ຍາມໃດຫວຽດນາມກໍ່ປະກອບສ່ວນຈົດສຸດຄວາມສາມາດຂອງຕົນເພື່ອການພັດທະນາຂອງອາຊຽນ
ຢູ່ນອກກອງປະຊຸມສຸດຍອດຮ່ວມມືອະນຸພາກພື້ນແມ່ນຳຂອງເປີດກວ້າງ (GMS) ຄັ້ງທີ 6, ຕອນບ່າຍວັນທີ 31 ມີນາ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບທ່ານເລຂາທິການໃຫຍ່ອາຊຽນ Lim Jock Hoi ແລະ ທ່ານຮອງປະທານາທິບໍດີມຽນມາ U Henry Van Thio.
(ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບທ່ານເລຂາທິການໃຫຍ່ອາຊຽນ Lim Jock Hoi)
ທີ່ການຕ້ອນຮັບທ່ານເລຂາທິການໃຫຍ່ອາຊຽນ Lim Jock Hoi, ທ່ານຫງວຽນຊວນຟຸກ ປາດຖະໜາວ່າ, ໃນໄລຍະຈະມາເຖິງຄະນະເລຂາອາຊຽນ ເສີມຂະຫຍາຍພາລະບົດບາດຄົ້ນຄວ້າ, ສະເໜີບັນດານະໂຍບາຍກວ່າອີກ ເພື່ອເປັນພື້ນຖານທາບທາມດ້ານລັດຖະນະໂຍບາຍໃຫ້ບັນດາປະເທດສະມາຊິກ. ຄຽງຂ້າງນັ້ນ, ຄະນະເລຂາອາຊຽນ ຄວນຍູ້ແຮງວຽກງານຕິດຕາມ, ກະຕຸກຊຸກຍູ້ ແລະ ປະສານງານໃນການຜັນຂະຫຍາຍບັນດາຂໍ້ຕົກລົງໃນອາຊຽນ. ທ່ານນາຍົກລັດຖະມົນຕີ ໄດ້ຕີລາຄາສູງບັນດາຂໍ້ລິເລີ່ມເຊື່ອມໂຍງຂອງອາຊຽນ ກ່ຽວກັບການຮັດແຄບຊ່ອງຫວ່າງການພັດທະນາ; ພ້ອມທັງສະເໜີເອົາໃຈໃສ່ເຖິງຄວາມຕິດພັນໃຫ້ຫຼາຍກວ່າອີກ, ໜູນຊ່ວຍເພີ່ມເຕີ່ມໃຫ້ກັນລະຫວ່າງບັນດາກົນໄກທີ່ມີຢູ່ແລ້ວຢູ່ເຂດອະນຸພາກພື້ນແມ່ນ້ຳຂອງ ກໍຄືລະຫວ່າງບັນດາເຂດອະນຸພາກພື້ນ ເພື່ອຫຼີກລ້ຽງການຊ້ອນກັນ, ແຫຼ່ງກຳລັງຖືກແບ່ງກະແຈກກະຈາຍ. ທ່ານນາຍົກລັດຖະມົນຕີ ຢືນຢັນວ່າ, ຫວຽດນາມ ຍາມໃດກໍ່ປະກອບຈົດສຸດຄວາມສາມາດຂອງຕົນໃຫ້ແກ່ການພັດທະນາຂອງອາຊຽນ; ພ້ອມທັງປາດຖະໜາວ່າ ທ່ານເລຂາທິການໃຫຍ່ອາຊຽນ ສົມທົບກັນ, ສ້າງເງື່ອນໄຂເພື່ອໃຫ້ຫວຽດນາມ ດຳລົງຕຳແໜ່ງເປັນປະທານອາຊຽນ ໃນປີ 2020 ບັນລຸຜົນສຳເລັດ.
ທ່ານເລຂາທິການໃຫຍ່ອາຊຽນ Lim Jock Hoi ຢືນຢັນວ່າ, ຄະນະເລຂາອາຊຽນ ຈະເຄື່ອນໄຫວນັບມື້ນັບມີປະສິດທິຜົນກວ່າໃນໄລຍະຈະມາເຖິງ; ພ້ອມທັງເຊື່ອໝັ້ນວ່າ, ຫວຽດນາມ ຈະປະຕິບັດສຳເລັດບົດບາດເປັນປະທານອາຊຽນ ຂອງຕົນໃນປີ 2020.
ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບທ່ານຮອງປະທານາທິບໍດີມຽນມາ U Henry Van Thio)
ທີ່ການຕ້ອນຮັບທ່ານຮອງປະທານາທິບໍດີມຽນມາ U Henry Van Thio, ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ, ມີບັນດານັກລົງທຶນໃຫຍ່ຂອງຫວຽດນາມ ພວມລົງທຶນ, ຜະລິດດຳເນີນທຸລະກິດຢູ່ມຽນມາ. ສະນັ້ນ, ທ່ານນາຍົກລັດຖະມົນຕີປາດຖະໜາວ່າ ຝ່າຍມຽນມາ ສືບຕໍ່ສ້າງເງື່ອນໄຂສະດວກໃຫ້ແກ່ບັນດາວິສາຫະກິດຫວຽດນາມ ກວ່າອີກ. ເນັ້ນໜັກເຖິງບົດບາດຂອງຫວຽດນາມ ແລະ ມຽນມາ ເຊິ່ງລ້ວນແຕ່ແມ່ນສະມາຊິກຂອງກຸ່ມອາຊຽນ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີໃຫ້ລັດຖະບານ 2 ປະເທດສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ ເພື່ອຜົນປະໂຫຍດຂອງແຕ່ລະຝ່າຍ, ເພື່ອສັນຕິພາບ ແລະ ສະຖຽນລະພາບໃນພາກພື້ນ ແລະ ໃນໂລກ.
ສ່ວນທ່ານຮອງປະທານາທິບໍດີມຽນມາ U Henry Van Thio ໄດ້ວອຍພອນຜົນສຳເລດຂອງ GMS6 – CLV 10 ແລະ ຕີລາຄາສູງບົດບາດຂອງຫວຽດນາມ ດ້ວຍຖານະເປັນປະເທດເຈົ້າພາບຈັດເຫດການທາງການທູດທີ່ສຳຄັນດັ່ງກ່າວ. ທ່ານ U Henry Van Thio ໃຫ້ຮູ້ວ່າ, ມຽນມາ ຈະສືບຕໍ່ມານະພະຍາຍາມຊຸກຍູ້ການພົວພັນຮ່ວມມືກັບຫວຽດນາມ ໃນຫຼາຍຂົງເຂດ, ພິເສດແມ່ນການຄ້າ, ການລົງທຶນ, ສືບຕໍ່ຮັກສາການແລກປ່ຽນຄະນະຜູ້ແທນຂັ້ນສູງ…
(ແຫຼ່ງຄັດຈາກ VOV)