(ພາບບະກອບ / REUTERS)
ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 8 ໂມງ 00 ນາທີ ໃນວັນທີ 18 ເມສາ, ຍອດຈຳນວນຜູ້ຕິດເຊື້ອໄວຣັດ SARS-CoV-2 ໃນທົ່ວໂລກແມ່ນກ່ວາ 2.250.000 ຄົນ, ໃນນັ້ນ ມີ 154.241 ຄົນເສຍຊີວິດ. ປັດຈຸບັນ, ໂລກລະບາດໄດ້ແຜ່ລະບາດອອກສູ່ 210 ປະເທດ ແລະ ເຂດແຄວ້ນ. ຈຳນວນຜູ້ປົວຫາຍດີເປັນປົກກະຕິແມ່ນ 571.577 ຄົນ. ອາເມລິກາ ຍັງແມ່ນຈຸດໃຈກາງໂລກລະບາດຂອງໂລກ ດ້ວຍຈຳນວນຜູ້ຕິດເຊື້ອເກືອບ 710.000 ຄົນ ແລະ ມີຜູ້ເສຍຊີວິດກ່ວາ 37.000 ຄົນ. ຖັດຈາກ ອາເມລິກາ ແມ່ນ ແອັດສະປາຍ ດ້ວຍຈຳນວນຜູ້ຕິດເຊື້ອເກືອບ 191.000 ຄົນ ແລະ ຜູ້ເສຍຊີວິດກ່ວາ 20.000 ຄົນ, ອີຕາລີ ມີຜູ້ຕິດເຊື້ອເກືອບ 172.500 ຄົນ ແລະ ມີຜູ້ເສຍຊີວິດກ່ວາ 22.700 ຄົນ, ຝຣັ່ງ ມີຜູ້ຕິດເຊື້ອ 148.000 ຄົນ ແລະ ມີຜູ້ເສຍຊີວິດເກືອບ 18.700 ຄົນ ແລະ ເຢຍລະມັນ ມີຜູ້ຕິດເຊື້ອເກືອບ 141.400 ຄົນ ແລະ ມີຜູ້ເສຍຊີວິດແມ່ນ 4.300 ຄົນ.
ອົງການອະນາໄມໂລກ (WHO) ໄດ້ກ່າວເຕືອນກ່ຽວກັບການຜັນແປຢ່າງວ່ອງໄວຂອງໂລກລະບາດໂຄວິດ-19 ຢູ່ ອາຟຣີກາ. ທ່ານ Tedros Adhanom Ghebreyesus ຜູ້ອຳນວຍການໃຫຍ່ WHO ຊີ້ແຈ້ງວ່າ ໃນອາທິດຜ່ານມາ, ອາຟຣີກາ ໄດ້ຢັ້ງຢືນວ່າ ຜູ້ຕິດເຊື້ອໃໝ່ໄດ້ເພີ່ມຂຶ້ນ 50% ແລະ ຈຳນວນຜູ້ເສຍຊີວິດກໍ່ເພີ່ມຂຶ້ນ 60%.ໄລ່ຮອດວັນທີ 17 ເມສາ, ອິນໂດເນເຊຍ ມີຜູ້ຕິດເຊື້ອໂຄວິດ-19 5.923 ຄົນ, ໃນນັ້ນມີຜູ້ເສຍຊີວິດ 520 ຄົນ ລື່ນກາຍປະເທດ ຟີລິບປີນ ແລະ ກາຍເປັນປະເທດມີຜູ້ຕິດເຊື້ອໂຄວິດ-19 ຫລາຍສຸດ ອາຊຽນ.
(ແຫຼ່ງຄັດຈາກ VOV)
