ກ່ອນໜ້ານັ້ນ, ຕອນເຊົ້າວັນທີ 25 ພະຈິກ, ທ່ານນາຍົກລັດຖະມົນຕີ ຟ້າມມິງຈິງ ໄດ້ເຂົ້າຮ່ວມກອງປະຊຸມສົ່ງເສີມການລົງທຶນ ຫວຽດນາມ - ຍີ່ປຸ່ນ ດ້ວຍຫົວຂໍ້ “ຫວຽດນາມ - ຍີ່ປຸ່ນ ຍົກລະດັບການພົວພັນ, ຮ່ວມມື ພ້ອມກັນພັດທະນາ”.
ນະທີ່ນີ້, ທ່ານນາຍົກລັດຖະມົນຕີ ຟ້າມມິງຈິງ ໄດ້ສະແດງຄວາມຂອບອົກຂອບໃຈຕໍ່ວິສາຫະກິດ ຍີ່ປຸ່ນ ທີ່ໄດ້ແບ່ງປັນຄວາມຫຍຸ້ງຍາກ ແລະ ປະກອບສ່ວນພ້ອມກັບ ຫວຽດນາມ ໃນບັ້ນປ້ອງກັນ, ຕ້ານໂລກລະບາດ ໂຄວິດ - 19. ທ່ານນາຍົກລັດຖະມົນຕີ ຟ້າມມິງຈິງ ໃຫ້ຮູ້ວ່າ: ຫວຽດນາມ ມີຈຸດພົ້ນເດັ່ນຫຼາຍຢ່າງໃຫ້ນັກລົງທຶນ ຍີ່ປຸ່ນ ອຸ່ນອ່ຽນໃຈລົງທຶນດ້ວຍຂອບຂະໜາດໃຫຍ່ ແລະ ຍາວນານກວ່າ, ທ່ານນາຍົກລັດຖະມົນຕີ ຢັ້ງຢືນວ່າ:“ພວກຂ້າພະເຈົ້າຮັບປະກັນກ່ຽວກັບແຜນນະໂຍບາຍ, ນະໂຍບາຍ, ລະບອບລະບຽບການ ແລະ ໃນຕົວຈິງ, ພວກຂ້າພະເຈົ້າກໍພວມດຳເນີນວຽກງານນີ້ຢ່າງມີປະສິດທິຜົນ. ນອກຈາກນັ້ນ, ພວກຂ້າພະເຈົ້າກໍພວມປະຕິບັດ 3 ບຸກທະລຸຍຸດທະສາດ. ທີໜຶ່ງແມ່ນ ສ້າງລະບອບລະບຽບການໃຫ້ສຳເລັດເທື່ອລະກ້າວ ເພື່ອຮັບໃຊ້ການເຊື່ອມໂຍງຢ່າງເລິກເຊິ່ງກວ້າງຂວາງ ແລະ ບັນລຸມາດຖານສາກົນ. ທີສອງແມ່ນ ບໍາລຸງສ້າງແຫຼ່ງຊັບພະຍາກອນມະນຸດ ແລະ ປະຕິຮູບລະບຽບການບໍລິຫານໃຫ້ກະທັດຣັດ, ຫຼຸດຜ່ອນລາຍຈ່າຍສົ້ນເຂົ້າຂອງວິສາຫະກິດ ແລະ ນັກລົງທຶນ. ທີສາມແມ່ນ ບຸກທະລຸກ່ຽວກັບພື້ນຖານໂຄງລ່າງ.”
ໃນກອງປະຊຸມສົ່ງເສີມການລົງທຶນ ຫວຽດນາມ - ຍີ່ປຸ່ນ, ທ່ານນາຍົກລັດຖະມົນຕີ ຟ້າມມິງຈິງ ກໍໄດ້ເຂົ້າຮ່ວມພິທີມອບຂໍ້ຕົກລົງວ່າດ້ວຍການຮ່ວມມື 40 ສະບັບ ໃນຫຼາຍຂົງເຂດທີ່ແຕກຕ່າງກັນລະຫວ່າງກະຊວງ, ຂະແໜງການ, ທ້ອງຖິ່ນ, ວິສາຫະກິດ ລະຫວ່າງສອງປະເທດ ຫວຽດນາມ - ຍີ່ປຸ່ນ.
ໃນວັນດຽວກັນ, ທ່ານນາຍົກລັດຖະມົນຕີ ຟ້າມມິງຈິງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ຍີ່ປຸ່ນ Suga Yoshihide, ໃຫ້ການຕ້ອນຮັບການນຳກຸ່ມບໍລິສັດ ຍີ່ປຸ່ນ ຈຳນວນໜຶ່ງ, ຕ້ອນຮັບປະທານຄະນະກຳມະການເສດຖະກິດ ຫວຽດນາມ - ຍີ່ປຸ່ນ; ປະທານອົງການສົ່ງເສີມການຄ້າ ຍີ່ປຸ່ນ ແລະ ອື່ນໆ.
(ແຫຼ່ງຄັດຈາກ VOV)
