តបតាមការអញ្ជើញរបស់ប្រធានាធិបតីសហព័ន្ធរុស្ស៊ីលោក Vladimir Putin នាថ្ងៃទី ៧ ខែកញ្ញា អគ្គលេខានៃគណៈកម្មាធិការមជ្ឈិមបក្សកុម្មុយនិស្តវៀតណាម ប្រធានរដ្ឋវៀតណាមលោក តូ ឡឹម និងភរិយា រួមជាមួយគណៈប្រតិភូជាន់ខ្ពស់វៀតណាម បានចាកចេញពីទីក្រុងហាណូយ អញ្ជើញទៅបំពេញទស្សនកិច្ចផ្លូវរដ្ឋនៅសហព័ន្ធរុស្ស៊ី។ នេះជាដំណើរទស្សនកិច្ចផ្លូវរដ្ឋលើកដំបូងទៅកាន់រុស្ស៊ីរបស់ប្រមុខបក្សនិងរដ្ឋវៀតណាម ចាប់តាំងពីឆ្នាំ ១៩៩១ ព្រមទាំងបានប្រព្រឹត្តិទៅ បន្ទាប់ពី មហាសន្និបាតលើកទី ១៤ របស់បក្សកុម្មុយនិស្តវៀតណាម និងការបោះឆ្នោតរដ្ឋសភានីតិកាលទី ១៦ផងដែរ។

អញ្ជើញឆ្លើយសម្ភាសន៍ជាមួយទីភ្នាក់ងារសារព័ត៌មានរុស្ស៊ី TASS មុនដំណើរទស្សនកិច្ច អគ្គលេខាបក្ស ប្រធានរដ្ឋវៀតណាមលោក តូ ឡឹម បានអះអាងថា ភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសហព័ន្ធរុស្ស៊ី បន្តជាអាទិភាពកំពូលមួយ និងជាជម្រើសយុទ្ធសាស្ត្រក្នុងគោលនយោបាយកិច្ចការបរទេសរបស់វៀតណាម។ ដូច្នេះ ការអភិវឌ្ឍ និងលើកកំពស់កិច្ចសហប្រតិបត្តិការទ្វេភាគីរវាងវៀតណាម និងសហព័ន្ធរុស្ស៊ី ក្នុងរយៈពេលខាងមុខ គឺជាផលប្រយោជន៍រយៈពេលវែងនៃប្រទេសទាំងពីរ។ យោងតាមលោកអគ្គលេខាបក្ស ប្រធានរដ្ឋ តូ ឡឹម ក្រៅពីវិស័យប្រពៃណីដូចជា ការអប់រំ និងបណ្តុះបណ្តាល ថាមពល វប្បធម៌ និងសិល្បៈ ដែលជាមូលដ្ឋានគ្រឹះ និងត្រូវការពង្រឹង និងផ្លាស់ប្តូរថ្មីនោះ វិស័យថ្មីៗដូចជា នាវាចរណ៍ ផ្លូវដែក អវកាស វិទ្យាសាស្ត្រ បច្ចេកវិទ្យា នវានុវត្តន៍ និងបច្ចេកវិទ្យាឌីជីថល ត្រូវតែធ្វើឱ្យមានលក្ខណៈជាក់ស្តែង តាមរយៈគម្រោងប្រកបដោយចីរភាព យូរអង្វែង និងយុទ្ធសាស្ត្រ។

លោកគ្គលេខាបក្ស ប្រធានរដ្ឋ តូ ឡឹម ជឿជាក់ថា ភាពជាដៃគូយុទ្ធសាស្ត្រគ្រប់ជ្រុងជ្រោយរវាងវៀតណាម និងសហព័ន្ធរុស្ស៊ី នឹងបន្តអភិវឌ្ឍន៍យ៉ាងខ្លាំងក្លា ជាក់ស្តែង ប្រកបដោយប្រសិទ្ធភាព ដោយរួមចំណែកជាវិជ្ជមានដល់បុព្វហេតុកសាង និងអភិវឌ្ឍន៍ប្រទេសនីមួយៗ ដើម្បីផលប្រយោជន៍របស់ប្រជាជននៃប្រទេសទាំងពីរ ដើម្បីសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍនៅក្នុងតំបន់ និងលើពិភពលោក៕