នាថ្ងៃទី ២០ ខែតុលា លេខាធិការដ្ឋានសមាគមប្រជាជាតិអាស៊ីអាគ្នេយ៍ (អាស៊ាន) បានរៀបចំវេទិកាអង្គភាពពាក់ព័ន្ធនឹងអាស៊ានលើកទី ៤ តាមប្រព័ន្ធវីដេអូ ដោយទាក់ទាញការចូលរួមរបស់អង្គប្រជុំប្រមាណ ១៥០ នាក់ ដែលតំណាងឱ្យសភា ស្ថាប័នយុត្តិធម៌ យុវជន អង្គការសង្គម ស្ត្រី សមាគមធុរកិច្ច និងអាជីពអាស៊ានផងដែរ។

អគ្គលេខាធិការអាស៊ានលោក Lim Jock Hoi (ប្រភព៖ baoquocte.vn)

ក្នុងវេទិកានេះ អង្គប្រជុំបានស្វែងយល់អំពីផលប៉ះពាល់នៃការរីករាលដាលនៃជំងឺកូវីដ១៩ នៅក្នុងតំបន់ និងការឆ្លើយតបរបស់អាស៊ាន ជាពិសេសគឺរបៀបសហប្រតិបត្តិការក្នុងចំណោមប្រទេសជាសមាជិកអាស៊ាន ដើម្បីកសាងក្របខ័ណ្ឌនៃការស្តារសេដ្ឋកិច្ចឡើងវិញក្រោយវិបត្តិជំងឺកូវីដ១៩។ ទន្ទឹមនឹងនេះអង្គប្រជុំទាំងនេះក៏បានពិភាក្សានិងចែករំលែកមតិយោបល់ស្តីពីវឌ្ឍនភាពនៃការអនុវត្តចក្ខុវិស័យអាស៊ានឆ្នាំ ២០២៥ផងដែរ។

ក្នុងបរិបទដែលជំងឺរាតត្បាតសកល     កូវីដ១៩ នៅតែវិវត្តន៍ដ៏ស្មុគស្មាញនៅក្នុងតំបន់និងជុំវិញពិភព លោក អង្គប្រជុំបានអះអាងថាដំណើរការស្តារឡើងវិញ ទាមទារឱ្យមានកិច្ចសហប្រតិបត្តិការយ៉ាងជិតស្និទ្ធថែមទៀតរវាងដៃគូនិងភាគីពាក់ព័ន្ធនានា។ ថ្លែងក្នុងវេទិកានេះ អគ្គលេខាធិការរងអាស៊ានទទួលបន្ទុកកិច្ចការសហគមន៍និងធុរកិច្ចលោក Michael Tene បានអំពាវនាវអាស៊ាន និងអង្គភាពពាក់ព័ន្ធនានា បង្កើនការតភ្ជាប់និងជម្រុញកិច្ចសហប្រតិបត្តិការឲ្យកាន់តែល្អប្រសើរថែមទៀត ដើម្បីសម្រេចបានចក្ខុវិស័យអាស៊ាន ឆ្នាំ២០២៥ ព្រមទាំងរួមចំណែកក្នុងកិច្ចខិតខំប្រឹងប្រែងរួម សំដៅធានាសន្តិភាពស្ថិរភាពនិងវិបុលភាពនៅក្នុងតំបន់ផងដែរ៕

តាម VOV5- វិទ្យុសម្លេងវៀតណាម