ຂ່າວສານ

ກອງປະຊຸມສຳມະນາຢູ່ສ.ເກົາຫຼີ ກ່ຽວກັບສະພາບການຢູ່ທະເລຕາເວັນອອກພາຍຫຼັງຄຳຕັດສິນຂອງສານອະນຸຍາໂຕຕຸລາການ

01/12/2016

ກອງປະຊຸມສຳມະນາກ່ຽວກັບສະພາບການຢູ່ທະເລຕາເວັນອອກພາຍຫຼັງຄຳຕັດສິນຂອງສານອະນຸຍາໂຕຕຸລາການ ຢູ່ສ.ເກົາຫຼີ
(ພາບ: Phạm Duy/Vietnam+)

ວັນທີ 29/11, ຢູ່ນະຄອນ Gwangju, ສູນກາງເສດຖະກິດ - ວັດທະນະທຳ ຢູ່ເຂດຕາເວັນຕົກພາກໃຕ້ ສ. ເກົາຫຼີ, ສະມາຄົມນັກຄົ້ນຄ້ວາ ຫວຽດນາມ ວິທະຍາ ພວມຮ່ຳຮຽນຢູ່ ສ. ເກົາຫຼີ ໄດ້ສົມທົບກັບສະຖາບັນຄົ້ນຄ້ວາວັດທະນະທຳສາກົນຂຶ້ນກັບມະຫາວິທະຍາໄລ Chosun, ຈັດຕັ້ງກອງປະຊຸມສຳມະນາວິທະຍາສາດດ້ວຍຫົວຂໍ້ວ່າ “ສະພາບການ ແລະ ແງ່ຫວັງແກ້ໄຂການຂັດແຍ້ງກັນຢູ່ທະເລຕາເວັນອອກ ພາຍຫຼັງຄຳຕັດສິນຂອງສານອະນຸຍາໂຕຕຸລາການ ໃນກໍລະນີຮ້ອງຟ້ອງຂອງ ຟີລິບປິນ”. ເຂົ້າຮ່ວມກອງປະຊຸມສຳມະນາມີຜູ້ແທນ 70 ຄົນເຊິ່ງແມ່ນບັນດານັກຊ່ຽວຊານ, ນັກຮຽນຮູ້, ນັກຄົ້ນຄ້ວາຂອງ ສ. ເກົາຫຼີ ແລະ ຫວຽດນາມ, ພ້ອມກັບນັກສຶກສາ ແລະ ປະຊາຊົນປະຈຳຖິ່ນ. ທີ່ກອງປະຊຸມສຳມະນາ, ບັນດານັກຮຽນຮູ້ໄດ້ສຸມໃສ່ໄຈ້ແຍກກ່ຽວກັບສະພາບການຢູ່ທະເລຕາເວັນອອກພາຍຫຼັງຄຳຕັດສິນໃນວັນທີ 12/7/2016 ຂອງສານອະນຸຍາໂຕຕຸລາການ ຢູ່ລາໄຮ (ປະເທດ ໂຮນລັງ) ກ່ຽວກັບກໍລະນີ ຟີລິບປິນ ຮ້ອງຟ້ອງ ຈີນ ໃນບັນຫາທະເລຕາເວັນອອກ. ບັນດານັກຮຽນຮູ້ຖືວ່າ: ຄຳຕັດສິນຂອງສານອະນຸຍາໂຕ ແມ່ນເຫດການມີຄວາມໝາຍສຳຄັນ, ເປີດກາລະໂອກາດໃໝ່ເພື່ອແກ້ໄຂການຂັດແຍ້ງກັນກ່ຽວກັບອະທິປະໄຕເຂດນ່ານນ້ຳຢູ່ທະເລຕາເວັນອອກໂດຍອີງໃສ່ພື້ນຖານນິຕິກຳ, ຢັ້ງຢືນບົດບາດສຳຄັນຂອງສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 (UNCLOS), ພ້ອມທັງຖືວ່າຄຳຕັດສິນຂອງສານອະນຸຍາໂຕຕຸລາການບໍ່ພຽງແຕ່ມີຄວາມໝາຍສຳລັບບັນດາຝ່າຍມີການຂັດແຍ້ງກັນເທົ່ານັ້ນ ຫາກຍັງປະກອບສ່ວນສຳຄັນສຳລັບການພັດທະນາຂອງກົດໝາຍສາກົນເວົ້າລວມ ແລະ ກົດໝາຍວ່າດ້ວຍທະເລເວົ້າສະເພາະ. ບັນດານັກຮຽນຮູ້ກໍ່ຮຽກຮ້ອງໃຫ້ບັນດາຝ່າຍມີການຂັດແຍ້ງກັນເຄົາລົບຄຳຕັດສິນດັ່ງກ່າວ ແລະ ເຄົາລົບບັນດາຂໍ້ກຳນົດຂອງກົດໝາຍສາກົນ, ແກ້ໄຂບັນດາການຂັດແຍ້ງກັນຢູ່ທະເລຕາເວັນອອກດ້ວຍມາດຕະການສັນຕິພາບ.

(ແຫຼ່ງຄັດຈາກ VOV)