លោក Medvedev បានចាត់ទុកថា រាល់ការចរចាណាមួយក៏ទាមទារឲ្យមានការបោះជំហានពីភាគីទាំងពីរ។ ទោះជាយ៉ាងណាក៏ដោយ ជំហានទាំងនេះត្រូវតែសមស្របទៅនឹងស្ថានភាពជាក់ស្តែង ក៏ដូចជាស្របតាមរដ្ឋធម្មនុញ្ញនៃសហព័ន្ធរុស្ស៊ី។
ពាក់ព័ន្ធនឹងបញ្ហាអ៊ុយក្រែន កាលពីថ្ងៃទី ១ ខែមីនា ប្រទេសហុងគ្រី និងស្លូវ៉ាគី បានអំពាវនាវឱ្យសហភាពអឺរ៉ុប (EU) ចាប់ផ្តើមការចរចាជាមួយរុស្ស៊ីលើជម្លោះនៅអ៊ុយក្រែន។
ក្នុងសារលិខិតផ្ញើជូនប្រធានក្រុមប្រឹក្សាអឺរ៉ុប លោក Antonio Costa នាយករដ្ឋមន្ត្រីហុងគ្រី លោក Orban បានបញ្ជាក់ថា ក្នុងបរិបទនាបច្ចុប្បន្ន ការបង្រួបបង្រួមទស្សនៈរបស់ EU លើបញ្ហាអ៊ុយក្រែន មិនអាចសម្រេចបានតាមរយៈការផ្លាស់ប្តូរព័ត៌មាន ឬការចងក្រងកិច្ចព្រមព្រៀងនោះទេ។ ផ្ទុយទៅវិញ សហភាពអឺរ៉ុបគួរតែធ្វើសន្ទនាដោយផ្ទាល់ជាមួយរុស្ស៊ីលើបទឈប់បាញ់ និងសន្តិភាពយូរអង្វែងនៅអ៊ុយក្រែន។
ក្រៅពីប្រទេសហុងគ្រី ស្លូវ៉ាគីក៏ប្រកាន់គោលជំហរតឹងរ៉ឹងទាក់ទងនឹងការផ្តល់ជំនួយដល់អ៊ុយក្រែន។ នៅក្នុងសេចក្តីប្រកាសដែលបានចេញផ្សាយបន្ទាប់ពីការជជែកតវ៉ាគ្នារវាងប្រធានាធិបតីអាមេរិក លោក Donald Trump និងប្រធានាធិបតីអ៊ុយក្រែន លោក Volodymyr Zelensky នៅសេតវិមានកាលពីថ្ងៃទី ២៨ ខែកុម្ភៈ នាយករដ្ឋមន្ត្រី Robert Fico បានឲ្យដឹងថា ប្រទេសស្លូវ៉ាគីនឹងបដិសេធមិនផ្តល់ជំនួយផ្នែកហិរញ្ញវត្ថុ និងយោធាដល់អ៊ុយក្រែនឡើយ៕
