ຂ່າວສານ
ອາຊຽນ 2020: ທ່ານນາຍົກລັດຖະມົນຕີ ສິງກະໂປ ສະເໜີ 3 ຂົງເຂດ ເຊິ່ງບັນດາປະເທດ EAS ຄວນເພີ່ມທະວີການຮ່ວມມື
ທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ (ພາບ: TTXVN)
ນັກຂ່າວສຳນັກຂ່າວສານ ຫວຽດນາມ ປະຈຳ ສິງກະໂປ ໄດ້ຄັດສະເໜີບົດຂຽນຂອງໜັງສີພິມລາຍວັນ The Straits Times ຂອງ ສິງກະໂປ ລົງວັນທີ 15 ພະຈິກ ໂດຍໃຫ້ຮູ້ວ່າ ທີ່ກອງປະຊຸມສຸດຍອດ ອາຊີຕາເວັນອອກ (EAS) ເຊິ່ງຖືກດຳເນີນຕາມຮູບການທາງອອນລາຍ ພາຍໃຕ້ການເປັນປະທານຂອງ ຫວຽດນາມ - ປະເທດປະທານໝູນວຽນ ອາຊຽນ 2020, ທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ ໄດ້ສະເໜີ 3 ຂົງເຂດເຊິ່ງບັນດາປະເທດສະມາຊິກ EAS ຄວນເພີ່ມທະວີການຮ່ວມມື, ເຊິ່ງລວມມີ ການຊຸກຍູ້ລັດທິຫຼາຍຝ່າຍ ວັກຊິນ, ແບ່ງປັນເຕັກໂນໂລຢີ ແລະ ໜູນຊ່ວຍເຊິ່ງກັນແລະກັນໃນການຟື້ນຟູເສດຖະກິດ. ການນຳ ສິງກະໂປ ສະແດງຄວາມຫວັງວ່າ ບັນດາປະເທດສະມາຊິກ EAS ຈະຮ່ວມມືກັນເພື່ອຮັບປະກັນແຫຼ່ງສະຫຼອງວັກຊິນ ແລະ ວິທີການປິ່ນປົວຍຸຕິທຳ, ມີສະຖຽນລະພາບ ແລະ ລາຄາທີ່ເໝາະສົມ. ທີ່ກອງປະຊຸມ, ທ່ານນາຍົກລັດຖະມົນຕີ ຫຼີຊຽນຫຼົງ ກໍຊົມເຊີຍຄວາມກ້າວໜ້າທີ່ບັນລຸໄດ້ໃນການເຈລະຈາລະຫວ່າງ ອາຊຽນ ແລະ ຈີນ ກ່ຽວກັບກົດແຫ່ງການປະພຶດຢູ່ທະເລຕາເວັນອອກ (COC). ທ່ານເນັ້ນໜັກວ່າ ບັນດາຝ່າຍສືບຕໍ່ຮ່ວມມືເພື່ອຮັກສາສັນຕິພາບ ແລະ ສະຖຽນລະພາບໃນພາກພື້ນ, ບັນດາການຂັດແຍ້ງກັນຢູ່ທະເລຕ້ອງໄດ້ຮັບການແກ້ໄຂໃຫ້ສອດຄ່ອງກັບບັນດາລະບຽບກົດໝາຍສາກົນ ທີ່ໄດ້ຮັບການຮັບຮູ້ຢ່າງທົ່ວເຖິງ.
(ແຫຼ່ງຄັດຈາກ VOV)
