ប្រធានរដ្ឋសភាវៀតណាម លោក Vuong Dinh Hue និងប្រធានរដ្ឋសភាឡាវលោក Xaysomphone Phomvihane អញ្ជើញដឹកនាំគណៈប្រតិភូជាន់ខ្ពស់រដ្ឋសភានៃប្រទេសទាំងពីរជួបពិភាក្សាការងារ (រូបថត៖ VOV)

នាព្រឹកថ្ងៃទី៦ ខែធ្នូ ឆ្នាំ២០២១ នៅទីក្រុងហាណូយ ប្រធានរដ្ឋសភាវៀតណាម លោក Vuong Dinh Hue បានអញ្ជើញជាអធិបតីក្នុងពិធីទទួលស្វាគមន៍ប្រធានរដ្ឋសភាឡាវ។ បន្ទាប់ពីពិធីស្វាគមន៍ ភាគីទាំងពីរបានដំណើរការជំនួបពិភាក្សាការងារ។

ក្នុងជំនួបនេះ ប្រធានរដ្ឋសភា លោក Vuong Dinh Hue បានសង្កត់ធ្ងន់ថា ដំណើរទស្សនកិច្ចលើកនេះរបស់លោកប្រធានរដ្ឋសភាឡាវ គឺជាព្រឹត្តិការណ៍ដ៏សំខាន់និងមានអត្ថន័យបំផុត ដើម្បីបន្តពង្រឹងនិងពង្រីកទំនាក់ទំនងមិត្តភាព សាមគ្គីភាពពិសេស និងកិច្ចសហប្រតិបត្តិការលើគ្រប់វិស័យរវាងបក្សទាំងពីរ រដ្ឋទាំងពីរ និងប្រជាជននៃប្រទេសទាំងពីរ វៀតណាម-ឡាវនិយាយរួមនិងរវាងរដ្ឋសភានៃប្រទេសទាំងពីរនិយាយដោយឡែក ឲ្យកាន់ តែស៊ីជម្រៅប្រកបដោយប្រសិទ្ធ ភាពជាងទៀត។

ប្រធានរដ្ឋសភាទាំងពីររូបបានយល់ឃើញថា ភាគីទាំងពីរចាំបាច់ត្រូវមានការវាយតម្លៃជាក់ស្តែងបន្ថែមទៀតអំពីលទ្ធផលនៃកិច្ចសហប្រតិបត្តិការរបស់រដ្ឋសភាទាំងពីរនាពេលកន្លងមក ហើយពិភាក្សាអំពីទិសដៅនៃកិច្ចសហប្រតិបត្តិការនាពេលខាងមុខ។ ឈរលើមូលដ្ឋាននោះ ភាគីទាំងពីរនឹងធ្វើការពិចារណាលើការចុះហត្ថលេខាលើកិច្ចព្រមព្រៀងសហប្រតិបត្តិការថ្មីមួយជាមួយនឹងការធ្វើវិសោធនកម្ម និងបំពេញបន្ថែមឲ្យកាន់តែជាក់ស្តែងជាងទៀត។ 

ចំពោះទំនាក់ទំនងពហុភាគី ភាគីទាំងពីរនឹងសម្របសម្រួលយ៉ាងជិតស្និទ្ធនៅវេទិកាអន្តរសភាក្នុងតំបន់និងអន្តរជាតិ ដូចជាមហាសន្និបាតសហភាពអន្តរសភា (IPU) មហាសន្និបាតអន្តរសភានៃសមាគមប្រជាជាតិអាស៊ីអាគ្នេយ៍ (AIPA); វេទិកាសភាអាស៊ី-ប៉ាស៊ីហ្វិក (APPF) សហភាពសភាភាសាបារាំង (APF) ក៏ដូចជា សម្របសម្រួលនិងផ្លាស់ប្តូរគោលជំហរលើបញ្ហាអន្តរជាតិ និងតំបន់ដែលមានការយកចិត្តទុកដាក់គ្នាទៅវិញទៅមក។

ក្នុងឱកាសនេះ ប្រធានរដ្ឋសភាទាំងពីររូបបានធ្វើជាសាក្សីក្នុងពិធីប្រគល់គ្រឿងបរិក្ខារពេទ្យដោយរដ្ឋសភាវៀតណាមជួយដល់រដ្ឋសភាឡាវសម្រាប់ការប្រយុទ្ធប្រឆាំងនឹងជំងឺរាតត្បាតកូវីដ ១៩ ដែលមានតម្លៃ ១ លានដុល្លារអាមេរិក៕

តាម VOV5 - វិទ្យុសំឡេងវៀតណាម