នារសៀលថ្ងៃទី ៨ មីនា នៅវិមានរដ្ឋសភា (ហាណូយ) ប្រធានរដ្ឋសភា លោក Vuong Dinh Hue បានអញ្ជើញទទួលជួបឯកអគ្គរដ្ឋទូតចិនប្រចាំនៅវៀតណាម លោក Xiong Bo ដើម្បីពិភាក្សាអំពីទំនាក់ទំនងរវាងប្រទេសទាំងពីរ និងរដ្ឋសភានៃប្រទេសទាំងពីរ។
នៅក្នុងជំនួបនេះ ប្រធានរដ្ឋសភាលោក Vuong Dinh Hue បានវាយតំលៃខ្ពស់ចំពោះវឌ្ឍនភាពនៃទំនាក់ទំនងរបស់ប្រទេសទាំងពីរនាពេលថ្មីៗនេះ ជាពិសេសគឺភាគីទាំងពីរបានឯកភាពគ្នា បន្តធ្វើឱ្យស៊ីជម្រៅ និងលើកកំពស់ទំនាក់ទំនងភាពជាដៃគូសហប្រតិបត្តិការយុទ្ធសាស្ត្រលើគ្រប់ជ្រុងជ្រោយ កសាង “យុទ្ធសាស្ត្រសំខាន់របស់វៀតណាម - សហគមន៍ចែករំលែកអនាគតវៀតណាម ចិនដែលមានអត្ថន័យយុទ្ធសាស្ត្រ”។
ទាក់ទិននឹងទំនាក់ទំនងរវាងរដ្ឋសភានៃប្រទេសទាំងពីរ ប្រធានរដ្ឋសភាបានសង្កត់ធ្ងន់ថា ក្នុងកិច្ចខិតខំប្រឹងប្រែងជារួមដើម្បីលើកកម្ពស់ “ជំនឿទុកចិត្តខាងនយោបាយកាន់តែខ្ពស់” ទំនាក់ទំនងកិច្ចសហប្រតិបត្តិការរវាងរដ្ឋសភាវៀតណាម និង សភាតំណាងប្រជាជនទូទាំងប្រទេសចិនត្រូវបានពង្រឹង និងពង្រីកឲ្យកាន់តែស៊ីជម្រៅថែមទៀត។
ភាគីទាំងពីរបានរក្សាការផ្លាស់ប្តូរក្នុងទម្រង់ប្រកបដោយភាពបត់បែនដូចជា៖ កិច្ចពិភាក្សាតាមប្រព័ន្ធអ៊ីនធឺណែត ចាត់បញ្ជូនគណៈប្រតិភូថ្នាក់ដឹកនាំនៃគណៈកម្មាធិការ ស្ថាប័នជំនាញ និងក្រុមសមាជិកសភាមិត្តភាពទៅបំពេញទស្សនកិច្ចទៅវិញទៅមក រក្សាជំនួបប្រាស្រ័យ ពិគ្រោះយោបល់ សម្របសម្រួលគ្នាយ៉ាងជិតស្និទ្ធលើវេទិកាសភាក្នុងតំបន់ និងអន្តរជាតិ ជាពិសេសសហភាពអន្តរសភា (IPU) និងក្រុមប្រឹក្សាអន្តរសភាអាស៊ាន (AIPA)។ ភាគីទាំងពីរបានឯកភាពគ្នាបន្តជំរុញទំនាក់ទំនងទ្វេភាគីរវាងប្រទេសទាំងពីរ ដំណើរទស្សនកិច្ចរបស់ថ្នាក់ដឹកនាំជាន់ខ្ពស់ និងស្ថាប័ននីតិប្បញ្ញត្តិនៃប្រទេសទាំងពីរនាពេលខាងមុខ។
ប្រធានរដ្ឋសភាជឿជាក់ថា ដោយមានបទពិសោធន៍និងការយល់ដឹងអំពីវៀតណាមនិងទំនាក់ទំនងនៃប្រទេសទាំងពីរ លោកឯកអគ្គរដ្ឋទូត Xiong Bo នឹងបន្តជាស្ពាន ដើម្បីជំរុញប្រកបដោយប្រសិទ្ធភាពលើវិស័យសហប្រតិបត្តិការរវាងប្រទេសទាំងពីរ រួមចំណែកអនុវត្តន៍យ៉ាងល្អនូវការយល់ដឹងទូទៅរបស់ថ្នាក់ដឹកនាំជាន់ខ្ពស់ព្រមទាំង នាំទំនាក់ទំនងរវាងប្រទេសទាំងពីរឲ្យរីកចម្រើនឥតឈប់ឈរ ស៊ីជម្រៅ ស្ថិរភាព ល្អប្រសើរ និងនិរន្តរភាពយូរអង្វែង៕
