នៅឯពិធីទទួលនោះ នាយករដ្ឋមន្ត្រី លោក ហ្វាម មិញ ជិញ បានអះអាងថា វៀតណាមជានិច្ចកាលចាត់ទុកសហរដ្ឋអាមេរិកជាដៃគូសំខាន់យុទ្ធសាស្ត្រ និងគូសបញ្ជាក់ពីសារយ៉ាងជាប់លាប់របស់អគ្គលេខាបក្ស លោក តូ ឡឹមនិងថ្នាក់ដឹកនាំជាន់ខ្ពស់វៀតណាម ដោយផ្តោតការយកចិត្តទុកដាក់ជាពិសេស និងមានបំណងចង់សហការយ៉ាងជិតស្និទ្ធជាមួយរដ្ឋបាលរបស់ប្រធានាធិបតី Donald Trump ក្នុងគោលបំណង ជំរុញទំនាក់ទំនងភាពជាដៃគូយុទ្ធសាស្ត្រលើគ្រប់ជ្រុងជ្រោយ រក្សាសន្ទុះអភិវឌ្ឍន៍ឲ្យកាន់តែស៊ីជម្រៅ។ លោកនាយករដ្ឋមន្ត្រីបានសង្កត់ធ្ងន់ថា រដ្ឋាភិបាលវៀតណាមជានិច្ចកាលយកចិត្តទុកដាក់បង្កើតលក្ខខណ្ឌអំណោយផលសម្រាប់សកម្មភាពរបស់អង្គភាពអាជីវកម្មនិងអ្នកវិនិយោគអាមេរិកនៅវៀតណាម; អះអាងថា វៀតណាមមានបំណងចង់កសាងទំនាក់ទំនងសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគប្រកបដោយតុល្យភាព ស្ថិរភាព និងសុខដុមរមនាជាមួយសហរដ្ឋអាមេរិក។
រីឯខ្លួនវិញ លោកឯកអគ្គរដ្ឋទូត Marc E. Knapper បានសន្យាថា នឹងបន្តសម្របសម្រួលយ៉ាងជិតស្និទ្ធជាមួយក្រសួង ស្ថាប័ននានារបស់វៀតណាម ដើម្បីជំរុញនិងធ្វើឲ្យស៊ីជម្រៅថែមទៀតនូវទំនាក់ទំនងដៃគូយុទ្ធសាស្ត្រលើគ្រប់វិស័យវៀតណាម-អាមេរិក។ លោកឯកអគ្គរដ្ឋទូតបានអះអាងថា សហរដ្ឋអាមេរិកផ្តល់អាទិភាពដល់ការអភិវឌ្ឍទំនាក់ទំនងជាមួយវៀតណាមដោយឈរលើគោលការណ៍គោរពរបបនយោបាយ ឯករាជ្យ អធិបតេយ្យភាព និងបូរណភាពទឹកដីរបស់វៀតណាម ព្រមទាំងគាំទ្រវៀតណាមមួយដ៏រឹងមាំ ឯករាជ្យ ខ្លួនទីពឹងខ្លួននិងវិបុលភាព; ទន្ទឹងរង់ចាំការពង្រីកកិច្ចសហប្រតិបត្តិការលើគ្រប់វិស័យ។ លោកឯកអគ្គរដ្ឋទូត Knapper បានឲ្យដឹងថា ក្នុងឱកាសរំលឹកខួបអនុស្សាវរីយ៍លើកទី៣០ នៃការបង្កើតទំនាក់ទំនងការទូត ស្ថានទូតអាមេរិកប្រចាំនៅទីក្រុងហាណូយនឹងធ្វើការជាមួយទីភ្នាក់ងាររបស់វៀតណាម បង្កើតរបៀបវារៈប្រកបដោយប្រសិទ្ធភាព ដើម្បីពង្រឹងភាពជាដៃគូយុទ្ធសាស្ត្រលើគ្រប់ជ្រុងជ្រោយឱ្យកាន់តែស៊ីជម្រៅ៕
