ប្រធានសភាស្រីលង្កាលោក Mahinda Abeywardana បាននិយាយកាលពីថ្ងៃទី ៩ ខែកក្កដាថា ប្រធានាធិបតីស្រីលង្កាលោក Gotabaya Rajapaksa បានយល់ព្រមចុះចេញពីតំណែងនៅសប្តាហ៍ខាងមុខ។ ប្រធានាធិបតីបានលាលែងពីតំណែង ដើម្បីធានាដល់ការផ្ទេរអំណាចដោយសន្តិវិធី។ លោក Gotabaya Rajapaksa បានយល់ព្រមលាលែងពីតំណែងត្រឹមតែប៉ុន្មានម៉ោងបន្ទាប់ពីនាយករដ្ឋមន្ត្រីលោក Ranil Wickremesinghe បានលាលែងពីតំណែង។

កាលពីថ្ងៃទី៩ ខែកក្កដា បាតុកររាប់ពាន់នាក់បានដើរដង្ហែទៅកាន់ទីក្រុងកូឡុំបូ ដោយបានទម្លុះរបងការពារ និងសម្រុកចូលវិមានប្រធានាធិបតី ដើម្បីបង្ហាញពីការមិនពេញចិត្តចំពោះការលំបាកដែលពួកគេជួបប្រទះក្នុងជីវភាពរស់នៅ។ ប្រទេសស្រីលង្កាបានជួបប្រទះការខ្វះខាតម្ហូបអាហារ និងប្រេងឥន្ធនៈជាច្រើនខែ ការដាច់ចរន្តអគ្គិសនីរយៈពេលយូរ និងអតិផរណាដែលហក់ឡើង បន្ទាប់ពីកង្វះរូបិយប័ណ្ណបរទេស គ្មានលទ្ធភាពនាំចូលទំនិញសំខាន់ៗ ដែលនាំឱ្យមានវិបត្តិសេដ្ឋកិច្ចមិនធ្លាប់មានពីមុនមកនៅក្នុងប្រទេសកោះនេះ។ តម្លៃ ទំនិញសំខាន់ៗនៅក្នុងប្រទេសស្រីលង្កាបានកើនឡើងបីដងក្នុងរយៈពេលប៉ុន្មានខែថ្មីៗនេះ។ ជាលទ្ធផល ប្រទេសដែលធ្លាប់ស្គាល់ថាជា "គុជខ្យងនៃមហាសមុទ្រឥណ្ឌា" បានស្ថិតក្នុងដំណាក់កាលក្ស័យធន ដោយស្ទើរតែគ្មានលុយនាំចូលប្រេងសាំង ទឹកដោះគោ ហ្គាស និងក្រដាសអនាម័យ។ ប្រជាជនស្រីលង្កាកាន់តែច្រើនឡើងកំពុងស្វែងរកលិខិតឆ្លងដែនដើម្បីទៅក្រៅប្រទេស ស្វែងរកការងារផងដែរ៕