26/02/2019 08:01 GMT+7 Email Print Like 0

ຖະແຫຼງການຮ່ວມຫວຽດນາມ-ລາວ

ໃນຂອບເຂດການຢ້ຽມຢາມສັນທະວະໄມຕີ ສປປ.ລາວ ຢ່າງເປັນທາງການຂອງທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຟຸຈ້ອງ ໃນລະຫວ່າງວັນທີ 24 – 25 ກຸມພາ, 2 ຝ່າຍໄດ້ອອກຖະແຫຼງການຮ່ວມ ໂດຍຢືນຢັນວ່າ:


ທ່ານເລຂາທິການໃຫຍ່, ປະທານປະເທດ ຫງວຽນຟຸຈ້ອງ

ແລະ ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລິຈິດ

(ພາບປະກອບ) 

ຫວຽດນາມ ແລະ ລາວ ຈະຮ່ວມກ້າວເດີນບົນເສັ້ນທາງເອກະລາດແຫ່ງຊາດ ແລະ ລັດທິສັງຄົມນິຍົມຕະຫຼອດການ. ໃນຖະແຫຼງການຮ່ວມ, ທ່ານເລຂາທິການໃຫຍ່, ປະທານປະເທດຫວຽດນາມ ຫງວຽນຟຸຈ້ອງ ແລະ ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ, ຢືນຢັນວ່າ, ຫວຽດນາມ ແລະ ລາວ ພ້ອມກັນສ້າງສາປະເທດຊາດໃຫ້ມີສັນຕິພາບ, ມີຄວາມວັດທະນາຖາວອນ. 2 ຝ່າຍເຫັນດີນຳກັນສືບຕໍ່ສົມທົບກັນຢ່າງແໜ້ນແຟ້ນເພື່ອປະຕິບັດບັນດາຂໍ້ຕົກລົງລະຫວ່າງການນຳຂັ້ນສູງ 2 ພັກ, 2 ລັດ, ບັນດາຖະແຫຼງການຮ່ວມຫວຽດນາມ - ລາວ ຢ່າງມີປະສິດທິຜົນ.

        2 ຝ່າຍໄດ້ເຫັນດີເພີ່ມທະວີ ແລະ ນຳການພົວພັນດ້ານການເມືອງໃຫ້ເຂົ້າສູ່ລວງເລິກຢ່າງບໍ່ຢຸດຢັ້ງ; ຍົກສູງປະສິດທິຜົນການຮ່ວມມືທາງດ້ານເສດຖະກິດ, ວັດທະນະທຳ, ທ່ອງທ່ຽວ, ການສຶກສາ, ສາທາລະນະສຸກ, ວິທະຍາສາດ - ເຕັກນິກ…

        2 ຝ່າຍຢືນຢັນສືບຕໍ່ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ອາໄສຢູ່ລາວ ແລະ ປະຊາຄົມລາວ ອາໄສຢູ່ຫວຽດນາມ ດຳລົງຊີວິດ, ຮ່ຳຮຽນ ແລະ ເຮັດວຽກໃຫ້ເໝາະສົມກັບກົດໝາຍຂອງແຕ່ລະປະເທດ ແລະ ທຳນຽມສາກົນ.

        2 ຝ່າຍເນັ້ນໜັກເຖິງຄວາມສຳຄັນ ແລະ ເຫັນດີເປັນເອກະພາບເພີ່ມທະວີເສົາຄ້ຳການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ເພື່ອແນໃສ່ຮັກສາສະຖຽນລະພາບດ້ານການເມືອງ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍທາງສັງຄົມຢູ່ແຕ່ລະປະເທດ; ກໍ່ສ້າງເສັ້ນຊາຍແດນຫວຽດນາມ - ລາວ ການເປັນເສັ້ນຊາຍແດນແຫ່ງສັນຕິພາບ, ມິດຕະພາບ, ສະຖຽນລະພາບ, ຮ່ວມມື ແລະ ພັດທະນາແບບຍືນຍົງ; ສືບຕໍ່ມານະພະຍາຍາມສົມທົບກັນຊອກຫາ, ທ້ອນໂຮມ ແລະ ສົ່ງອັດຖິທະຫານອາສາສະໝັກ ແລະ ນັກຊ່ຽວຊານຫວຽດນາມ ທີ່ເສຍສະຫຼະຊີວິດຢູ່ລາວ ກັບຄືນເມືອປະເທດ.

        2 ຝ່າຍເຫັນດີແບ່ງປັນຂໍ້ມູນຂ່າວສານຢ່າງທັນການ ແລະ ສົມທົບກັນຢ່າງແໜ້ນແຟ້ນ, ມີປະສິດທິຜົນ, ສະໜັບສະໜູນເຊິ່ງກັນ ແລະ ກັນ ໃນບັນດາບັນຫາສາກົນ ແລະ ພາກພື້ນ, ໂດຍສະເພາະແມ່ນໃນຂອບເຂດການຮ່ວມມືອາຊຽນ…

        2 ຝ່າຍສືບຕໍ່ເນັ້ນໜັກເຖິງຄວາມສຳຄັນໃນເລື່ອງຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ປອດໄພຢູ່ທະເລຕາເວັນອອກ; ສະໜັບສະໜູນບົດບາດ ແລະ ບັນດາຫຼັກການຂອງອາຊຽນ; ເຫັນດີຊຸກຍູ້ບັນດາການແກ້ໄຂການຂັດແຍ້ງກັນຢູ່ທະເລຕາເວັນອອກ ໂດຍສັນຕິວິທີ, ເຄົາລົບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) 1982; ພ້ອມກັບບັນດາຝ່າຍທີ່ກ່ຽວຂ້ອງປະຕິບັດ ຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ຊຸກຍູ້ການບັນລຸກົດແຫ່ງການປະພຶດໃນທະເລຕາເວັນອອກ (COC) ໂດຍໄວຢ່າງແທດຈິງ ແລະ ມີປະສິດທິຜົນ, ປະກອບສ່ວນຮັກສາສັນຕິພາບ, ຄວາມໝັ້ນຄົງ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ຢູ່ໃນໂລກ.

(ແຫຼ່ງຄັດຈາກ VOV)