ព័ត៌មាន
អគ្គលេខាបក្ស ប្រធានរដ្ឋវៀតណាមលោក Nguyen Phu Trong អញ្ជើញទទួលជួបជាមួយនាយករដ្ឋមន្រ្តីរុស្ស៊ីលោក Dmitry Medvedev
អគ្គលេខាបក្ស ប្រធានរដ្ឋវៀតណាមលោក Nguyen Phu Trong និងនាយករដ្ឋមន្ត្រីសហព័ន្ធរុស្ស៊ី លោក Dmitry Medvedev
នារសៀលថ្ងៃទី១៩ ខែវិច្ឆិកា ឆ្នាំ២០១៨ នៅរដ្ឋធានីហាណូយ អគ្គលេខាបក្ស ប្រធានរដ្ឋវៀតណាមលោក Nguyen Phu Trong បានអញ្ជើញទទួលជួបពិភាក្សា ជាមួយនាយករដ្ឋមន្រ្តីសហព័ន្ធរុស្ស៊ី លោក Dmitry Medvedev ប្រធានគណៈបក្សបង្រួបបង្រួមរុស្ស៊ីកាន់អំណាច ដែលកំពុងអញ្ជើញបំពេញទស្សនកិច្ចជាផ្លូវការនៅវៀតណាម។
ក្នុងជំនួបនេះ អគ្គលេខាបក្ស ប្រធានរដ្ឋវៀតណាមលោក Nguyen Phu Trong បានវាយតម្លៃខ្ពស់ចំពោះអត្ថន័យ នៃដំណើរទស្សនកិច្ចមកកាន់វៀតណាមលើកនេះ របស់នាយករដ្ឋមន្រ្តីរុស្ស៊ី លោក Dmitry Medvedev។ លោក Nguyen Phu Trong បានអះ អាងថា បក្ស រដ្ឋនិងប្រជាជនវៀតណាមជានិច្ចកាល មានគោលបំណងចង់ពង្រឹងនិងពង្រីកទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយ ជាមួយសហព័ន្ធរុស្ស៊ី ដោយចាត់ទុករុស្ស៊ីជាដៃគូមិត្តភាពប្រពៃណីគួរអោយជឿទុកចិត្ត និងជាដៃគូមួយក្នុងចំណោមដៃគូសំខាន់បំផុតក្នុងគោលនយោបាយកិច្ចការបរទេសរបស់វៀតណាម។
ចំណែកឯ នាយករដ្ឋមន្រ្តីរុស្ស៊ីលោក Dmitry Medvedev បានជម្រាបជួនអគ្គលេខាបក្ស ប្រធានរដ្ឋវៀតណាមលោក Nguyen Phu Trong អំពីលទ្ធផលនៃជំនួបពិភាក្សាជាមួយ នាយករដ្ឋមន្រ្តីវៀតណាមលោក Nguyen Xuan Phuc។ លោក Dmitry Medvedev បានគូសបញ្ជាក់ថា រដ្ឋាភិបាលនៃប្រទេសទាំងពីរ នឹងសហការគ្នាយ៉ាងសកម្មដើម្បីរៀបចំសកម្មភាពសម្រាប់ឆ្នាំ២០១៨នេះ ដែលជាឱកាសសម្រាប់ប្រទេសទាំងពីរ រំលឹកខួប អនុ ស្សាវរីយ៍រយៈពេល២៥ឆ្នាំនៃការចុះហត្ថលេខាលើសន្ធិសញ្ញាស្ដីពីគោលការណ៍ជាសារវ័ន្តនៃទំនាក់ទំនងមិត្តភាពរវាងវៀតណាមនិងសហព័ន្ធរុស្ស៊ី រួមទាំងត្រៀមរៀបចំសម្រាប់កម្មវិធីរំលឹកខួបអនុស្សាវរីយ៍លើកទី៧០ឆ្នាំនៃទិវាបង្កើតទំនាក់ទំនងការទូតវៀតណាម-រុស្ស៊ី នាឆ្នាំ២០២០ខាងមុខ៕
តាម VOV5 - វិទ្យុសំឡេងវៀតណាម
