នៅក្នុងជំនួបនេះ លោកអគ្គលេខាបក្ស តូ ឡឹម បានសង្កត់ធ្ងន់ថា បារាំងគឺជាដៃគូយុទ្ធសាស្ត្រគ្រប់ជ្រុងជ្រោយដំបូងរបស់វៀតណាមនៅក្នុងសហភាពអឺរ៉ុប (EU); អះអាងថា វៀតណាមគោរពនិងមានបំណងចង់ពង្រឹងកិច្ចសហប្រតិបត្តិការជាមួយបារាំងលើវិស័យជាច្រើន។ រីឯខ្លួនវិញ លោកប្រធានាធិបតី Emmanuel Macron បានសង្កត់ធ្ងន់ថា វៀតណាមជាដៃគូដែលមានតួនាទី និងឋានៈដ៏សំខាន់ក្នុងគោលនយោបាយរបស់បារាំងនៅក្នុងតំបន់ឥណ្ឌូប៉ាស៊ីហ្វិក ដោយបញ្ជាក់ថា នេះគឺជាទំនាក់ទំនងដែលមានលក្ខណៈពិសេសជាច្រើន ដែលបានឆ្លងកាត់ដំណាក់កាលផ្សេងៗគ្នាជាច្រើនក្នុងប្រវត្តិសាស្ត្រ ហើយបច្ចុប្បន្នត្រូវបានកសាងនៅលើមូលដ្ឋាគ្រឹះនៃការជឿទុកចិត្តខ្ពស់ និងការគោរពគ្នាទៅវិញទៅមក។
ដោយវាយតម្លៃថា ក្របខណ្ឌភាពជាដៃគូយុទ្ធសាស្ត្រលើគ្រប់ជ្រុងជ្រោយវៀតណាម-បារាំងគឺជាចំណុចភ្លឺ ក្នុងបរិបទដែលស្ថានការណ៍ពិភពលោកកំពុងវិវឌ្ឍយ៉ាងឆាប់រហ័សនិងស្មុគស្មាញនោះ មេដឹកនាំទាំងពីរបានឯកភាពបន្តផ្តល់អាទិភាពលើការជំរុញកិច្ចសហប្រតិបត្តិការលើវិស័យនយោបាយ - ការទូត ការពារជាតិ - សន្តិសុខរួមទាំងសន្តិសុខតាមអ៊ីនធឺណិត សេដ្ឋកិច្ច - ពាណិជ្ជកម្ម - វិនិយោគ សេដ្ឋកិច្ចសមុទ្រ កិច្ចសហប្រតិបត្តិការអភិវឌ្ឍន៍ ការផ្លាស់ប្ដូររវាងប្រជាជនជាមួយប្រជាជន ក្នុងនោះមានវប្បធម៌ ការអប់រំបណ្ដុះបណ្ដាល និងជំរុញការចុះហត្ថលេខាលើកិច្ចព្រមព្រៀងសហប្រតិបត្តិការក្នុងវិស័យសំខាន់ៗជាច្រើន។ ភាគីទាំងពីរបានឯកភាពជំរុញកិច្ចសហប្រតិបត្តិការលើវិស័យផ្លាស់ប្តូរថាមពល តាមនោះបារាំងគាំទ្រវៀតណាមក្នុងក្របខ័ណ្ឌនៃភាពជាដៃគូសម្រាប់ការផ្លាស់ប្តូរថាមពលដោយយុត្តិធម៌ (JETP) ពង្រីកទៅកាន់កិច្ចសហប្រតិបត្តិការថាមពលនុយក្លេអ៊ែរ ការបណ្តុះបណ្តាលធនធានមនុស្ស និងការអនុវត្តបរមាណូក្នុងគោលដៅសន្តិភាពដូចជាក្នុងវិស័យសុខាភិបាល; ខិតខំប្រឹងប្រែងមានគម្រោងសំខាន់ៗជានិមិត្តរូបថ្មីនៃកិច្ចសហប្រតិបត្តិការរវាងប្រទេសទាំងពីរក្នុងយុគសម័យអភិវឌ្ឍន៍ថ្មីរបស់វៀតណាម៕
