ព័ត៌មាន
ប្រធានរដ្ឋវៀតណាម លោក Tran Dai Quang អញ្ជើញទទួលជួប ជាមួយអតីតរដ្ឋមន្ត្រីការបរទេសអាមេរិក លោក John Kerry
ប្រធានរដ្ឋវៀតណាម លោក Tran Dai Quang អញ្ជើញទទួលជួបជាមួយអតីតរដ្ឋមន្ត្រីការបរទេសអាមេរិក
លោក John Kerry (រូបថត៖ VOV)
ប្រធានរដ្ឋលោក Tran Dai Quang បានស្នើឲ្យអតីតរដ្ឋមន្រ្តីលោក John Kerry បន្តគាំទ្រទំនាក់ទំនងវៀតណាម-អាមេរិក ជាពិសេសក្នុងវិស័យសេដ្ឋកិច្ច ពាណិជ្ជកម្ម វិនិយោគ អប់រំ វិទ្យាសាស្ត្រ បច្ចេកវិទ្យា ជំនះពុះពារលើផលវិបាកដោយសង្គ្រាមនិងទប់ទល់នឹងបម្រែបម្រួលអាកាសធាតុ។
ក្នុងជំនួបសន្ទនាជាមួយអតីតរដ្ឋមន្រ្តីការបរទេសអាមេរិកលោក John Kerry នារសៀលថ្ងៃទី២១ ខែមិថុនា ឆ្នាំ២០១៧ នៅរដ្ឋធានីហាណូយ ប្រធានរដ្ឋវៀតណាមលោក Tran Dai Quang បានវាយតំលៃខ្ពស់ចំពោះដំណើរទស្សនកិច្ច របស់អតីតរដ្ឋមន្រ្តីការបរទេសរូបនេះ ក្នុងការជំរុញទំនាក់ទំនងវៀតណាម-អាមេរិក ក្នុងអំឡុងច្រើនទសវត្សកន្លងទៅហើយសង្កត់ធ្ងន់ថា ប្រទេសនិងប្រជាជនវៀតណាម ជានិច្ចកាលចាត់ទុកលោក Kerry ជាមិត្តភក្តិជិតស្និទ្ធមួយរូប។ ប្រធានរដ្ឋលោក Tran Dai Quang ជូនដំណឹងថា វៀតណាមកំពុងត្រៀមរៀបចំយ៉ាងសកម្មឲ្យសន្និសីទជាន់ខ្ពស់ APEC នៅទីក្រុងដាណាំង ដែលជាព្រឹត្តិការណ៍កិច្ចការបរទេសសំខាន់បំផុត ក្នុងឆ្នាំ២០១៧។ លោកប្រធានរដ្ឋសំដែងក្ដីសប្បាយនៅពេល ប្រធានាធិបតីអាមេរិកលោក Donald Trump អះអាងថា នឹងចូលរួមសន្និសីទ APEC លើកនេះ ហើយបំពេញដំណើរទស្សនកិច្ច ជាផ្លូវការនៅវៀតណាមផង ដែរ។ ដោយឈរលើស្មារតីនេះ ប្រធានរដ្ឋលោក Tran Dai Quang បានស្នើឲ្យអតីតរដ្ឋមន្រ្តីលោក John Kerry បន្តគាំទ្រទំនាក់ទំនងវៀតណាម-អាមេរិក ជាពិសេសក្នុងវិស័យសេដ្ឋកិច្ច ពាណិជ្ជកម្ម វិនិយោគ អប់រំ វិទ្យាសាស្ត្របច្ចេកវិទ្យា ជំនះពុះពារលើផលវិបាកដោយសង្គ្រាម និងទប់ទល់នឹងបម្រែបម្រួលអាកាសធាតុ។
រីឯខ្លួនវិញ អតីតរដ្ឋមន្រ្តីការបរទេសលោក John Kerry បានឲ្យដឹងថា លោកជានិច្ចកាលគាំទ្រ វៀតណាមក្នុងដំណើរការកសាងនិងអភិវឌ្ឍន៍ប្រទេសជាតិ តាមនោះរួមចំណែកកសាងទំនាក់ទំនងទ្វេភាគី ឲ្យកាន់តែអភិវឌ្ឍន៍ពីមួយថ្ងៃទៅមួយថ្ងៃ។
នារសៀលថ្ងៃដដែល ឧបនាយករដ្ឋមន្រ្តី និងជារដ្ឋមន្រ្តីការបរទេសវៀតណាម លោក Pham Binh Minh បានទទួលជួបសន្ទនាជាមួយអតីតរដ្ឋមន្រ្តីការបរទេសអាមេរិកលោក John Kerry ផងដែរ៕
តាម VOV5 - វិទ្យុសំឡេងវៀតណាម