ທ່ານປະທານາທິບໍດີສ.ເກົາຫຼີ Moon Jae in
(ພາບປະກອບ: TTXVN)
ກອງປະຊຸມສຸດຍອດອາຊຽນ - ສ.ເກົາຫຼີ, ພວມດຳເນີນໄປຢູ່ນະຄອນທ່າກ່ຳປັ່ນ Busan, ສ.ເກົາຫຼີ, ແມ່ນເຫດການການຕ່າງປະເທດໃຫຍ່ ແລະ ແມ່ນສ່ວນໜຶ່ງຂອງ “ນະໂຍບາຍມຸ່ງໄປສູ່ທິດໃຕ້ໃໝ່” ຂອງສ.ເກົາຫຼີ, ໃນນັ້ນອາຊຽນ ແມ່ນບັນຫາຈຸດສຸມ. ກອງປະຊຸມປີນີ້ເປັນຂີດໝາຍໄລຍະທາງຮ່ວມມືຄົບຮອບ 30 ປີລະຫວ່າງອາຊຽນ ແລະ ສ.ເກົາຫຼີ, ແມ່ນໂອກາດເພື່ອນຳການພົວພັນລະຫວ່າງ 2 ຝ່າຍໃຫ້ຂຶ້ນສູ່ລະດັບສູງໃໝ່, ສ້າງວິໄສທັດໃຫ້ແກ່ໄລຍະ 30 ປີຕໍ່ໄປ.
ເຫດການໄດ້ເຕົ້າໂຮມບັນດາຜູ້ນຳ ແລະ ເຈົ້າໜ້າທີ່ລັດຖະບານຂອງ 10 ປະເທດອາຊຽນ ລວມມີ: ອິນໂດເນເຊຍ, ຟີລິບປິນ, ສິງກະໂປ, ມາເລເຊຍ, ກຳປູເຈຍ, ບຣຸໄນ, ໄທ, ມຽນມາ, ລາວ ແລະ ຫວຽດນາມ. ກອງປະຊຸມສຸດຍອດຄັ້ງນີ້ແມ່ນການຕີລາຄາຄືນບັນດາຜົນງານໃນການຮ່ວມມືທີ່ບັນລຸໄດ້ລະຫວ່າງ 2 ຝ່າຍໃນຮອບເວລາ 30 ປີຜ່ານມາ ແລະ ຍົກອອກທິດທາງຮ່ວມມືໃໝ່ໃນໄລຍະ 30 ປີຈະມາເຖິງ.ຈາກຄູ່ຮ່ວມມືກາຍເປັນຄູ່ຮ່ວມມືຍຸດທະສາດ
ການພົວພັນຄູ່ຮ່ວມມືສ.ເກົາຫຼີ - ອາຊຽນ ໄດ້ຮັບການສ້າງຕັ້ງນັບແຕ່ປີ 1989 ແລະ ປະຈຸບັນໄດ້ກາຍເປັນການພົວພັນຄູ່ຮ່ວມມືຍຸດທະສາດ. ຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນແລະກັນ ໄດ້ຊ່ວຍໃຫ້ 2 ຝ່າຍຊອກຫາໄດ້ສຽງເວົ້າລວມໃນຫຼາຍບັນຫາ.
ການພົວພັນລະຫວ່າງອາຊຽນ - ສ.ເກົາຫຼີ ໄດ້ຮັບການສ້າງຕັ້ງຂຶ້ນບົນພື້ນຖານການຮ່ວມມືອັນຍາວນານ, ພິເສດນັບແຕ່ປີ 2010, ເມື່ອ 2 ຝ່າຍໄດ້ຍົກການພົວພັນໃຫ້ຂຶ້ນສູ່ລະດັບຄູ່ຮ່ວມມືຍຸດທະສາດ: ສ້າງຄວາມໄວ້ເນື້ອເຊື່ອໃຈ, ສ້າງຄວາມຜາສຸກ “ມຸ່ງໄປສູ່ທິດໃຕ້ໃໝ່” ໂດຍທ່ານປະທານາທິບໍດີສ.ເກົາຫຼີ Moon Jae in ຍົກອອກມາເມື່ອປີ 2017 ພາຍຫຼັງຂຶ້ນກຳອຳນາດ. ໃນໄລຍະ 2 ປີແຫ່ງການປະຕິບັດນະໂຍບາຍດັ່ງກ່າວ, ການພົວພັນລະຫວ່າງອາຊຽນ ແລະ ສ.ເກົາຫຼີ ເວົ້າລວມ ກໍຄືລະຫວ່າງສ.ເກົາຫຼີ ກັບແຕ່ລະປະເທດສະມາຊິກອາຊຽນ ເວົ້າສະເພາະ, ໄດ້ມີບັນດາບາດກ້າວພັດທະນາຢ່າງແຮງໃນຫຼາຍຂົງເຂດ. ກ່ຽວກັບການພົວພັນດ້ານການທູດ, ທ່ານ Moon Jae in ດຳລົງຕຳແໜ່ງເປັນປະທານາທິບໍດີສ.ເກົາຫຼີ ຜູ້ທຳອິດຢ້ຽມຢາມທັງໝົດ 10 ປະເທດອາຊຽນ ໃນອາຍຸການຂອງຕົນ. ໃນຂົງເຂດເສດຖະກິດ - ການຄ້າ, ປະຈຸບັນສ.ເກົາຫຼີ ສືບຕໍ່ແມ່ນຄູ່ຮ່ວມມືດ້ານການຄ້າ ແລະ ນັກລົງທຶນໂດຍກົງໃຫຍ່ຢືນອັນດັບທີ 5 ຂອງອາຊຽນ. ການແລກປ່ຽນດ້ານການຄ້າໄດ້ເພີ່ມຂຶ້ນປະມານ 20 ເທົ່າ ເມື່ອທຽບໃສ່ 30 ປີກ່ອນ. ຄວາມຄ້າຍຄືກັນ, ການເຊື່ອມຕໍ່ຈາກວັດທະນະທຳ, ສິລະປະດົນຕີ ຕະຫຼອດຮອດອາຫານການກິນ… ພວມປະກອບສ່ວນນຳການພົວພັນລະຫວ່າງ 2 ຝ່າຍໃຫ້ພັດທະນາຢ່າງວ່ອງໄວ.
ໃນຂະນະນັ້ນ, ບັນດາປະເທດອາຊຽນ ກໍ່ຕັ້ງໜ້າຮັບ “ນະໂຍບາຍມຸ່ງໄປສູ່ທິດໃຕ້ໃໝ່” ຂອງສ.ເກົາຫຼີ, ເຮັດໃຫ້ສ.ເກົາຫຼີ ກາຍເປັນໜຶ່ງໃນບັນດາຄູ່ຮ່ວມມືທີ່ໃກ້ຊິດ ແລະ ມີຄວາມສຳຄັນແຖວໜ້າຂອງອາຊຽນ. ສ.ເກົາຫຼີ ໄດ້ເຂົ້າຮ່ວມເກືອບທັງໝົດກົນໄກໂດຍອາຊຽນ ສ້າງຕັ້ງ ແລະ ນຳພາຄື: ກອງປະຊຸມຂັ້ນສູງອາຊີຕາເວັນອອກ (EAS), ເວທີປາໄສຄວາມໝັ້ນຄົງຢູ່ພາກພື້ນ (ARF), ອາຊຽນ +3. 2 ຝ່າຍກໍ່ມີບັນດາບາດກ້າວສະໜັບສະໜູນເຊິ່ງກັນ ແລະ ກັນໃນບັນດາບັນຫາສາກົນ, ຮ່ວມມືກັນຢ່າງແໜ້ນແຟ້ນໃນບັນດາບັນຫາພາກພື້ນ ແລະ ທົ່ວໂລກ, ຄືການພັດທະນາແບບຍືນຍົງ, ການຕ້ານການປ່ຽນແປງຂອງດິນຟ້າອາກາດ, ບໍ່ແຜ່ຂະຫຍາຍອາວຸດລ້າງຜານ. ອາຊຽນ ແລະ ສ.ເກົາຫຼີ ໄດ້ແບ່ງປັນຫຼັກໝັ້ນກ່ຽວກັບບັນດາບັນຫາມີລັກສະນະຫຼັກການຄື ແກ້ໄຂການຂັດແຍ້ງກັນໂດຍສັນຕິວິທີ, ເຄົາລົບກົດໝາຍສາກົນ ແລະ ການປົກປັກຮັກສາຄວາມເສລີໃນການເດີນທະເລ ແລະ ການບິນຢູ່ພາກພື້ນອາຊີ - ປາຊີຟິກ.
ປະຕິບັດການຫັນ “ປະຊາຄົມອາຊຽນ - ສ.ເກົາຫຼີ ພ້ອມກັນພັດທະນາ” ໃຫ້ປະກົດຜົນເປັນຈິງ
ໃນສະພາບການໂລກພວມປະເຊີນໜ້າກັບຫຼາຍບັນຫາ, ໃນນັ້ນມີສົງຄາມການຄ້າລະຫວ່າງຈີນ ແລະ ອາເມລິກາ ຍັງບໍ່ທັງຢຸດຕິເທື່ອນັ້ນ, ສ.ເກົາຫຼີ ຄວນມີບັນດາຄູ່ຮ່ວມມືໃໝ່ເພື່ອແນໃສ່ຫຼຸດຜ່ອນການອີງໃສ່ເຂົ້າບັນດາຄູ່ຮ່ວມມືທີ່ເປັນມູນເຊື້ອ, ຊ່ວຍເພີ່ມທະວີການສົ່ງຜົນກະທົບຢູ່ພາກພື້ນທີ່ກວ້າງໃຫຍ່ ແລະ ອາຊຽນ, ແມ່ນອົງການຈັດຕັ້ງທີ່ມີທີ່ຕັ້ງ ແລະ ບົດບາດນັບມື້ນັບເພີ່ມຂຶ້ນ, ພົ້ນເດັ່ນຂຶ້ນກາຍເປັນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ.
ປະຈຸບັນ, ອາຊຽນ ພວມມານະພະຍາຍາມຜັນຂະຫຍາຍການປະຕິບັດວິໄສທັດອາຊຽນ 2025. ປີ 2020, ຈຸດສຸມຂອງອາຊຽນ ແມ່ນຄວາມສາມັກຄີ, ຊຸກຍູ້ການຮ່ວມສຳພັນ ແລະ ການເຊື່ອມຈອດພາກພື້ນ, ຍົກສູງກຳລັງຄວາມສາມາດຮັບມື ແລະ ຍາດແຍ່ງບັນດາກາລະໂອກາດຂອງການປະຕິວັດອຸດສາຫະກຳຄັ້ງທີ 4, ຍູ້ແຮງການພົວພັນແລກປ່ຽນວັດທະນະທຳ ແລະ ປະຊາຊົນ, ໃນນັ້ນເພີ່ມທະວີການຮ່ວມສຳພັນເສດຖະກິດພາຍໃນກຸ່ນ, ຍົກລະດັບການພົວພັນລະຫວ່າງອາຊຽນ ແລະ ບັນດາປະເທດຄູ່ຮ່ວມມື, ໃນນັ້ນມີສ.ເກົາຫຼີ. ຫຼັກໝັ້ນສະເໝີຕົ້ນສະເໝີປາຍຂອງອາຊຽນ ແມ່ນສະໜັບສະໜູນການປອດນິວເຄຼຍໃນແຫຼມເກົາຫຼີຢ່າງສິ້ນເຊິງ, ຮຽກຮ້ອງໃຫ້ບັນດາຝ່າຍຮັກສາທ່າເຈລະຈາ, ປະຕິບັດບັນດາຂໍ້ຕົກລົງທີ່ບັນລຸໄດ້ແລ້ວຢ່າງຄົບຖ້ວນ, ມຸ່ງໄປເຖິງການຮັກສາສັນຕິພາບອັນໝັ້ນຄົງຍາວນານໃນແຫຼມເກົາຫຼີ. ເພາະສະນັ້ນ, ຄວາມໝັ້ນຄົງຢູ່ພາກພື້ນ ແລະ ສາກົນແມ່ນເນື້ອໃນມີຄວາມສຳຄັນໃນການພົວພັນລະຫວ່າງອາຊຽນ - ສ.ເກົາຫຼີ, ໃນນັ້ນບັນດາປະເທດລ້ວນແຕ່ເນັ້ນໜັກເຖິງເລື່ອງຕ້ອງຮັກສາສັນທິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມືຂອງພາກພື້ນ ແລະ ສາກົນ.
ບົນພື້ນການພົວພັນອັນດີງາມເປັນເວລາ 30 ປີຜ່ານມາ, ກອງປະຊຸມສຸດຍອດພິເສດອາຊຽນ - ສ.ເກົາຫຼີ ໃນຄັ້ງນີ້ແມ່ນຂີດໝາຍໃໝ່, ກຳນົດທິດໃຫ້ແກ່ວິໄສທັດຂອງການພົວພັນລະຫວ່າງອາຊຽນ - ສ.ເກົາຫຼີ ໃນໄລຍະ 30 ປີຕໍ່ໄປ. ພ້ອມທັງ, ນີ້ແມ່ນໂອກາດເພື່ອສົ່ງເສີມ ແລະ ສ້າງແຫຼ່ງບັນດານໃຈໃຫ້ປະຊາຊົນ, ວິສາຫະກິດ, ລັດຖະບານບັນດາປະເທດອາຊຽນ, ສ.ເກົາຫຼີ, ມີກຳລັງໜູນຕື່ມອີກເພື່ອປະຕິບັດເປົ້າໝາຍ “ປະຊາຄົມອາຊຽນ - ສ.ເກົາຫຼີ ພ້ອມກັນພັດທະນາ, ມີຄວາມວັດທະນາຖາວອນ ແລະ ສັນຕິພາບໃຫ້ແກ່ປະຊາຊົນ”.
(ແຫຼ່ງຄັດຈາກ VOV)
