ຕອນເຊົ້າວັນທີ 01 ທັນວາ, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຝູຈ້ອງ ໄດ້ຕ້ອນຮັບທ່ານນາງປະທານສະພາແຫ່ງຊາດແຫ່ງລາຊະອານາຈັກ ກຳປູເຈຍ Khuon Sudary.
ທີ່ການຕ້ອນຮັບ, ທ່ານເລຂາທິການໃຫຍ່ຢືນຢັນວ່າ, ຍາມໃດ ຫວຽດນາມ ກໍ່ສະໜັບສະໜູນພາລະກິດແຫ່ງການສ້າງສາ ແລະ ພັດທະນາຂອງປະເທດກຳປູເຈຍ ແລະ ຕີລາຄາສູງການພົວພັນຮ່ວມມືລະຫວ່າງ ຫວຽດນາມ ແລະ ກຳປູເຈຍ ໃນທຸກຊ່ອງທາງ, ທຸກຂົງເຂດ.
ທ່ານເລຂາທິການໃຫຍ່ສະເໜີໃຫ້ 2 ຝ່າຍຜັນຂະຫຍາຍເນື້ອໃນການພົບປະລະຫວ່າງການນຳຂັ້ນສູງ 2 ປະເທດໃຫ້ບັນລຸປະສິດທິຜົນ, ກໍຄືການພົບປະລະຫວ່າງການນຳ 3 ປະເທດ ຫວຽດນາມ - ກຳປູເຈຍ - ລາວ ໃນທຸກຂົງເຂດ, ໃນນັ້ນທ່ານໄດ້ເນັ້ນໜັກເຖິງເລື່ອງ ສະພາແຫ່ງຊາດ 2 ປະເທດເພີ່ມທະວີການຮ່ວມມື, ແບ່ງປັນຂໍ້ມູນ, ບົດຮຽນກ່ຽວກັບການສ້າງກົດໝາຍ, ສົມທົບກັນຕິດຕາມການຜັນຂະຫຍາຍບັນດາສົນທິສັນຍາ, ສັນຍາ, ຂໍ້ຕົກລົງເຊິ່ງ 2 ປະເທດໄດ້ລົງນາມ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ລະຫວ່າງລັດຖະສະພາສາກົນ.
ສ່ວນທ່ານນາງປະທານສະພາແຫ່ງຊາດ Khuon Sudary ໄດ້ຂອບໃຈຢ່າງຈິງໃຈຕໍ່ການສະໜັບສະໜູນ, ການຊ່ວຍເຫຼືອອັນຍິ່ງໃຫຍ່, ລ້ຳຄ່າເຊິ່ງ ຫວຽດນາມ ທີ່ໄດ້ສະຫງວນໃຫ້ແກ່ ກຳປູເຈຍ ນັບແຕ່ກ່ອນມາຮອດປະຈຸບັນ, ທ່ານນາງຢືນຢັນວ່າ ກຳປູເຈຍ ຈະພ້ອມກັບ ຫວຽດນາມ ປົກປັກຮັກສາ, ເພີ່ມພູນຄູນສ້າງໃຫ້ແກ່ສາຍພົວພັນລະຫວ່າງ 2 ປະເທດໃຫ້ນັບມື້ນັບພັດທະນາຂຶ້ນສູ່ລະດັບສູງໃໝ່ ແລະ ສືບທອດໃຫ້ລຸ້ນຕໍ່ໆໄປ.
