ជាក់ស្តែង ទំហំនៃការនាំចេញទំនិញក្នុងខែមិថុនា ត្រូវបានប៉ាន់ប្រមាណថាសម្រេចបានចំនួន ២៩,៣ ពាន់លានដុល្លារអាមេរិក កើនឡើង ៤,៥% បើធៀបនឹងខែមុន។ ដូច្នេះហើយ អាស្រ័យលើឥទ្ធិពលនៃការជំរុញខ្លាំងនូវសកម្មភាព ពាណិជ្ជកម្ម នេះជាខែទីពីរដែលទំហំនៃការនាំចេញទំនិញមាននិន្នាការកើនឡើងក្រោយពីការធ្លាក់ចុះយ៉ាងខ្លាំងក្នុងរយៈពេលវែង។ បន្លែផ្លើឈើជាមុខទំនិញមួយក្នុងចំណោមមុខទំនិញដែលមានកំណើនខ្លាំង ហើយបច្ចុប្បន្នជាក្រុមទំនិញនាំចេញធំជាងគេក្នុងវិស័យកសិផល។ ជាពិសេស ផ្លែទុរេន ជាមុខទំនិញដែលមានកំណើនខ្លាំង ក្រោយពីប្រទេសចិនបានបើកឱ្យនាំចូលជាផ្លូវការ។
ទោះជាយ៉ាងណាក៏ដោយ ជាទូទៅក្នុងឆមាសទីមួយនៃឆ្នាំនេះ ទំហំនៃការនាំចេញទំនិញត្រូវបានប៉ាន់ប្រមាណថា សម្រេចបាន ១៦៤,៤៥ ពាន់លានដុល្លារអាមេរិក ធ្លាក់ចុះ ១២,១% បើធៀបនឹងរយៈពេលដូចគ្នាកាលពីឆ្នាំមុន។ ក្នុងពេលជាមួយគ្នានោះ ទំហំនៃការនាំចូលទំនិញត្រូវបានប៉ាន់ប្រមាណថា សម្រេចបានជាង ១៥២ ពាន់លានដុល្លារអាមេរិក ធ្លាក់ចុះជាង ១៨% បើធៀបនឹងរយៈពេលដូចគ្នាកាលពីឆ្នាំមុន។ ក្នុងរយៈពេល ៦ ខែដំបូងនៃឆ្នាំនេះ អតិរេកពាណិជ្ជកម្មត្រូវបានប៉ាន់ប្រមាណថា ទទួលបានជាង ១២ ពាន់លានដុល្លារ (រយៈពេលដូចគ្នាកាលពីឆ្នាំមុនទទួលបានអតិរេកពាណិជ្ជកម្មចំនួន ១,២ ពាន់លានដុល្លារ)។
ទាក់ទងនឹងទីផ្សារ ក្នុងរយៈពេល ៦ ខែកន្លងទៅ សហរដ្ឋអាមេរិកបាននាំចូលទំនិញច្រើនជាងគេពីប្រទេសវៀតណាមជាមួយនឹងទំហំប៉ាន់ស្មានចំនួន ៤៤,២ ពាន់លានដុល្លារ ខណៈដែលប្រទេសចិនបាននាំចេញច្រើនជាងគេទៅវៀតណាមជាមួយនឹងទំហំប៉ាន់ស្មានជាង ៥០ ពាន់លានដុល្លារ៕
