29/09/2021 22:34 GMT+7 Email Print Like 0

ຫວຽດນາມ ເຊື່ອໝັ້ນວ່າ ອາຊຽນ ຈະກ້າວເດີນຢ່າງໝັ້ນຄົງເພື່ອຜ່ານຜ່າໂລກລະບາດໃນອະນາຄົດອັນໃກ້ໆນີ້

      ດ້ວຍເນື້ອໃນຈິດໃຈ “ພວກເຮົາເອົາໃຈໃສ່, ພວກເຮົາກະກຽມ, ພວກເຮົາວັດທະນາຖາວອນ”, ຫວຽດນາມ ເຊື່ອໝັ້ນວ່າ ອາຊຽນ ຈະສືບຕໍ່ກ້າວເດີນຢ່າງໝັ້ນຄົງເພື່ອຜ່ານຜ່າໂລກລະບາດໃນອະນາຄົດໃກ້ໆນີ້. ນີ້ແມ່ນສານ ເຊິ່ງທ່ານລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ດ່າວງອກຢຸງ ໄດ້ເນັ້ນໜັກໃນກອງປະຊຸມສະມັດຊາ ປະຊາຄົມວັດທະນະທຳ - ສັງຄົມ ອາຊຽນ ຄັ້ງທີ 26 ເຊິ່ງຖືກດຳເນີນແບບທາງໄກໃນຕອນເຊົ້າວັນທີ 29 ກັນຍາ.
ທ່ານລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ດ່າວງອກຢຸງ ເຂົ້າຮ່ວມກອງປະຊຸມ (ພາບ: molisa.gov.vn)
      ກອງປະຊຸມແມ່ນເຫດການສຳຄັນທີ່ສຸດຂອງ ປະຊາຄົມວັດທະນະທຳ - ສັງຄົມ ອາຊຽນ ໃນປີປະທານ ອາຊຽນ 2021, ແນໃສ່ພິຈາລະນາ ແລະ ຮັບຮອງເອົາບັນດາເອກະສານ, ຖະແຫຼງການຂອງ ປະຊາຄົມ ເພື່ອຍື່ນສະເໜີຕໍ່ກອງປະຊຸມສຸດຍອດ ອາຊຽນ ຄັ້ງທີ 38 ຖືກດຳເນີນໃນເດືອນຕຸລາ ຈະມາເຖິງ; ພ້ອມທັງແບ່ງປັນທັດສະນະກ່ຽວກັບບັນດາບັນຫາທີ່ຄວນເອົາໃຈໃສ່, ບັນດາຜົນງານຂອງປະຊາຄົມ ແລະ ກຳນົດທິດພັດທະນາຂອງ ອາຊຽນ ໃນໄລຍະຈະມາເຖິງ ເພື່ອມຸ່ງໄປເຖິງການປະຕິບັດວິໄສທັດ ປະຊາຄົມ ອາຊຽນ ຮອດປີ 2025 ໃຫ້ປະກົດຜົນເປັນຈິງ.
        ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີ ດ່າວງອກຢຸງ ແບ່ງປັນບັນດາຄວາມມານະພະຍາຍາມຂອງ ຫວຽດນາມ ເພື່ອແກ້ໄຂ ແລະ ຜ່ານຜ່າໂລກລະບາດໂຄວິດ - 19.
        “ພ້ອມກັບ ອາຊຽນ, ຫວຽດນາມ ໄດ້ ແລະ ພວມສືບຕໍ່ບັນດາຄວາມມານະພະຍາຍາມຂອງຕົນເພື່ອຮັບມືກັບໂລກລະບາດໂຄວິດ - 19 ແລະ ບັນດາຜົນກະທົບຮ້າຍແຮງຍ້ອນໂລກລະບາດໂຄວິດ - 19 ກໍ່ຂຶ້ນ. ລັດຖະບານ ຫວຽດນາມ ໄດ້ຍູ້ແຮງການສັກວັກຊິນຢູ່ບັນດາແຂວງທີ່ມີອັດຕາ ແລະ ຄວາມສ່ຽງສູງ; ມານະພະຍາຍາມມີບັນດາບ້ວງເງິນໜູນຊ່ວຍໃໝ່, ເປີດກວ້າງບັນດາກຸ່ມເປົ້າໝາຍຊົມໃຊ້ຜົນປະໂຫຍດ. ເຖິງວ່າ ປັດຈຸບັນ, ແຕ່ລະປະເທດສະມາຊິກ ອາຊຽນ ຍັງສືບຕໍ່ປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍກໍ່ຕາມ, ແຕ່ ຂ້າພະເຈົ້າເຊື່ອໝັ້ນວ່າ ດ້ວຍເນື້ອໃນຈິດໃຈ “ພວກເຮົາເອົາໃຈໃສ່, ພວກເຮົາກະກຽມ, ພວກເຮົາວັດທະນາຖາວອນ”, ອາຊຽນ ຈະສືບຕໍ່ຜ່ານຜ່າໂລກລະບາດໃນອະນາຄົດໃກ້ໆນີ້ຢ່າງໝັ້ນຄົງ”.
        ສິ້ນສຸດກອງປະຊຸມ, ລັດຖະມົນຕີບັນດາປະເທດ ໄດ້ອອກຖະແຫຼງການຮ່ວມ ແລະ ຕົກລົງຮັບຮອງເອົາ ຫຼັກການ ສຳລັບເອກະສານ, ຖະແຫຼງການ 27 ສະບັບ ເພື່ອຍື່ນສະເໜີຕໍ່ກອງປະຊຸມສຸດຍອດ ອາຊຽນ ຄັ້ງທີ 38.
(ແຫຼ່ງຄັດຈາກ VOV)