25/06/2021 10:11 GMT+7 Email Print Like 0

ຫວຽດນາມ ຖືເປັນສຳຄັນການເພີ່ມທະວີຮ່ວມມືຮອບດ້ານກັບ ກຳປູເຈຍ

      ວັນທີ 23 ມິຖຸນາ, ຢູ່ສຳນັກງານສູນກາງພັກກອມມູນິດ ຫວຽດນາມ, ທ່ານ ຫວໍວັນເຖືອງ, ຜູ້ປະຈຳການຄະນະເລຂາສູນການພັກໄດ້ໃຫ້ການຕ້ອນຮັບ ທ່ານເອກອັກຄະລັດຖະທູດ ຜູ້ມີອຳນາດເຕັມແຫ່ງ ລາຊະອານາຈັກ ກຳປູເຈຍ ປະຈຳ ຫວຽດນາມ Chay Navuth.
ທ່ານ ຫວໍວັນເຖືອງ, ຜູ້ປະຈຳການຄະນະເລຂາສູນການພັກ ໃຫ້ການຕ້ອນຮັບ ທ່ານເອກອັກຄະລັດຖະທູດ ຜູ້ມີອຳນາດເຕັມແຫ່ງ ລາຊະອານາຈັກ ກຳປູເຈຍ ປະຈຳ ຫວຽດນາມ Chay Navuth (ພາບ: TTXVN)
      ທີ່ການຕ້ອນຮັບ, ທ່ານ ຫວໍວັນເຖືອງ ໄດ້ສະແດງຄວາມປິຕິຊົມຊື່ນຕໍ່ ການພົວພັນລະຫວ່າງ ຫວຽດນາມ ແລະ ກຳປູເຈຍ ທີ່ນັບມື້ນັບມີການພັດທະນາ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນສອງປະເທດ, ທ່ານກໍ່ຢັ້ງຢືນວ່າ: ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ຖືເປັນສຳຄັນ ແລະ ສະຫງວນບຸລິມະສິດຢ່າງສູງ ໃຫ້ແກ່ການປັບປຸງ ແລະ ເພີ່ມທະວີການພົວພັນຖານບ້ານໃກ້ເຮືອນຄຽງອັນດີງາມ, ຄວາມມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງ ແລະ ຍາວນານ ກັບ ກຳປູເຈຍ.
            ທ່ານ ຫວໍວັນເຖືອງ ໄດ້ຕີລາຄາສູງບັນດາມາດຕະການທີ່ ກຳປູເຈຍ ພວມນຳໃຊ້ໃນການປ້ອງກັນ, ຕ້ານໂລກລະບາດໂຄວິດ - 19 ແລະ ສະແດງຄວາມເຊື່ອໝັ້ນວ່າ ກຳປູເຈຍ ຈະສະກັດກັ້ນ ແລະ ຄວບຄຸມ ໂລກລະບາດໂຄວິດ - 19ໄດ້, ໂດຍໄດ້ຮັບປະກັນການປະຕິບັດເປົ້າໝາຍພັດທະນາເສດຖະກິດ ສັງຄົມໃນໄລຍະໄວທີ່ສຸດ, ຫວຽດນາມ ພ້ອມແລ້ວທີ່ຈະແບ່ງປັນ ແລະ ໜູນຊ່ວຍໃນເງື່ອນໄຂ ແລະ ຄວາມສາມາດຂອງຕົນ ເພື່ອປະກອບສ່ວນຊ່ວຍໃຫ້ ກຳປູເຈຍ ແກ້ໄຂຄວາມຫຍຸ້ງຍາກໃນວິວັດການປ້ອງກັນ, ຕ້ານໂລກລະບາດໂຄວິດ - 19.
            ທ່ານ ຫວໍວັນເຖືອງ ມີຄວາມປາດຖະໜາວ່າ ທ່ານເອກອັກຄະລັດຖະທູດ ຈະສືບຕໍ່ເປັນຂົວເຊື່ອມຕໍ່ເພື່ອ ໃຫ້ບັນດາກະຊວງ, ຂະແໜງການສອງຝ່າຍ ເພີ່ມທະວີການຮ່ວມມືໃຫ້ນັບມື້ນັບມີປະສິດທິຜົນ.
(ແຫຼ່ງຄັດຈາກ VOV)