ថ្លែងនៅក្នុងពីធីស្បថចូលកាន់តំណែងនាថ្ងៃដដែលនោះ នាយករដ្ឋមន្ត្រីថ្មី លោក Michel Barnier បានឲ្យដឹងថា នយោបាយបារាំងស្ថិតក្នុងដំណាក់កាលដ៏លំបាក ហើយបានសន្យាធ្វើការផ្លាស់ប្តូរឲ្យស្របតាមបំណង់ប្រាថ្នារបស់ប្រជាជនបារាំង។ លោកបានគូសបញ្ជាក់ផងដែរថា បញ្ហាសំខាន់ៗនាពេលខាងមុខគឺការកែលម្អសេវាសាធារណៈ លើកកម្ពស់គុណភាពអប់រំ ពង្រឹងសន្តិសុខ ការគ្រប់គ្រងជនអន្តោប្រវេសន៍ ក៏ដូចជាការលើកកម្ពស់គុណភាពជីវិភាពរស់នៅ។
លោក Barnier កើតក្នុងឆ្នាំ ១៩៥១ គឺជាសមាជិកនៃគណបក្សសាធារណរដ្ឋតំណាងឱ្យក្រុមស្តាំនិយមប្រពៃណី។ លោកមានបទពិសោធន៍ ៤០ឆ្នាំក្នុងឆាកនយោបាយបារាំងនិងអឺរ៉ុប ដោយបានកាន់តំណែងជារដ្ឋមន្ត្រីផ្សេងៗគ្នាក្នុងប្រទេសបារាំង ដូចជា៖ រដ្ឋមន្ត្រីក្រសួងការបរទេស កសិកម្ម និងបរិស្ថាន។ លោកធ្លាប់កាន់តំណែងជាស្នងការអឺរ៉ុបចំនួនពីរដង និងជាទីប្រឹក្សាប្រធានគណៈកម្មការអឺរ៉ុប លោកស្រី Ursula von der Leyen។ នៅឆ្នាំ ២០២១ លោក Barnier បានប្រកាសឈរឈ្មោះសម្រាប់ការបោះឆ្នោតប្រធានាធិបតីបារាំង ប៉ុន្តែមិនទទួលបានការគាំទ្រគ្រប់គ្រាន់នៅក្នុងគណបក្សសាធារណរដ្ឋនោះទេ៕
