នារសៀលថ្ងៃទី ២៥ តុលា លោកនាយករដ្ឋមន្ត្រី Pham Minh Chinh អញ្ជើញថ្លែងសុន្ទរកថាតាមទម្រង់ជាខ្សែវីដេអូ ក្នុងកិច្ចប្រជុំកំពូលជីវវិទ្យាពិភពលោកឆ្នាំ ២០២២ ក្រោមប្រធានបទ “អនាគតនៃវ៉ាក់សាំងនិងជីវវេជ្ជសាស្ត្រ” ដែលបានប្រារព្ធឡើងនៅប្រទេសកូរ៉េខាងត្បូងចាប់ពីថ្ងៃទី ២៥ ដល់ថ្ងៃទី ២៦ ខែតុលា។ នៅក្នុងសុន្ទរកថា លោកនាយករដ្ឋមន្ត្រី Pham Minh Chinh បានអះអាងថា ការកើត និងការផ្ទុះឡើងនៃជំងឺរាតត្បាតកូវីដ ១៩ បានប៉ះពាល់យ៉ាងធ្ងន់ធ្ងរនិងទូលំទូលាយដល់ប្រទេសទាំងអស់។ ក្នុងការប្រយុទ្ធប្រឆាំងនឹងជំងឺរាតត្បាតនាពេលកន្លងមកនេះ វៀតណាមបានចាត់វិធានការប្រយុទ្ធប្រឆាំងនិងទប់ស្កាត់ជំងឺរាតត្បាតជាមួយនឹងវិធីសាស្រ្តសកល បង្កើនសាមគ្គីភាពអន្តរជាតិ និងលើកកំពស់ពហុភាគីនិយម ដែលយកប្រជាជនជាមជ្ឈភាព និងជាម្ចាស់កម្មវត្ថុ។ ជាពិសេស វៀតណាមបានអនុវត្តន៍ដោយជោគជ័យការទូតវ៉ាក់សាំង និងយុទ្ធនាការចាក់វ៉ាក់សាំងដោយឥតគិតថ្លៃដ៏ធំបំផុតមិនធ្លាប់មានតាំង ពីមុនមក។ រហូតមកដល់ពេលនេះ ជំងឺរាតត្បាតត្រូវបានគ្រប់គ្រងជាមូលដ្ឋាន បង្កើតមូលដ្ឋានគ្រឹះសម្រាប់ការអភិវឌ្ឍសេដ្ឋកិច្ចសង្គម ការងើបឡើងវិញយ៉ាងឆាប់រហ័ស និងការអភិវឌ្ឍន៍ប្រកបដោយចីរភាព។ នាយករដ្ឋមន្ត្រី លោក Pham Minh Chinh បានសង្កត់ធ្ងន់ថា៖ “ពីជំងឺរាតត្បាតកូវីដ ១៩ និងវិបត្តិវេជ្ជសាស្រ្ដនាពេលថ្មីៗនេះ បង្ហាញពីសារៈសំខាន់នៃការលើកកម្ពស់ការស្រាវជ្រាវ និងការអភិវឌ្ឍវ៉ាក់សាំង និងបច្ចេកវិទ្យាជីវវេជ្ជសាស្ត្រ ដើម្បីចូលរួមចំណែកក្នុងការថែទាំសុខភាព និងការពារអាយុជីវិតរបស់មនុស្ស;  ធ្វើឱ្យប្រសើរឡើងនូវសមត្ថភាពឆ្លើយតបទៅនឹងជំងឺដែលអាចលេចឡើងដោយមិនបានរំពឹងទុក និងវិវឌ្ឍន៍ក្នុងលក្ខណៈស្មុគស្មាញ។ ជាមួយនឹងការមើលឃើញទុកជាមុន និងសម្រាប់ពិភពលោកដែលមានការអភិវឌ្ឈប្រកបដោយបរិយាប័ន្នកាន់តែប្រសើរ យើងត្រូវរួមដៃគ្នាដើម្បីពង្រឹង អភិវឌ្ឍន៍ និងចែករំលែកធនធានក្នុងការស្រាវជ្រាវ ផលិតវ៉ាក់សាំង កសាងឧស្សាហកម្មវេជ្ជសាស្ត្រ ជីវវិទ្យាទំនើប អភិវឌ្ឍឱសថទំនើប ដើម្បីទប់ទល់នឹងជំងឺរាតត្បាតប្រកបដោយប្រសិទ្ធភាព។ ទន្ទឹមនឹងនេះ ធានាឱ្យមានវិធីសាស្រ្តត្រឹមត្រូវ និងយុត្តិធម៌ចំពោះវ៉ាក់សាំង និងផលិតផលដើម្បីថែទាំ និងការពារសុខភាពមនុស្សទូទាំងពិភពលោក”។

លោកនាយករដ្ឋមន្ត្រីបានឲ្យដឹងថា ក្នុងរយៈពេលប៉ុន្មានឆ្នាំកន្លងមកនេះ វៀតណាមបានយកចិត្តទុកដាក់លើការវិនិយោគលើការស្រាវជ្រាវ និងផលិតវ៉ាក់សាំង ផលិតផលសម្រាប់ការពារ  គ្រប់គ្រងជំងឺ និងអភិវឌ្ឍន៍ផ្នែកជីវសាស្ត្រ។ ទន្ទឹមនឹងនេះ សង្ឃឹមថា នឹងទទួលបានជំនួយពីដៃគូនានា ក្នុងនោះមានប្រទេសកូរ៉េខាងត្បូងផងដែរ។ វៀតណាមបានប្តេជ្ញាចិត្តក្នុងការសម្របសម្រួលយ៉ាងជិតស្និទ្ធ និងប្រកបដោយប្រសិទ្ធភាពក្នុងការស្រាវជ្រាវ ការផលិត និងការផ្ទេរបច្ចេកវិទ្យា រួមចំណែកដល់ស្ថិរភាពខ្សែសង្វាក់ផ្គត់ផ្គង់សកលនៃវ៉ាក់សាំង និងផលិតផលជីវវេជ្ជសាស្ត្រ៕