານິວເຄຼຍຂອງ ສປປ ເກົາຫຼີ. ການພົບປະລະຫວ່າງລັດຖະມົນຕີການຕ່າງປະເທດ ຍີ່ປຸ່ນ ທ່ານ Fumio Kishida, ຄູ່ຕຳແໜ່ງຂອງ ຈີນ ວາງອີ ແລະ ຂອງ ສ. ເກົາຫຼີ ທ່ານ Yun Byung – Se ຄັ້ງນີ້ແມ່ນການພົບປະຄັ້ງທຳອິດລະຫວ່າງລັດຖະມົນຕີການຕ່າງປະເທດ 3 ປະເທດບ້ານໃກ້ເຮືອນຄຽງ ອາຊີຕາເວັນອອກສ່ຽງເໜືອ ນັບແຕ່ເດືອນ 3/2015 ແລະ ເປັນການພົບປະຄັ້ງທີ 8 ນັບແຕ່ໄດ້ສ້າງຕັ້ງກົນໄກ 3 ຝ່າຍນີ້. ນີ້ກໍ່ເປັນຄັ້ງທຳອິດທີ່ກອງປະຊຸມລັດຖະມົນຕີການຕ່າງປະເທດ 3 ຝ່າຍຖືກດຳເນີນໄປຢູ່ ໂຕກຽວ ໃນຮອບເວລາ 5 ປີຜ່ານມາ. ຕາມແຜນການແລ້ວ, ບັນດາລັດຖະມົນຕີການຕ່າງປະເທດ ຈະປຶກສາຫາລືວິທີການຮັກສາການຮ່ວມມື 3 ຝ່າຍ ແລະ ຊຸກຍູ້ວິວັດທະນາການເຊື່ອມໂຍງເຂົ້າກັບເຂດ ອາຊີຕາເວັນອອກ. ການພົບປະກໍ່ເພື່ອແນໃສ່ກະກຽມເນື້ອໃນໃຫ້ແກ່ກອງປະຊຸມສຸດຍອດ 3 ຝ່າຍ, ຄາດວ່າຈະດຳເນີນໄປຢູ່ນອກກອງປະຊຸມສຸດຍອດກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນຂຶ້ນໃຫຍ່ກ່ວາໝູ່ໃນໂລກ (G20) ຢູ່ຈີນ ໃນເດືອນ 9 ຈະມາເຖິງ.
(ພາບປະກອບຈາກ AFP/TTXVN)
(ແຫຼ່ງຄັດຈາກ VOV)
