ປະເທດທີ່ຖືກຜົນສະທ້ອນຢ່າງໜັກໜ່ວງທີ່ສຸດໃນໂລກ ຍັງຄົງແມ່ນ ອາເມລິກາ, ແຕ່ໃນຊຸມວັນຜ່ານມາ, ຍ້ອນໂຄງການສັກວັກຊິນກັນພະຍາດໂຄວິດ - 19 ໄດ້ຮັບການຍູ້ໄວ, ສະນັ້ນ ຈຳນວນຜູ້ຕິດເຊື້ອຢູ່ປະເທດນີ້ໄດ້ຫຼຸດລົງຫຼາຍພໍສົມຄວນ. ຢືນອັນດັບທີ 2 ແມ່ນ ອິນເດຍ - ເຊິ່ງປັດຈຸບັນ ປະເທດນີ້ແມ່ນຈຸດໃຈກາງຂອງໂລກລະບາດ, ດ້ວຍຈຳນວນຜູ້ຕິດເຊື້ອ ແລະ ຜູ້ເສຍຊີວິດຕາມລາຍວັນ ລ້ວນແຕ່ສູງສຸດໃນໂລກ. ຍ້ອນເຊື້ອໄວຣັດກາຍພັນໃໝ່ໄດ້ພົບເຫັນຢູ່ປະເທດນີ້, ຄາດວ່າ ຈຳນວນຜູ້ຕິດເຊື້ອຈະສືບຕໍ່ຢູ່ໃນລະດັບສູງ ໃນຊຸມວັນຈະມາເຖິງ.
ໄລ່ຕາມພາກພື້ນແລ້ວ, ປັດຈຸບັນ, ອາຊີ ແມ່ນທະວີບທີ່ມີຈຳນວນຜູ້ຕິດເຊື້ອສູງທີ່ສຸດໃນໂລກ ດ້ວຍຈຳນວນຜູ້ຕິດເຊື້ອຫຼາຍກວ່າ 50 ລ້ານຄົນ ແລະ ມີເກືອບ 664.000 ຄົນ ເສຍຊີວິດ. ນອກຈາກ ອິນເດຍ ແລ້ວ, ປັດຈຸບັນ, ອິນໂດເນເຊຍ ແລະ ຟີລິບປິນ ກໍແມ່ນບັນດາປະເທດທີ່ມີຈຳນວນຜູ້ຕິດເຊື້ອໃໝ່ຕາມລາຍວັນສູງຫຼາຍ, ດ້ວຍກວ່າ 5.000 ຄົນ ຕໍ່ວັນ.ສະເພາະຢູ່ ຫວຽດນາມ, ຕາມແຫຼ່ງຂ່າວຈາກກະຊວງສາທາລະນະສຸກ ຫວຽດນາມ, ນັບແຕ່ເວລາ 18 ໂມງຂອງວັນທີ 26 ພຶດສະພາ ຫາເວລາ 6 ໂມງຂອງວັນທີ 27 ພຶດສະພາ, ຫວຽດນາມ ມີຜູ້ຕິດເຊື້ອລາຍໃໝ່ຕື່ມອີກ 25 ກໍລະນີ. ບັນດາກໍລະນີດັ່ງກ່າວ ລ້ວນແຕ່ຢູ່ໃນເຂດແຍກຕົວ. ເປັນອັນວ່າ, ໄລ່ຮອດເວລາ 6 ໂມງເຊົ້າຂອງວັນທີ 27 ພຶດສະພາ, ຫວຽດນາມ ມີຜູ້ຕິດເຊື້ອສະສົມທັງໝົດ 6.111 ຄົນ, ໃນນັ້ນ ມີ 2.853 ຄົນ ໄດ້ຮັບການປິ່ນປົວຫາຍດີ ແລະ ມີ 45 ຄົນ ເສຍຊີວິດ.
(ແຫຼ່ງຄັດຈາກ VOV)
