នៅក្នុងជំនួបនេះ អគ្គលេខាបក្សលោក តូ ឡឹម និងប្រធានាធិបតី លោក Anura Kumara Dissanayaka បានសម្តែងការពេញចិត្តចំពោះការអភិវឌ្ឍប្រកប ដោយចីរភាពនៃទំនាក់ទំនងមិត្តភាពជាប្រពៃណីនិងកិច្ចសហប្រតិបត្តិការលើគ្រប់វិស័យ រវាងវៀតណាមនិងស្រីលង្កាក្នុងរយៈពេល ៥៥ ឆ្នាំកន្លងមក; ដោយសង្កត់ធ្ងន់ថា ចំណង់មិត្តភាពយូរអង្វែង ទំនុកចិត្តនិងការយោគយល់គ្នា គឺជាមូលដ្ឋានគ្រឹះដ៏សំខាន់សម្រាប់ភាគីទាំងពីរបន្តទាញយកប្រសិទ្ធភាពសក្តានុពលនិងប្រៀបខ្លាំងរបស់ប្រទេសនីមួយៗ និងជំរុញកិច្ចសហប្រតិបត្តិការយ៉ាងទូលំទូលាយដើម្បីនាំទំនាក់ទំនងឡើងកម្ពស់ថ្មី។
លោកអគ្គលេខាបក្ស តូ ឡឹម និងលោកប្រធានាធិបតី Anura បានឯកភាពបន្តពង្រឹងទំនុកចិត្តនិងភាពស្អិតរមួតរវាងប្រទេសទាំងពីរ និងបក្សកាន់អំណាចទាំងពីរ ជំរុញការផ្លាស់ប្តូរគណៈប្រតិភូជាន់ខ្ពស់និងគ្រប់លំដាប់ថ្នាក់ និងនាំកិច្ចសហប្រតិបត្តិការការពារជាតិនិងសន្តិសុខក្លាយជាសសរ ស្តម្ភថ្មីក្នុងទំនាក់ទំនងទ្វេភាគី។ ទន្ទឹមនឹងនោះត្រូវបង្កើតនូវរបកគំហើញក្នុងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។ លោកអគ្គលេខាបក្ស តូ ឡឹម បានបញ្ជាក់ថា ជាមួយនឹងប្រៀបខ្លាំងរបស់ខ្លួន វៀតណាមមានបំណងរួមដំណើរ និងសហប្រតិបត្តិការជាមួយស្រីលង្កាក្នុងការអភិវឌ្ឍសេដ្ឋកិច្ចសង្គម។ លោកប្រធានាធិបតីស្រីលង្កាបានស្វាគមន៍និងអះអាងថា នឹងបង្កើតលក្ខខណ្ឌអំណោយផលសម្រាប់សហគ្រាសវៀតណាមមកបណ្តាក់ទុនលើវិស័យសំខាន់ៗ និងយុទ្ធសាស្ត្រនៅស្រីលង្កា។ ភាគីទាំងពីរក៏បានឯកភាពពង្រីកកិច្ចសហប្រតិបត្តិការលើវិស័យកសិកម្ម អប់រំ វប្បធម៌ ការផ្លាស់ប្តូរប្រជាជន ទេសចរណ៍ និងសាសនា ព្រមទាំងជំរុញការបើកជើងហោះហើរត្រង់ឱ្យបានឆាប់ ដើម្បីគាំទ្រដល់កិច្ចសហប្រតិបត្តិការនិងតភ្ជាប់រវាងប្រទេសទាំងពីរ។
ថ្នាក់ដឹកនាំទាំងពីរក៏បានសន្យាសហការយ៉ាងជិតស្និទ្ធថែមទៀត និងបង្កើនការគាំទ្រគ្នាទៅវិញទៅមកនៅវេទិកាពហុភាគី ជាពិសេសអង្គការ សហប្រជាជាតិនិងកិច្ចសហប្រតិបត្តិការខាងត្បូង-ខាងត្បូង៕
