ທ່ານຮອງນາຍົກລັດຖະມົນຕີ ຫວຽດນາມ ຫວູດຶກດາມເປັນປະທານກອງປະຊຸມ (ພາບ: ກະຊວງສາທາລະນະສຸກ ຫວຽດນາມ)

ວັນທີ 28 ມັງກອນ, ຄະນະຊີ້ນຳແຫ່ງຊາດກ່ຽວກັບການປ້ອງກັນສະກັດກັ້ນໂລກລະບາດໂຄວິດ - 19 ຂອງ ຫວຽດນາມ ໃຫ້ຮູ້ວ່າ ຕອນຄ່ຳວັນທີ 27 ມັງກອນ, ຜົນກວດວິໄຈຫາເຊື້ອຢັງຢືນ ມີຜູ້ຕິດເຊື້ອລາຍໃໝ່ຕື່ມອີກ 2 ຄົນໃນຊຸມຊົນ (ຄົນໜຶ່ງຢູ່ຫາຍເຢືອງ ແລະ ຄົນໜຶ່ງຢູ່ ກ໋ວາງນິງ), ທ່ານຮອງນາຍົກລັດຖະມົນຕີ ຫວຽດນາມ ຫວູດຶກດາມ ແລະ ທ່ານ ລັດຖະມົນຕີກະຊວງສາທາລະນະສຸກ ຫວຽດນາມ ຫງວຽນແທັງລອງ ໄດ້ຈັດກອງປະຊຸມທາງອອນລາຍໂດຍດ່ວນ ກ່ຽວກັບ 2 ແຂວງກ໋ວາງນິງ ແລະ ຫ໋າຍເຢືອງ. ທາງ 2 ແຂວງດັ່ງກ່າວໄດ້ເປັນເຈົ້າການໃນການປະຕິບັດ ບັນດາມາດຕະການ ຈຳກັດບໍລິເວນ, ດັບມອດໂລກລະບາດ ຢ່າງຂ້ຽວຂາດ.

ທີ່ກອງປະຊຸມ, ທ່ານ ຫງວຽນແທັງລອງ ໃຫ້ຮູ້ວ່າ, ກະຊວງສາທາລະນະສຸກ ສືບຕໍ່ຈັດສົ່ງນັກຊ່ຽວຊານວິໄຈຫາເຊື້ອຢູ່ໂຮງໝໍ ແບັກມາຍ, ສະຖາບັນ ອະນາໄມ ແລະ ກັນໂລກລະບາດ ສູນກາງ, ມະຫາວິທະຍາໄລແພດສາດສາທາລະນະ ແລະ ມະຫາວິທະຍາໄລແພດສາດຮ່າໂນ້ຍ ລົງ ແຂວງຫ໋າຍເຢືອງ ເພື່ອໜູນຊ່ວຍການວິໄຈຫາເຊື້ອໃນຕອນເຊົ້າວັນທີ 28 ມັງກອນ. ຄຽງຄູ່ກັນນັ້ນ, ກະຊວງສາທາລະນະສຸກ ໄດ້ຮຽກຮ້ອງໃຫ້ ມະຫາວິທະຍາໄລເຕັກນິກແພດສາດ ຫ໋າຍເຢືອງ, ວິທະຍາໄລ ການຢາສູນກາງ - ຫ໋າຍເຢືອງ ຈັດສົ່ງພະນັກງານ ແລະ ນັກສຶກສາເຂົ້າຮ່ວມ ວຽກງານປ້ອງກັນ, ສະກັດກັ້ນໂລກລະບາດໃນບໍລິເວນແຂວງ.

ສ່ວນວຽກງານປິ່ນປົວ, ກະຊວງສາທາລະນະສຸກ ໄດ້ລະດົມ ໂຮງໝໍພະຍາດເຂດຮ້ອນສູນກາງ ຊ່ວຍແຂວງຫ໋າຍເຢືອງສ້າງຕັ້ງລະບົບປິ່ນປົວຢູ່ທ້ອງຖິ່ນທັນທີເພື່ອປະຕິບັດການປິ່ນປົວຢູ່ກັບທີ່. ດັ່ງນັ້ນໄລ່ຮອດເວລາ 6 ໂມງຂອງວັນທີ 28 ມັງກອນ, ຫວຽດນາມມີຜູ້ຕິດເຊື້ອພະຍາດໂຄວິດ - 19 1.553 ຄົນ, ໃນນັ້ນມີຜູ້ເສຍຊີວິດ 35 ຄົນ.

(ແຫຼ່ງຄັດຈາກ VOV)