ຢູ່ກອງປະຊຸມ, ບັນດາປະເທດເຫັນດີເປັນເອກະພາບດ້ວຍເກືອບ 20 ຂໍ້ສະເໜີການເຄື່ອນໄຫວໃໝ່ໃຫ້ປີກາງໄລຍະ 2021 – 2022, ຂຶ້ນກັບບັນດາຂົງເຂດຄືການຕ້ານລັດທິການກໍ່ການຮ້າຍ ແລະ ອາດຊະຍາກຳຂ້າມຊາດ, ຄວາມໝັ້ນຄົງທາງທະເລ, ຄວາມໝັ້ນຄົງທາງເຄືອຂ່າຍອິນເຕີແນັດ, ຕ້ານການແຜ່ຂະຫຍາຍອາວຸດນິວເຄຼຍ ແລະ ຫຼຸດຜ່ອນກຳລັງທັບ, ການຮ່ວມມືດ້ານປ້ອງກັນຊາດ ແລະ ຮັກສາສັນຕິພາບ. ເຊີດຊູເປົ້າໝາຍຮັກສາສັນຕິພາບ, ວັດທະນາຖາວອນ ແລະ ພັດທະນາຢູ່ພາກພື້ນ, ຜູ້ຕາງໜ້າບັນດາປະເທດເຂົ້າຮ່ວມກອງປະຊຸມຢັ້ງຢືນວ່າ ຕ້ອງບຸລິມະສິດຮ່ວມມື ເຂົ້າໃນການປ້ອງກັນ, ຕ້ານ ແລະ ຟື້ນຟູພາຍຫຼັງໂລກລະບາດໂຄວິດ - 19.
ກ່ຽວກັບສະພາບການທະເລຕາເວັນອອກ, ບັນດາຜູ້ແທນໄດ້ເນັ້ນໜັ້ກເຖິງບັນດາຫຼັກການລະງັບໃຈ, ແກ້ໄຂການຂັດແຍ້ງກັນໂດຍສັນຕິວີທີ, ເຄົາລົບກົດໝາຍສາກົນ ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982). ບັນດາປະເທດຮຽກຮ້ອງວ່າ ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ຕ້ອງໄດ້ຮັບການສ້າງຕັ້ງຢ່າງແທດຈິງ, ມີຜົນສັກສິດ, ປະສິດທິຜົນ, ສອດຄ່ອງກັບກົດໝາຍສາກົນ, UINCLOS 1982. ກອງປະຊຸມຢັ້ງຢືນສະໜັບສະໜູນ ອາຊຽນ ຜັນຂະຫຍາຍ ຄວາມເຫັນດີ 5 ຈຸດຂອງການນຳຂັ້ນສູງຢູ່ ກອງປະຊຸມຂັ້ນສູງພິດເສດ ເດືອນເມສາ 2021 ຢູ່ ຈາກາຕາ, ປະເທດ ອິນໂດເນເຊຍ ເພື່ອນຳສະພາບການມຽນມາກັບຄືນສູ່ສະພາບປົກກະຕິໂດຍໄວ ຕາມຄວາມມຸ່ງຫວັງ ແລະ ຜົນປະໂຫຍດຂອງປະຊາຊົນ.
(ແຫຼ່ງຄັດຈາກ VOV)
