ຕາມການຕີລາຄາຂອງບັນດາຜູ້ແທນເຂົ້າຮ່ວມກອງປະຊຸມໃຫຍ່ແລ້ວ, ໝາກຜົນຂອງກອງປະຊຸມໃຫຍ່ ໄດ້ສະແດງໃຫ້ເຫັນຄວາມຮັບຜິດຊອບປະຫວັດສາດອັນຍິ່ງໃຫຍ່ຂອງພັກກອມມູນິດ ຫວຽດນາມ ທີ່ມີຕໍ່ການພັດທະນາຂອງປະເທດຊາດໃນຊຸມທົດສະວັດຈະມາເຖິງ ໃນການຍົກອອກບັນດາເປົ້າໝາຍລະອຽດ, ວິໄສທັດຍາວເຖິງກາງສະຕະວັດ.
ກອງປະຊຸມໃຫຍ່ຄັ້ງທີ XIII ຂອງພັກຫາກໍ່ສິ້ນສຸດລົງໃນວັນທີ 01 ກຸມພາ 2021 ຊຶ່ງໄດ້ປຸກລຸກເຈດຈຳນົງ ແລະ ຄວາມຄາດຫວັງຢ່າງແຮງຂອງຊົນຊາດ, ຂ້ຽວຂາດມຸ່ງໄປເຖິງເປົ້າໝາຍນຳປະເທດຊາດກາຍເປັນປະເທດພັດທະນາ, ມີລາຍຮັບສູງໃນ 25 ປີຈະມາເຖິງ.
ຫາວັນທີ 01 ກຸມພາ ຢູ່ຮ່າໂນ້ຍ (ພາບ: VGP)
ວິໄສທັດຮອດກາງສະຕະວັດ
ກອງປະຊຸມໃຫຍ່ຄັ້ງທີ XIII ຂອງພັກ ດຳເນີນໄປໃນສະພາບປະເທດພວມຢືນຢູ່ຕໍ່ໜ້າບັນດາກາລະໂອກາດ ແລະ ສິ່ງທ້າທາຍສັບຊ້ອນກັນ, ຫລາຍບັນຫາຍຸດທະສາດໃໝ່ວາງອອກ ຄວນໄດ້ຮັບການແກ້ໄຂ, ອັນໄດ້ສົ່ງຜົນສະທ້ອນຢ່າງແຮງຕໍ່ຊີວິດການເປັນຢູ່, ເສດຖະກິດ - ສັງຄົມຂອງປະເທດ ກໍ່ຄືທົ່ວໂລກ. ໃນສະພາບການດັ່ງກ່າວ, ເອກະສານກອງປະຊຸມໃຫຍ່ວາງອອກເປົ້າໝາຍພັດທະນາ ຫວຽດນາມ ຮອດປີ 2030 ຈະເປັນປະເທດພວມພັດທະນາໂດຍພື້ນຖານ ມີອຸດສາຫະກຳທັນສະໄໝ, ມີລາຍຮັບປານກາງສູງ; ປີ 2045: ກາຍເປັນປະເທດພັດທະນາ, ລາຍຮັບສູງ. ບັນດາເປົ້າໝາຍນີ້ ໄດ້ຮັບການກຳນົດລະບຸໃນໂຄງການດຳເນີນງານ 2011, ໃນຄັ້ງນີ້ ໄດ້ຮັບການຫັນເປັນຕົວຈິງ ແລະ ຂະຫຍາຍຂຶ້ນ. ກອງປະຊຸມໃຫຍ່ກໍ່ເນັ້ນໜັກເຖິງປັດໄຈປ່ຽນແປງໃໝ່ປະດິດຄິດສ້າງ ແລະ ເປົ້າໝາຍ, ຄວາມຄາດຫວັງພັດທະນາຢ່າງແຮງຂອງປະເທດໃນໄລຍະໃໝ່. ທ່ານ ເຈິ່ນຮ່ວາງເງິນ, ສະມາຊິກຄະນະຜູ້ແທນນະຄອນ ໂຮ່ຈີມິນ ຖືວ່າ:“ບັນດາບົດທາບທາມຄວາມເຫັນທີ່ກອງປະຊຸມໃຫຍ່ ລ້ວນແຕ່ຕັ້ງບັນຫາວ່າ ຕ້ອງພັດທະນາລະບົບເລີ່ມຕົ້ນທຸລະກິດປະດິດຄິດສ້າງ, ລົງທຶນເຂົ້າການຫັນເປັນດີຈີຕອນ ເພື່ອພັດທະນາພື້ນຖານເສດຖະກິດດີຈີຕອນ ບົນພື້ນຖານນັ້ນ ຈຶ່ງເພີ່ມສະມັດຕະພາບແຮງງານ. ບັນດາຄຳເຫັນນັ້ນ ລ້ວນແຕ່ສະແດງໃຫ້ເຫັນຄວາມຄາດຫວັງເພື່ອຍາດແຍ່ງພາລະກິດອັນໃຫຍ່ຫລວງ, ທີ່ຕັ້ງ, ອິດທິພົນຊື່ສຽງຂອງ ຫວຽດນາມ ໃນປະຈຸບັນ. ”
ສິ່ງທີ່ເປັນໜ້າສົນໃຈໃນຄັ້ງນີ້ ແມ່ນກອງປະຊຸມໃຫຍ່ໄດ້ເຫັນດີເປັນເອກະພາບຍົກອອກຂໍ້ສັງເກດສັງລວມແມ່ນ “ປະເທດເຮົາ ຍັງບໍ່ທັນມີຄວາມສາມາດບົ່ມຊ້ອນ, ພາລະກິດໃຫຍ່ຫລວງ, ທີ່ຕັ້ງ ແລະ ອິດທິພົນຊື່ສຽງຄືວັນນີ້ຈັກເທື່ອ”. ສິ່ງດັ່ງກ່າວໄດ້ສົ່ງຜົນກະທົບຢ່າງໃຫຍ່ຫລວງຕໍ່ປະຊາຊົນ ຫວຽດນາມ, ຢັ້ງຢືນບັນດາຜົນງານແຫ່ງການພັດທະນາທີ່ບັນລຸໄດ້ ແມ່ນມີຄວາມໝາຍທີ່ສຸດ ແລະ ຈາກນັ້ນ ຈຶ່ງມີກຳລັງໜູນກ້າວໄປ. ທ່ານ ຮ່ວາງຈູງຢຸງ, ເລຂາຄະນະພັກແຂວງ ຮ່າຕີງ ໃຫ້ຮູ້ວ່າ:
“ກອງປະຊຸມໃຫຍ່ໄດ້ປະສົບຜົນສຳເລັດຢ່າງຈົບງາມ, ມະຕິຈະເຂົ້າສູ່ຊີວິດການເປັນຢູ່ໂດຍໄວ ຍ້ອນວ່າບັນດາບັນຫາແມ່ນແທດຈິງທີ່ສຸດ. ເນື້ອໃນທັງໝົດໄດ້ຮັບການປຶກສາຫາລືຢ່າງລອບຄອບຖີ່ຖ້ວນ ດ້ວຍຄວາມຕັດສິນໃຈດ້ານການເມືອງຢ່າງສູງຂອງລະບົບການເມືອງ ນັ້ນແມ່ນເຮັດແນວໃດ ເພື່ອຍົກສູງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ປະຊາຊົນ.”
ຂັ້ນຕອນພິເສດຄັດເລືອກຖັນແຖວການນຳ
ວຽກງານບຸກຄະລາກອນ, ເຊິ່ງແມ່ນເນື້ອໃນ ທີ່ບໍ່ວ່າກອງປະຊຸມໃຫຍ່ຄັ້ງໃດ ລ້ວນແຕ່ມີການກະກຽມຢ່າງມີແບບມີແຜນ, ລອບຄອບຖີ່ຖ້ວນ, ລະມັດລະວັງບົນຈິດໃຈປະຊາທິປະໄຕ, ກະຈ່າງແຈ້ງ, ພາວະວິໄສ, ຍ້ອນວ່າ “ພະນັກງານແມ່ນແກ່ນສານຂອງແກ່ນສານ”, ແມ່ນປັດໄຈຕັດສິນການປະຕິບັດມະຕິກອງປະຊຸມໃຫຍ່ໃຫ້ສຳເລັດຜົນ. ສຳລັບກອງປະຊຸມໃຫຍ່ຄັ້ງທີ XIII ຂອງພັກ, ການກະກຽມວຽກງານບຸກຄະລາກອນໄດ້ເລີ່ມປະຕິບັດແຕ່ປີ 2018 ແລ້ວ ດ້ວຍຈິດໃຈລະມັດລະວັງ, ພາວະວິໄສ, ຍຸຕິທຳ; ເຮັດເທື່ອລະກ້າວ, ແຕ່ລະວຽກ, ແຕ່ງ່າຍຮອດຍາກ, ແຕ່ກ້ວາງຫາແຄບ. ໃນໄລຍະດຳເນີນກອງປະຊຸມໃຫຍ່ຄັ້ງທີ XIII ຂອງພັກ, ບັນດາຜູ້ແທນໄດ້ສະຫງວນ 3 ວັນເຮັດວຽກຢ່າງເປັນທາງການ ເພື່ອປຶກສາຫາລື, ເລືອກຕັ້ງກຳມະການຄະນະບໍລິຫານງານສູນກາງພັກຊຸດທີ XIII ລວມ 200 ສະຫາຍ. ຫລັງຈາກນັ້ນ, ຄະນະບໍລິຫານງານສູນກາງພັກຊຸດທີ XIII ໄດ້ຈັດກອງປະຊຸມຄັ້ງປະຖົມມະເລີກ, ເລືອກຕັ້ງກົມການເມືອງ, ຄະນະເລຂາສູນກາງພັກ, ເລຂາທິການໃຫຍ່. ທ່ານເລຂາທິການໃຫຍ່, ປະທານປະເທດ ຫວຽດນາມ ຫງວຽນຝູຈ້ອງ ສືບຕໍ່ໄດ້ຮັບການເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກຊຸດທີ XIII.
ບັນດາໝາກຜົນດັ່ງກ່າວ ໄດ້ສະແດງໃຫ້ເຫັນຄວາມເປັນເອກະພາບສູງ ແລະ ຜົນສຳເລັດຂອງວຽກງານບຸກຄະລາກອນຄັ້ງນີ້, ຮັບປະກັນບໍ່ປະໃຫ້ຜູ້ບໍ່ມີມາດຖານ, ເງື່ອນໄຂຢ່າງຄົບຖ້ວນ, ບໍ່ເໝາະສົມເຂົ້າເປັນຄະນະບໍລິຫານງານສູນກາງພັກ, ແຕ່ກໍ່ບໍ່ປະຂ້າມຜູ້ທີ່ມີຄຸນສົມບັດ, ມີຄວາມເກັ່ງກ້າສາມາດ, ມີອິດທິພົນຊື່ສຽງໃນພັກ ແລະ ປະຊາຊົນຢ່າງແທ້ຈິງ. ທ່ານ ໂຮ່ວັນເນນ, ເລຂາຄະນະພັກແຂວງ ຢາລາຍ ໃຫ້ຮູ້ວ່າ:
“ບັນດາສະຫາຍໄດ້ຮັບການເລືອກຕັ້ງເຂົ້າຄະນະບໍລິຫານງານສູນກາງພັກຊຸດທີ XIII ແມ່ນບັນດາສະຫາຍດີເດັ່ນຢ່າງແທດຈິງ ກ່ຽວກັບກຳລັງຄວາມສາມາດ, ລະດັບຄວາມຮູ້, ພູມປັນຍາ ເພື່ອປະຕິບັດໜ້າທີ່ໃນອາຍຸການໃໝ່ໃຫ້ສຳເລັດ, ປະກອບສ່ວນເຂົ້າໃນການພັດທະນາຂອງປະເທດຊາດໄລຍະຈະມາເຖິງ.”ທ່ານນາງ ບຸຍຮ່ວຽນມາຍ, ສະມາຊິກຄະນະຜູ້ແທນນະຄອນ ຮ່າໂນ້ຍ ແບ່ງປັນວ່າ:
“ກອງປະຊຸມໃຫຍ່ໄດ້ປະສົບຜົນສຳເລັດຢ່າງແທ້ຈິງ ເມື່ອພວກເຮົາເລືອກຕັ້ງໄດ້ບັນດາຜູ້ແທນດີເດັ່ນທີ່ສຸດສຳລັບພູມປັນຍາ ແລະ ຄຸນນະທາດ ຫວຽດນາມ ເພື່ອຕາງໜ້າໃຫ້ສະມາຊິກພັກກ່ວາ 5 ລ້ານຄົນ ແລະ ປະຊາຊົນ ຫວຽດນາມ ເກືອບ 100 ລ້ານຄົນ ເພື່ອພ້ອມກັນສ້າງເສັ້ນທາງພັດທະນາໃໝ່ໃຫ້ ຫວຽດນາມ.”
ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດ ຫວຽດນາມ ໄດ້ປະສົບຜົນສຳເລັດຢ່າງຈົບງາມຢູ່ນະຄອນຫລວງ ຮ່າໂນ້ຍ ຊຶ່ງສະແດງໃຫ້ເຫັນຈິດໃຈຄວາມຮັບຜິດຊອບ, ມູນເຊື້ອຄວາມສາມັກຄີໃນພັກ, ໃນການຕັດສິນໃຈບັນດາບັນຫາສຳຄັນໜຶ່ງຂອງປະເທດຊາດ. ບັນດາລັດຖະນະໂຍບາຍຂອງກອງປະຊຸມໃຫຍ່ ຈະຕໍ່ກຳລັງໃຫ້ “ຫວຽດນາມ ຟື້ນຕົວລຸກຂຶ້ນ” ໃນອະນາຄົດ./.
(ແຫຼ່ງຄັດຈາກ VOV)
