ក្នុងសារអបអរសាទរ លោកអគ្គលេខាបក្ស Nguyen Phu Trong បានសង្កត់ធ្ងន់ថា វៀតណាមអបអរសាទរយ៉ាងស្មោះស្ម័គ្រចំពោះជោគជ័យនៃមហាសន្និបាតលើកទី ២០ របស់បក្សកុម្មុយនិស្តចិន ជាពិសេសការអភិវឌ្ឍប្រកបដោយការច្នៃប្រឌិតក្នុងការធ្វើអោយល្អប្រសើរ នូវប្រព័ន្ធទ្រឹស្តីនៃប្រព័ន្ធសង្គមនិយម ជាមួយនឹងលក្ខណៈពិសេសរបស់ចិនក្នុងយុគសម័យថ្មី ក៏ដូចជាចក្ខុវិស័យយុទ្ធសាស្ត្រ និងគោលដៅភារកិច្ចសំខាន់ៗ ដែលមហាសន្និបាតបានដាក់ចេញសម្រាប់ការអភិវឌ្ឍរយៈពេលវែងរបស់ប្រទេសចិន ឆ្ពោះទៅរកគោលដៅអនុវត្តន៍ប្រកបដោយជោគជ័យនូវគោលដៅ “១០០ ឆ្នាំលើកទីពីរ”។ លោកអគ្គលេខាបក្ស Nguyen Phu Trong ជឿជាក់ថា ក្រោមការដឹកនាំរបស់គណៈកម្មាធិការមជ្ឈិមបក្សកុម្មុយនិស្តចិន និងគោលគំនិតរបស់លោកស៊ី ជិនពីង អំពីសង្គមនិយមជាមួយនឹងចរិតលក្ខណៈវិសេសវិសាលរបស់ចិនក្នុងយុគសម័យថ្មី បក្សទាំងមូល និងប្រជាជនចិនទាំងមូលប្រាកដជានឹងសម្រេចបាននូវគោលដៅដែលមហាសន្និបាតបក្សលើកទី ២០ ដាក់ចេញ ហើយសម្រេចបានជោគ ជ័យនូវគោលដៅជាមូលដ្ឋាននូវទំនើបភាវូបនីយកម្មសង្គមនិយម  ឆ្ពោះទៅរកការកសាងប្រទេសចិនឱ្យទៅជាប្រទេសសង្គមនិយមទំនើប ប្រទេសជាតិខ្លាំងមាំមួន  ប្រជាជនសម្បូរសប្បាយ ប្រជាធិបតេយ្យ អរិយធម៌ និងសុខដុមរមនា។

លោកអគ្គលេខាបក្ស Nguyen Phu Trong បានអះអាងថា វៀតណាមតែងតែគោរព និងវាយតម្លៃខ្ពស់ចំពោះមនោសញ្ជេតនាយ៉ាងល្អប្រសើរ  និងការរួមវិភាគទានដ៏ធំធេងរបស់លោកអគ្គលេខាបក្សស៊ី ជិនពីង ក្នុងទំនាក់ទំនងវៀតណាម-ចិន ដើម្បីជាប្រយោជន៍របស់ប្រទេសជាតិរបស់ប្រជាជននៃប្រទេសទាំងពីរ។ ជាងនេះទៅទៀត វៀតណាមតែងតែគោរពនិងត្រៀមជាស្រេចរួមជាមួយលោកអគ្គលេខាបក្ស  ស៊ី ជិនពីង បន្តការយកចិត្តទុកដាក់ និងណែនាំដល់គ្រប់កម្រិត សាខា និងមូលដ្ឋាននៃភាគីទាំងពីរ ឱ្យយល់ច្បាស់ និងអនុវត្តន៍ឱ្យបានល្អនូវកិច្ចព្រមព្រៀង និងការយល់ឃើញរួមកម្រិតខ្ពស់ នាំមកនូវទំនាក់ទំនងអ្នកជិតខាងមិត្តភាព ដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងវៀតណាមនិងចិន ឲ្យឡើងដល់កម្ពស់ថ្មីមួយ៕