ໂດຍໄດ້ຮັບການເຊື້ອເຊີນຂອງທ່ານປະທານປະເທດ ຈີນ ສີຈິ້ນຜີງ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ພ້ອມກັບການນຳອາຊຽນ ແລະ ຈີນ ຈະເຂົ້າຮ່ວມກອງປະຊຸມສຸດຍອດພິເສດ ເພື່ອສະເຫຼີມສະຫຼອງ ການພົວພັນລະຫວ່າງ ອາຊຽນ - ຈີນ ຄົບຮອບ 30 ປີໃນວັນທີ 22 ພະຈິກ 2021 ແບບທາງໄກ.
ກອງປະຊຸມແມ່ນໂອກາດເພື່ອໃຫ້ບັນດາການນຳສອງຝ່າຍຕີລາຄາການຮ່ວມມື ລະຫວ່າງ ອາຊຽນ ແລະ ຈີນ ໃນໄລຍະ 30 ປີຜ່ານມາ, ເພື່ອວາງອອກການກຳນົດທິດທີ່ສຳຄັນ ໃນໄລຍະໃໝ່ ແນໃສ່ນຳການພົວພັນນັບມື້ນັບເຂົ້າສູ່ລວງເລິກ, ແທດຈິງ, ສົມກັບລະດັບຂອງການພົວພັນຄູ່ຮ່ວມມືຍຸດທະສາດ ຮອບດ້ານ ທີ່ຫາກໍ່ໄດ້ສ້າງຕັ້ງຢູ່ກອງປະຊຸມສຸດຍອດ ປະຈຳປີ ອາຊຽນ - ຈີນຄັ້ງທີ 24 (26 ຕຸລາ 2021)ໂດຍແມ່ນປະເທດທີ່ຕັ້ງໜ້າຂອງ ປະຊາຄົມ ອາຊຽນ, ຫວຽດນາມ ພ້ອມກັບບັນດາປະເທດ ອາຊຽນ ແລະ ຈີນ ເພີ່ມທະວີການໂອ້ລົມທາງດ້ານການເມືອງ, ຍົກສູງຄວາມເຂົ້າໃຈ, ຄວາມໄວ້ເນື້ອເຊື່ອໃຈ ແລະ ເຄົາລົບເຊິ່ງກັນແລະກັນ, ຍູ້ແຮງການຮ່ວມມືຢ່າງຮອບດ້ານ, ນຳການພົວພັນສອງຝ່າຍກາຍເປັນແບບຢ່າງຂອງການພົວພັນຄູ່ຮ່ວມມືຢ່າງມີສະຖຽນລະພາບ ແລະ ຍືນຍົງລະຫວ່າງບັນດາປະເທດບ້ານໃກ້ເຮືອນຄຽງ.
ຫວຽດນາມ ພ້ອມແລ້ວທີ່ຈະເສີມຂະຫຍາຍບົດບາດເປັນຂົວເຊື່ອມຕໍ່ລະຫວ່າງປະຊາຄົມເສດຖະກິດ ອາຊຽນ ແລະ ຈີນ, ພ້ອມກັບບັນດາປະເທດ ອາຊຽນຊຸກຍູ້ການຮ່ວມມືຢ່າງແຮງໃນທຸກຂົງເຂດ, ຮັກສາສັນຕິພາບ, ສະຖຽນລະພາບ, ແກ້ໄຂຄວາມແຕກຕ່າງກັນເພື່ອຜົນປະໂຫຍດຂອງບັນດາຝ່າຍ ເພື່ອຮັບປະກັນບັນດາການເຄື່ອນໄຫວຮ່ວມມືດ້ານເສດຖະກິດ - ການຄ້າ ໄດ້ຮັບການຜັນຂະຫຍາຍຢ່າງລຸລ່ວງ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ການຮ່ວມມື, ພັດທະນາ ແລະ ວັດທະນາຖາວອນລວມຂອງພາກພື້ນ.
(ແຫຼ່ງຄັດຈາກ VOV)
