ថ្នាក់ដឹកនាំ ស.ប.ប កូរ៉េ បានសំដែងនូវបំណងចង់បង្កើនទំនាក់ទំនងជាមួយវៀតណាម
នាយករដ្ឋមន្ត្រីវៀតណាម លោក Nguyen Xuan Phuc និងថ្នាក់ដឹកនាំ ស.ប.ប កូរ៉េ លោក គីមជុងអ៊ុន (រូបថត៖ vietnamplus.vn)
នាថ្ងៃទី២ ខែកញ្ញា ឆ្នាំ២០១៩ ទីភ្នាក់ងារសារព័ត៌មានកណ្តាលរបស់ ស.ប.ប កូរ៉េ (KCNA) បានផ្សាយថាថ្នាក់ដឹកនាំប្រទេសនេះ លោក គីមជុងអ៊ុន បានផ្ញើលិខិតអបអរសាទរក្នុងឱកាសទិវាបុណ្យឯករាជ្យជាតិវៀតណាម ដោយសំដែងនូវ បំណងចង់បង្កើនទំនាក់ទំនងឲ្យកាន់តែល្អប្រសើរថែមទៀតរវាងប្រទេសទាំងពីរ។
យោងតាម KCNA បានឲ្យដឹងថា លោក គីមជុងអ៊ុន បានសំដែងនូវការជឿជាក់ថា “ទំនាក់ទំនងសហប្រតិបត្តិការនិងមិត្តភាពរវាងបក្សទាំងពីរ ប្រទេសទាំងពីរ ដោយឈរលើមូលដ្ឋាននៃទំនាក់ទំនងជាប្រពៃណីនិងប្រវត្តិសាស្ត្រយូរអង្វែងនោះ នឹងកាន់តែខ្លាំងក្លាជាងពេលណាទាំងអស់” ផងដែរ។ KCNA ក៏បន្តទៀតថា ថ្នាក់ដឹកនាំ ស.ប.ប កូរ៉េ លោក គីមជុងអ៊ុន បានរំលឹកឡើងវិញនូវដំណើរទស្សនកិច្ចថ្នាក់រដ្ឋជាលើកដំបូងរបស់លោកទៅកាន់ប្រទេសវៀតណាមកាលពីខែមីនាឆ្នាំ ២០១៩ កន្លងទៅ ដោយបញ្ជាក់ថាដំណើរទស្សនកិច្ចនេះ «បានបង្កើតឱកាសដ៏សំខាន់មួយ» ក្នុងការពង្រឹងនិងអភិវឌ្ឍទំនាក់ទំនងទ្វេភាគីនិងចំណងមិត្តភាពរវាងប្រទេសទាំងពីរផងដែរ៕
តាម VOV5 - វិទ្យុសំឡេងវៀតណាម