ຊາວ ຫວຽດນາມຢູ່ ຝລັ່ງໄປນະມັດສະການຍາມຕົ້ນປີ
ໄປນະມັດສະການຍາມຕົ້ນປີ ໄດ້ກາຍເປັນການເຄື່ອນໄຫວທາງຈິດວີນຍານຂອງຊາວ ຫວຽດນາມ ຢູ່ ຝລັ່ງ, ເພື່ອຮັກສາບັນດາຄຸນຄ່າທີ່ເປັນມູນເຊື້ອ ແລະ ສີສັນວັດທະນະທຳຂອງຊາດ. ໃນມື້ທຳອິດຂອງບຸນເຕັດ, ພະນັກງານ, ພາລະກອນສະຖານທູດ ຫວຽດນາມ ພ້ອມກັບພະນັກງານບັນດາອົງການຕາງໜ້າ ຫວຽດນາມ ປະຈຳ ຝລັ່ງໄດ້ຈູດທູບທຽນຢູ່ແທ່ນບູຊາປະທານ ໂຮ່ຈີມິນ ໃນບໍລິເວນສະຖານທູດ. ຫຼັງຈາກນັ້ນບັນດາພະນັກງານ ສະຖານທູດ ແລະ ບັນດາອົງການຕາງໜ້າພ້ອມກັນໄປວັດ ຄວງຫວຽດ ແລະ ຈຸກເລິມທ່ຽນວ້ຽນ ເພື່ອທຳພິທີບູຊາພາວະນາຂໍໃຫ້ປີໃໝ່ມີຄວາມຢູ່ເຢັນເປັນສຸກ, ມີສຸຂະພາບເຂັ້ມແຂງ ແລະ ປະສົບຜົນສຳເລັດ. ພະມາຫາອາຈານ ທິກເຟືອກເດື່ອງ ຢູ່ວັດ ຈຸກເລິມທ່ຽນວ້ຽນ ໄດ້ຝາກຄຳອວຍພອນປີໃໝ່ເຖິງພຸດທະສາສະນິກະຊົນທຸກຄົນທັງຢູ່ຕ່າງປະເທດ ແລະ ຢູ່ພາຍໃນປະເທດ:
“ຂໍອວຍພອນໃຫ້ພຸດທະສາສະນິກະຊົນທຸກຄົນທັງຢູ່ພາຍໃນ ແລະ ຕ່າງປະເທດ ມີຄວາມວັດທະນາຖາວອນ, ມີວຽກເຮັດງານທຳໄດ້ດີກວ່າປີເກົ່າ, ແລະຂໍໃຫ້ດິນຟ້າອາກາດເອື້ອອຳນວຍຄວາມສະດວກ, ທຸກຄົນມີສຸຂະພາບເຂັ້ມແຂງ, ມີຄວາມຢູ່ເຢັນເປັນສຸກ, ປາດຖະໜາສິ່ງໃດ ຂໍໃຫ້ໄດ້ສິ່ງນັ້ນ“.
(ແຫຼ່ງຄັດຈາກ VOV)
