នៅថ្ងៃទី១០ ខែមករានេះ វៀតណាមបានព្យាបាលជាសះស្បើយអ្នកជំងឺចំនួន ៨៩.៨៤២នាក់។
យោងតាមព្រឹត្តិបត្រព័ត៌មានស្តីពីជំងឺរាតត្បាតកូវីដ-១៩ ក្នុងថ្ងៃទី១០ ខែមករា របស់ក្រសួងសុខាភិបាលបានឱ្យដឹងថា ចាប់ពីម៉ោង ១៦:០០ ថ្ងៃទី៩ ខែមករា ដល់ម៉ោង ១៦:០០ ថ្ងៃទី ១០ ខែមករា លើប្រព័ន្ធជាតិនៃការគ្រប់គ្រងករណីជំងឺកូវីដ-១៩ បានកត់ត្រាករណីឆ្លងថ្មី ជំងឺកូវីដ-១៩ ចំនួន ១៤.៨១៨ នាក់ ក្នុងនោះ ករណីនាំចូលចំនួន ៣៥ ករណី ត្រូវបានដាក់ឱ្យនៅដាច់ដោយឡែកជាបន្ទាន់ និងចំនួន ១៤.៧៨៣ ករណីត្រូវបានកត់ត្រាក្នុងស្រុកនៅតាមខេត្ត-ក្រុងចំនួន ៦២។ នៅថ្ងៃទី១០ ខែមករានេះ វៀតណាមបានព្យាបាលជាសះស្បើយអ្នកជំងឺចំនួន ៨៩.៨៤២នាក់ និងស្លាប់ ២១២នាក់។
ចាប់តាំងពីផ្ទុះឡើងជំងឺរាតត្បាតមក វៀតណាមមានអ្នកឆ្លងកូវីដ ១៩ ចំនួន ១.៩១៤.៣៩៣ នាក់ ស្ថិតក្នុងចំណាត់ថ្នាក់ទី ២៨ ក្នុងចំណោមប្រទេសនិងតំបន់ដែនដីចំនួន ២២៤។
រហូតមកដល់ពេលនេះ វៀតណាមបានព្យាបាលជាសះស្បើយអ្នកជំងឺចំនួន ១.៥៩០.០៩០ នាក់, អ្នកជំងឺចំនួន ៣៤.៥៣១ នាក់បានស្លាប់ ស្មើនឹង ១.៨% នៃចំនួនអ្នកឆ្លងសរុប។ ការចាក់វ៉ាក់សាំងសរុបបានចំនួន ១៦១.២៧៧.៨០៧ ដូស ដែលក្នុងនោះការចាក់ដូសទី ២ បានចំនួន ៧១.១៦១.៣៣៥ ដូស និងដូសទី៣ បានចំនួន ១១.៨២៤.៨៤៨ ដូស។ អត្រាគ្របដណ្តប់នៃវ៉ាក់សាំងយ៉ាងហោចណាស់ ១ ដូសគឺ ៩៩.៩% ហើយអត្រានៃការចាក់វ៉ាក់សាំងដូសទី ២ គឺ ៩២.៤% នៃចំនួនប្រជាជនដែលមានអាយុចាប់ពី ១៨ ឆ្នាំឡើងទៅ៕
តាម VOV5 - វិទ្យុសំឡេងវៀតណាម
