យោងតាមសេចក្តីប្រកាសនាថ្ងៃទី ៣០ ខែមករា របស់ទីភ្នាក់ងារសម្របសម្រួលសកម្មភាពរដ្ឋាភិបាលនៅក្នុងតំបន់ដីនានា (COGAT) ចំណុះក្រសួងការពារជាតិអ៊ីស្រាអែល ការចេញចូលទៅក្នុងតំបន់ហ្គាហ្សាតាមរយៈច្រកទ្វាព្រំដែន Rafah នឹងមានការសម្របសម្រួលរបស់អេហ្ស៊ីប បន្ទាប់ពីអ៊ីស្រាអែលធ្វើការត្រួតពិនិត្យសន្តិសុខលើបុគ្គលម្នាក់ៗក្រោមការតាមដានរបស់បេសកកម្មសហភាពអឺរ៉ុប (EU)។ ទោះជាយ៉ាងណាក៏ដោយ ការវិលត្រឡប់របស់ប្រជាជនពីប្រទេសអេហ្ស៊ីបចូលមកតំបន់ហ្គាហ្សាវិញ គឺសម្រាប់តែអ្នកដែលបានចាកចេញពីហ្គាហ្សាក្នុងអំឡុងពេលមានជម្លោះតែប៉ុណ្ណោះ។ ជនប៉ាឡេស្ទីនទាំងអស់ដែលចង់ចេញ ឬចូលតំបន់ហ្គាហ្សា ត្រូវតែមានការយល់ព្រមពីអេហ្ស៊ីប ហើយអេហ្ស៊ីបនឹងផ្ញើបញ្ជីឈ្មោះនេះទៅកាន់ទីភ្នាក់ងារសន្តិសុខផ្ទៃក្នុង Shin Bet របស់អ៊ីស្រាអែលដើម្បីពិនិត្យ។ សម្រាប់អ្នកចាកចេញពីតំបន់ហ្គាហ្សាទៅកាន់អេហ្ស៊ីប អ៊ីស្រាអែលនឹងប្រើប្រាស់កម្មវិធីសម្គាល់ទម្រង់មុខ ដើម្បីផ្ទៀងផ្ទាត់ថាបុគ្គលទាំងនោះមានឈ្មោះក្នុងបញ្ជីដែលត្រូវបានអនុម័ត ហើយនឹងបើកច្រកទ្វាព្រំដែនឱ្យពួកគេឆ្លងកាត់៕