ຕອນທ່ຽງວັນທີ 12 ພະຈິກ, ທີ່ບໍລິເວນທຳນຽບປະທານປະເທດ, ພາຍຫລັງພິທີຕ້ອນຮັບຢ່າງເປັນທາງການ ແລະ ການເຈລະຈາຂັ້ນສູງ,         ກ່າວຄຳເຫັນທີ່ການປະຊຸມຂ່າວ, ທ່ານປະທານປະເທດ ເຈີ່ນດ້າຍກວາງ ໃຫ້ຮູ້ວ່າ: 2 ຝ່າຍພ້ອມກັນຕີລາຄາການພົວພັນ ຫວຽດນາມ - ອາເມລິກາ ໃນໄລຍະຜ່ານມາ ບັນລຸໄດ້ໝາກຜົນແທດຈິງຫລາຍຢ່າງ ນຳມາເຊິ່ງຜົນປະໂຫຍດໃຫຍ່ຫລວງໃຫ້ປະຊາຊົນ 2 ປະເທດ. ໃນການຢ້ຽມຢາມທາງລັດຖະກິດເຖິງ ຫວຽດນາມ ຄັ້ງນີ້ ຂອງທ່ານປະທານາທິບໍດີ Donald Trump 2 ຝ່າຍໄດ້ອອກຖະແຫຼງການຮ່ວມ ເຫັນດີເປັນເອກະສັນສືບຕໍ່ເຮັດໃຫ້ ການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ ເລິກເຊິ່ງກ່ວາອີກ ບົນຫຼັກການເຄົາລົບເອກະລາດ, ປະຊາທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບດ້ານການເມືອງຂອງກັນ.
        ກ່ຽວກັບທິດທາງການພົວພັນ ຫວຽດນາມ - ອາເມລິກາ ໃນໄລຍະຈະມາເຖິງ, ທ່ານປະທານປະເທດ ເຈີ່ນດ້າຍກວາງ ໃຫ້ຮູ້ວ່າ: 2 ຝ່າຍຈະເພີ່ມທະວີການພົບປະ ແລະ ເຈລະຈາ ພິເສດແມ່ນສືບຕໍ່ຊຸກຍູ້ການແລກປ່ຽນ, ພົບປະຂັ້ນສູງ ໂດຍຜ່ານບັນດາການຢ້ຽມຢາມ 2 ຝ່າຍ ແລະ ພົບປະຢູ່ນອກບັນດາເວທີປາໄສພາກພື້ນ ແລະ ສາກົນ.
        ທ່ານປະທານາທິບໍດີ Donald Trump ເນັ້ນໜັກວ່າ ກ່ວາ 2 ທົດສະວັດຜ່ານມາ, ອາເມລິກາ ແລະ ຫວຽດນາມ ພ້ອມກັນຊອກຫາບັນດາຈຸດທີ່ຄ້າຍຄືກັນ ອີງຕາມຜົນປະໂຫຍດລວມ, ສ້າງການຜູກຮັດ ເພື່ອໃຫ້ມີການພົວພັນຄືປັດຈຸບັນ. ແລະການຢ້ຽມຢາມຂອງທ່ານປະທານາທິບໍດີ Donald Trump ແມ່ນຢືນຢັນຄືນໃໝ່ການຜູກຮັດຕ່າງໆນັ້ນ.
        ທ່ານປະທານາທິບໍດີ Donald Trump ຊົມເຊີຍທ່ານປະທານປະເທດ ເຈີ່ນດ້າຍກວາງ ໄດ້ເປັນເຈົ້າພາບຈັດຕັ້ງສັບປະດາຂັ້ນສູງ APEC ຢູ່ນະຄອນ ດ່າໜັງ ສຳເລັດຜົນ.