ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ເຮັດວຽກກັບສູນກາງຄະນະຊາວໜຸ່ມກອມມູນິດໂຮ່ຈີມິນ
(ພາບ: VGP)
ຕອນເຊົ້າວັນທີ 25 ມີນາ, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ມີການເຮັດວຽກກັບສູນກາງຄະນະຊາວໜຸ່ມກອມມູນິດໂຮ່ຈີມິນ ກ່ຽວກັບການປະຕິບັດກົດລະບຽບສົມທົບວຽກງານລະຫວ່າງລັດຖະບານ ແລະ ຄະນະບໍລິຫານງານສູນກາງຊາວໜຸ່ມໃນໄລຍະຜ່ານມາ.
ຕີລາຄາສູງເລື່ອງສູນກາງຄະນະຊາວໜຸ່ມ ໄດ້ປຸກລະດົມບັນດາການເຄື່ອນໄຫວພ້ອມກັບທົ່ວປະເທດຮ່ວມແຮງຮ່ວມໃຈສະກັດກັ້ນຄວບຄຸມໂຄວິດ-19 ໃນໄລຍະຜ່ານມາ, ທ່ານນາຍົກລັດຖະມົນຕີຖືວ່າ ໃນໄລຍະນີ້ແມ່ນໂອກາດເພື່ອໃຫ້ຄະນະຊາວໜຸ່ມກອມມູນິດໂຮ່ຈີມິນ ສະແດງໃຫ້ເຫັນເຈດຈຳນົງ, ຈິດໃຈນຳໜ້າ, ຄວາມຄາດຫວັງຢາກບືນຕົວຂຶ້ນ, ບໍ່ພຽງແຕ່ໃນວຽກງານຄວບຄຸມໂລກລະບາດເທົ່ານັ້ນ ຫາກນັບທັງທຸກດ້ານໃນຊີວິດເສດຖະກິດ, ສັງຄົມອີກດ້ວຍ. ທ່ານນາຍົກລັດຖະມົນຕີ ເນັ້ນໜັກວ່າ, ການຄວບຄຸມໂລກລະບາດ ແລະ ແກ້ໄຂຜົນຮ້າຍຢ້ອນຫຼັງຈາກໂລກລະບາດ ນັ້ນແມ່ນບັນດາບັນຫາໃຫຍ່ໃນປີນີ້ ຊາວໜຸ່ມໃນທົ່ວປະເທດຕ້ອງຮ່ວມແຮງຮ່ວມໃຈກັນ ແລະ ວາງອອກບັນຫາ: “ເລີ່ມທຸລະກິດໃນຊ່ວງເວລາເກີດໂລກລະບາດໂຄວິດ-19 ແລະ ພາຍຫຼັງໂຄວິດ-19 ຂອງຊາວໜຸ່ມແມ່ນຄືແນວໃດ?”. ທ່ານກ່າວວ່າ:
“ຂ້າພະເຈົ້າສະເໜີໃຫ້ປຸກລະດົມການເຂົ້າຮ່ວມຢ່າງແຮງຂອງສະມາຊິກຊາວໜຸ່ມ, ໄວໜຸ່ມເຂົ້າໃນບັນດາການເຄື່ອນໄຫວປ້ອງກັນ, ສະກັດກັ້ນໂລກລະບາດໂຄວິດ - 19, ຂະຫຍາຍຮູບແບບທີ່ດີ, ວິທີເຮັດທີ່ມີປະສິດທິຜົນ, ລະດົມແຫຼ່ງກຳລັງມີປະສິດທິຜົນ. ຕ້ອງປະກາດໃຊ້ແຜນການຈັດຕັ້ງຮູບແບບຊາວໜຸ່ມ, ນັກສຶກສາອາສາສະໝັກປຸກລະດົມ,ແນະນຳ, ຊ່ວຍເຫຼືອປະຊາຊົນແຈ້ງອາການສຸຂະພາບດ້ວຍຄວາມສະໝັກໃຈ; ເສີມຂະຫຍາຍບັນດາຂໍ້ລິເລີ່ມຂອງສະມາຊິກຊາວໜຸ່ມ, ໄວໜຸ່ມ, ໂດຍສະເພາະແມ່ນຖັນແຖວປັນຍາຊົນ, ດ້ວຍບັນດາມາດຕະການເຕັກໂນໂລຢີໃໝ່ ແລະ ເໝາະສົມ.”
ທ່ານນາຍົກລັດຖະມົນຕີກໍ່ຕີລາຄາສູງທ່ານເລຂາຜູ້ທີໜຶ່ງສູນກາງຄະນະຊາວໜຸ່ມ ເລກວ໊ກຟອງ ຈະມີການໂອ້ລົມສົນທະນາໂດຍກົງທາງອອນລາຍກັບຊາວໜຸ່ມໃນທົ່ວປະເທດໃນວັນທີ 26 ມີນາ ດ້ວຍຫົວຂໍ້ວ່າ “ຄວາມມຸ່ງມາດປາດຖະໜາຂອງຊາວໜຸ່ມຫວຽດນາມ”.
(ແຫຼ່ງຄັດຈາກ VOV)
