នារសៀលថ្ងៃទី១៤ ខែមករា នៅទីក្រុងហាណូយ អញ្ជើញទទួលជួបនាយករដ្ឋមន្ត្រីរុស្ស៊ី លោក Mikhail Vladimirovich Mishustin ដែលកំពុងបំពេញទស្សនកិច្ចជាផ្លូវការនៅវៀតណាម អគ្គលេខាបក្សកុម្មុយនិស្តវៀតណាមលោក តូ ឡឹម បានស្វាគមន៍ចំពោះលទ្ធផលនៃជំនួបពិភាក្សាការងារនិងជំនួបសវនាការជាមួយថ្នាក់ដឹកនាំជាន់ខ្ពស់របស់វៀតណាម។ លោកអគ្គលេខាបក្ស តូ ឡឹម បានអះអាងថា វៀតណាមចងចាំជានិច្ចនូវការគាំទ្រ និងជំនួយដ៏មានតម្លៃ និងអស់ពីចិត្ត ដែលប្រជាជនសូវៀត ប្រជាជនស្ស៊ីបានផ្តល់ឱ្យវៀតណាមក្នុងអំឡុងឆ្នាំដ៏លំបាកនៃការតស៊ូ ក៏ដូចជាក្នុងការងារកសាង និងការពារមាតុភូមិផងដែរ; បញ្ជាក់ថា វៀតណាមគោរពពិសេសចំពោះទំនាក់ទំនងប្រពៃណី និងភាពជាដៃគូយុទ្ធសាស្ត្រលើគ្រប់ជ្រុងជ្រោយជាមួយរុស្ស៊ី ហើយជានិច្ចកាលចាត់ទុករុស្ស៊ីជាដៃគូសំខាន់ជួរមុខក្នុងគោលនយោបាយការបរទេសរបស់វៀតណាម។ លោកអគ្គលេខាបក្ស តូ ឡឹម ក៏បានលើកឡើងនូវទិសដៅសំខាន់ៗមួយចំនួន ដើម្បីពង្រឹងថែមទៀតទំនាក់ទំនងវៀតណាម-រុស្ស៊ីនាពេលខាងមុខ។

រីឯខ្លួនវិញ លោកនាយករដ្ឋមន្ត្រី Mikhail Vladimirovich Mishustin បានគោរពរំលឹកឡើងវិញនូវការអញ្ជើញរបស់ប្រធានាធិបតីរុស្ស៊ី លោក Vladimir Putin ដែលអញ្ជើញលោកអគ្គលេខាបក្សរ តូ ឡឹម ចូលរួមពិធីអបអរសាទរខួបលើកទី ៨០ នៃជ័យជំនះក្នុងសង្គ្រាមការពារជាតិដ៏មហិមារ និងបំពេញទស្សនកិច្ចទ្វេភាគីនៅសហព័ន្ធរុស្ស៊ីក្នុងឆ្នាំ ២០២៥។ លោកនាយករដ្ឋមន្ត្រី Mikhail Vladimirovich Mishustin បានអះអាងថា រុស្ស៊ីជានិច្ចកាលចាត់ទុកវៀតណាមជាដៃគូអាទិភាពដ៏សំខាន់បំផុតរបស់ខ្លួនក្នុងតំបន់អាស៊ីប៉ាស៊ីហ្វិក ជាពិសេសនៅអាស៊ីអាគ្នេយ៍ ហើយត្រៀមខ្លួនជាស្រេចដើម្បីពង្រីកកិច្ចសហប្រតិបត្តិការ និងធ្វើឱ្យស៊ីជម្រៅថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម លើវិស័យសេដ្ឋកិច្ច-ពាណិជ្ជកម្ម ថាមពល ការពារជាតិ សន្តិសុខ វិទ្យាសាស្ត្រ-បច្ចេកវិទ្យា វប្បធម៌ ការអប់រំ និងការផ្លាស់ប្តូររវាងប្រជាជននៃប្រទេសទាំងពីរ៕