16/10/2019 10:36 GMT+7 Email Print Like 0

ກອງປະຊຸມເຈົ້າຫນ້າທີ່ອາວຸໂສອາຊຽນ-ຈີນກ່ຽວກັບການປະຕິບັດ DOC ຄັ້ງທີ 18

ກອງປະຊຸມເຈົ້າຫນ້າທີ່ອາວຸໂສອາຊຽນ-ຈີນກ່ຽວກັບການປະຕິບັດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ ( DOC)  ຄັ້ງທີ 18 ໄດ້ດຳເນີນໃນວັນທີ 15 ຕຸລາ ຢູ່ ນະຄອນ ດາລາດ ແຂວງ ເລີມດົມຂອງຫວຽດນາມ. 

ຄະນະຜູ້ແທນຫວຽດນາມເຂົ້າຮ່ວມກອງປະຊຸມ

ນີ້ແມ່ນບັນດາກອງປະຊຸມລະຫວ່າງ ອາຊຽນ ກັບຈີນ ເພື່ອແນໃສ່ສຳຫລວດກວດຄືນສະພາບການຢູ່ທະເລຕາເວັນອອກ, ປະຕິບັດ DOC ແລະ ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC). ກ່ຽວກັບສະພາບການຢູ່ທະເລຕາເວັນອອກ, ກອງປະຊຸມໄດ້ຍາດເວລາສ່ວນຫລາຍເພື່ອປຶກສາຫາລືກ່ຽວກັບການຜັນແປທີ່ສັບສົນຢູ່ພື້ນທີ່ຕົວຈິງ ພິເສດ ແມ່ນບັນດາກໍລະນີພວມເກີດຂຶ້ນຢູ່ເຂດເສດຖະກິດຈຳເພາະຂອງຫວຽດນາມ. ບັນດາປະເທດມີຄວາມວິຕົກກັງວົນຕໍ່ສະພາບເຄັ່ງຕຶງປະຈຸບັນ, ບັນດາປະເທດອາຊຽນ ເນັ້ນຫນັກເຖິງຫລັກການອົດກັ້ນ, ບໍ່ຫັນເປັນການທະຫານ, ບໍ່ມີການກະທຳເຮັດໃຫ້ສະພາບການສັບສົນຂຶ້ນຕື່ມ, ບໍ່ນຳໃຊ້ອາວຸດຫລືນາບຂູ່ການນຳໃຊ້ອາວຸດ, ແກ້ໄຂຄວາມຂັດແຍ້ງໂດຍສັນຕິວິທີ ບົນກົດໝາຍສາກົນ ແລະ ສົນທິສັນຍາ ສປຊ ວ່າດ້ວຍທະເລປີ 1982.

ກ່ຽວກັບການປະຕິບັດ DOC, ກອງປະຊຸມເຫັນດີສືບຕໍ່ມານະພະຍາຍາມຮັບປະກັນການປະຕິບັດ DOC ຢ່າງຄົບຖ້ວນ, ມີປະສິດທິຜົນ.

ກ່ຽວກັບການເຈລະຈາ COC, ບັນດາ ປະເທດຢືນຢັນ ຄວນເພີ່ມທະວີຄວາມມານະພະຍາຍາມ ເພື່ອສ້າງກົດແຫ່ງການປະພຶດໃຫ້ມີປະສິດທິຜົນຢ່າງແທ້ຈິງ ມີຄຸນນະພາບ ອາດຈະສະກັດກັ້ນບັນດາເຫດທີ່ເກີດຂຶ້ນຢ່າງສັບສົນຄືປະຈຸບັນ.

ກ່າວຄຳເຫັນທີ່ກອງປະຊຸມ, ຄະນະຜູ້ແທນຫວຽດນາມ ເນັ້ນຫນັກວ່າ ການກະທຳລະເມີດຂອງຈີນ ໄດ້ ແລະ ພວມສົ່ງຜົນສະທ້ອນເຖິງສັນຕິພາບ ແລະ ຄວາມໝັ້ນຄົງຂອງພາກພື້ນ ແລະ ບໍ່ສ້າງຄວາມສະດວກໃຫ້ແກ່ວິວັດການເຈລະຈາ COC.  ສະນັ້ນ ຫວຽດນາມ ສະເຫນີຫລາຍມາດຕະການ ເພື່ອແນໃສ່ປັບປຸງວິທີການເຮັດວຽກໃຫ້ແກ່ບັນດາຮອບເຈລະຈາຕໍ່ໄປ.

(ແຫຼ່ງຄັດຈາກ VOV)