លោកប្រធានរដ្ឋ ស៊ី ជីនពីង បានអញ្ជើញលោកប្រធានាធិបតី ដូណាល់ ត្រាំ និងលោកស្រី មេឡានៀ ត្រាំ ឲ្យចូលរួមកិច្ចប្រជុំកំពូល APEC នៅទីក្រុង Shenzhen ប្រទេសចិន ក្នុងខែវិច្ឆិកា ខាងមុខ ហើយបានក្រើនរំលឹកផងដែរថា ពួកគេអាចជួបគ្នាម្តងទៀតមួយខែក្រោយមក នៅឯកិច្ចប្រជុំកំពូល G20 នៅក្លឹបវាយកូនហ្គោល Trump National Doral Miami ក្នុងរដ្ឋ Florida។ ក្នុងអំឡុងពេលនៃដំណើរទស្សនកិច្ចលើកនេះ មេដឹកនាំទាំងពីរបានពិភាក្សាអំពីបញ្ហានានាដូចជា មជ្ឈិមបូព៌ា អ៊ុយក្រែន និងឧបទ្វីបកូរ៉េ។

មុននោះ នៅក្នុងពិធីជប់លៀងតែនៅសេតវិមាន នៅថ្ងៃទី ២៥ ខែកញ្ញា ប្រធានាធិបតីអាមេរិកលោក ដូណាល់ ត្រាំ បានវាយតម្លៃដំណើរទស្សនកិច្ចរយៈពេលបីថ្ងៃរបស់មេដឹកនាំចិន ជាភាពជោគជ័យមួយ។ លោក ត្រាំ បាននិយាយថា ភាគីទាំងពីរសម្រេចបានវឌ្ឍនភាពដ៏ធំធេង និងវិជ្ជមានសម្រាប់ប្រទេសទាំងពីរ។ ប្រធានាធិបតីអាមេរិកក៏បាននិយាយផងដែរថា កសិករអាមេរិកនឹង «ពេញចិត្តយ៉ាងខ្លាំង» ប៉ុន្តែមិនបានផ្តល់ព័ត៌មានលម្អិតអំពីការសន្យាទិញផលិតផលកសិកម្មថ្មីរបស់ប្រទេសចិននោះទេ។ រីឯខ្លួនវិញ ប្រធានរដ្ឋចិនលោក ស៊ី ជីនពីង បានចាត់ទុកថា ទំនាក់ទំនងរវាងសហរដ្ឋអាមេរិក និងចិន ត្រូវឆ្ពោះទៅរកស្ថិរភាពយុទ្ធសាស្ត្រដោយផ្អែកលើការគោរពគ្នា ភាពយុត្តិធម៌ និងគោលការណ៍ទៅវិញទៅមក៕