នៅក្នុងសេចក្តីថ្លែងការណ៍ថ្មីបំផុតដែលចេញផ្សាយនៅព្រឹកថ្ងៃទី ២ ឧសភា ក្រសួងពាណិជ្ជកម្មចិនបាននិយាយថា សហរដ្ឋអាមេរិកបានបញ្ជូនព័ត៌មានដោយម្ចាស់ការអំពីការចរចារពន្ធគយ ហើយប្រទេសនេះកំពុងវាយតម្លៃលទ្ធភាពនៃការចរចាជាមួយសហរដ្ឋអាមេរិក។
សេចក្តីថ្លែងការណ៍របស់អ្នកនាំពាក្យត្រូវបានបង្ហោះនៅលើគេហទំព័ររបស់ក្រសួងពាណិជ្ជកម្មចិនក្នុងទម្រង់ជាសំណួរនិងចម្លើយ ដើម្បីឆ្លើយតបទៅនឹងសំណួរទាក់ទងនឹងការអះអាងម្តងហើយម្តងទៀតរបស់អាមេរិកនាពេលថ្មីៗនេះថា ពួកគេកំពុងចរចាជាមួយចិនលើបញ្ហាសេដ្ឋកិច្ច និងពាណិជ្ជកម្ម ហើយនឹងឈានដល់កិច្ចព្រមព្រៀងមួយ។ យោងតាមអ្នកនាំពាក្យ "ថ្មីៗនេះ សហរដ្ឋអាមេរិកបានបញ្ជូនព័ត៌មានដោយម្ចាស់ការជាច្រើនដងទៅភាគីចិន តាមរយៈភាគីពាក់ព័ន្ធ ដោយសង្ឃឹមថា អាចធ្វើការចរចាជាមួយចិន" ហើយបាននិយាយថា ប្រទេសនេះ “កំពុងធ្វើការវាយតម្លៃលើបញ្ហានេះ”។
អ្នកនាំពាក្យរូបនេះក៏បានរំលឹកឡើងវិញនូវជំហររបស់ទីក្រុងប៉េកាំងថា ជម្លោះពន្ធដារនេះត្រូវបានចាប់ផ្ដើមដោយឯកតោភាគីដោយសហរដ្ឋអាមេរិក។ ដូច្នេះហើយ ប្រសិនបើទីក្រុងវ៉ាស៊ីនតោនចង់ចរចា គេត្រូវបង្ហាញភាពស្មោះស្ម័គ្រ និងសកម្មភាពជាក់ស្តែង។
សេចក្តីថ្លែងការណ៍ថ្មីបំផុតរបស់ទីក្រុងប៉េកាំងត្រូវបានគេមើលឃើញថា ជាសញ្ញាទន់និងបត់បែនជាងមុន ដែលឆ្ពោះទៅរកការចរចាដើម្បីបន្ថយកំដៅភាពតានតឹងពាណិជ្ជកម្មរវាងមហាអំណាចសេដ្ឋកិច្ចធំជាងគេទាំងពីរនេះ៕
