(ທ່ານປະທານສະພາແຫ່ງຊາດ ຫງວຽນຊິງຮຸ່ງ)
ຕອນບ່າຍວັນທີ 02/02 ຢູ່ຮ່າໂນ້ຍ, ຄະນະປະຈຳສະພາແຫ່ງຊາດ ຈັດຕັ້ງກອງປະຊຸມທົ່ວປະເທດ ສະຫລຸບສະພາບການຈັດຕັ້ງ ແລະ ການເຄື່ອນໄຫວຂອງສະພາປະຊາຊົນ ແລະ ຄະນະກຳມະການປະຊາຊົນທຸກຂັ້ນອາຍຸການ 2011 – 2016, ກໍ່ຄືບາງມາດຕະການຍົກສູງຄຸນນະພາບ, ປະສິດທິຜົນການເຄື່ອນໄຫວຂອງສະພາປະຊາຊົນ ແລະ ຄະນະກຳມະການປະຊາຊົນທຸກຂັ້ນໃນອາຍຸການ 2016 – 2021. ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ເນັ້ນໜັກວ່າ: ໃນໄລຍະໃໝ່, ຄຽງຂ້າງຄວາມສະດວກ, ຍັງມີຄວາມຫຍຸ້ງຍາກ ແລະ ສິ່ງທ້າທາຍ ບໍ່ແມ່ນໜ້ອຍ, ເພື່ອບັນລຸໄດ້ຄາດໝາຍຂອງອາຍຸການ 2016 – 2021 ນີ້, ສະພາປະຊາຊົນ, ຄະນະກຳມະການປະຊາຊົນທຸກຂັ້ນ ຄວນເສີມຂະຫຍາຍກຳລັງແຮງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ປຸກລະດົມແຫຼ່ງກຳລັງທັງພາຍໃນປະເທດ ແລະ ຕ່າງປະເທດ. ອຳນາດການປົກຄອງທ້ອງຖິ່ນຄວນນຳໜ້າ ໃນການປະຕິບັດບັນດາໂຄງການດຳເນີນງານ ປະກອບສ່ວນປະຕິບັດບັນດາຄຳໝັ້ນສັນຍາສາກົນຢ່າງມີປະສິດທິຜົນ.
ບົນຈິດໃຈກອງປະຊຸມທົ່ວປະເທດຜັນຂະຫຍາຍວຽກງານເລືອກຕັ້ງ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີບັນດາຄະນະພັກ, ຄະນະປະຈຳສະພາປະຊາຊົນ, ຄະນະກຳມະການປະຊາຊົນທຸກຂັ້ນຕັ້ງໜ້າກະກຽມ ເພື່ອໃຫ້ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນອາຍຸການ 2016 – 2021 ປະສົບຜົນສຳເລັດຢ່າງຈົບງານ; ສືບຕໍ່ຍົກສູງການເຄື່ອນໄຫວຢ່າງມີປະສິດທິຜົນ; ມີການຫັນປ່ຽນຢ່າງແຮງ, ຕອບສະໜອງຄວາມຮຽກຮ້ອງຕ້ອງການໃນການພັດທະນາເສດຖະກິດສັງຄົມຂອງປະເທດຊາດ; ກໍ່ສ້າງລັດແຫ່ງອຳນາດນິຕິບັນຍັດສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.
(ແຫຼ່ງຄັດຈາກ VOV)
